虽然华哥同娜姐得一场对手戏，连导演都话佢地好衬！

刘德华最近在电影《扫毒2天地对决》首度跟林嘉欣和周秀娜合作，跟两位女神分别有一段情，华哥话同两位女主角有种相逢恨晚感觉，而嘉欣和娜姐亦大赞华哥是好对手，不论外型和演戏都一样无得顶，三人仲约定未来再继前缘。

同嘉欣娜姐合作未够喉 刘德华望未来再续前缘

戏中华哥演出身社团的富豪，做古惑仔时跟娜姐有一段情，捞正行后认识任律师的林嘉欣，两人结婚。华哥直言有份选角，「我觉得佢哋两个好啱演，其实我觉得同佢哋两个系一个故事，不过有个扫毒去包装，希望大家睇扫毒外，都要留意番呢两段感情，我哋三个人其实划咗个三角形，佢哋两个嘅圈圈中间就系我，我哋两个环系扣得好紧，我哋呢条线都可以拍部戏。」

戏中华哥和嘉欣原是恩爱夫妻，但为了生Ｂ及各自的秘密而起争执。

华哥更形容跟嘉欣和娜姐合作有种相逢恨晚感觉，「（睇着嘉欣）点解依家先遇到；（望住娜姐）我哋就分手早得滞，下次再续前缘啦！」华哥更自豪娜姐连外型都衬，「我哋拍完第一个take后，导演（邱礼涛）就望住我哋两个话『好衬呀你两个！』我就答佢『你赞我定笑佢呀！』不过我哋之前冇前科，但埋位就觉得系男女朋友，系咪好奇怪。其实同仍哋两个都有呢种相逢恨晚感觉，未来有好多机会再合作。」

华哥拖着嘉欣和娜姐约定两个女神下次再合作。

扮醉酒有秘诀

嘉欣又大赞同华仔演戏感觉好真实，「我觉得好似过紧生活，我哋做夫妻嘛，真系好似家庭咁，我自己都相信咗。（华哥：我哋商业片嚟，唔好讲得喧艺术啦咁！）哈哈！系好生活化呀！」娜姐就赞华哥扮醉超似，「佢一入嚟真系好似醉酒嘅状态，左撞右撞又跌倒，令到我真系好憎饮醉酒嘅人。」华哥就自爆扮得似原因，「我完全唔饮酒，（但扮得好似㖞！）因为啲人醉晒我好清醒，杜Sir（杜琪峰）套《孤男寡女》有一场戏我醉坐喺度系咁讲嘢，佢问我点解咁似嘅，我睇佢哋啰！𠮶时因为太真成场对白要配过。」

戏中除华哥和古仔外，仲有三哥苗侨伟，三大型男难得合作。

戏中嘉欣和华哥这对夫妻好恨生B，已是两女之母的嘉欣事前有专登去访问身边朋友，「有啲结咗婚10几年都生唔到，每日要打贺尔蒙针，自己作为女人，自己又有小朋友，好明白呢个角色嘅痛苦，所以拍我同华哥嘅嗌交戏，系好肉紧嘅。」华仔就话现实做了爸爸后，私人生活反而比演戏分别大，「我好早已经演人老窦，郭富城做过我个仔，（嘉欣尖叫：边套呀？）《雷洛传》呀！」

娜姐虽然和华哥只有一场对手戏，但一拍已难忘。

华哥笑言有啲后悔揾古仔合唱，「多个歌手同我抢饭食。」

戏中华哥和古天乐本是社团兄弟，因一次误会而反目。