雖然華哥同娜姐得一場對手戲，連導演都話佢地好襯！

劉德華最近在電影《掃毒2天地對決》首度跟林嘉欣和周秀娜合作，跟兩位女神分別有一段情，華哥話同兩位女主角有種相逢恨晚感覺，而嘉欣和娜姐亦大讚華哥是好對手，不論外型和演戲都一樣無得頂，三人仲約定未來再繼前緣。

同嘉欣娜姐合作未夠喉 劉德華望未來再續前緣

戲中華哥演出身社團的富豪，做古惑仔時跟娜姐有一段情，撈正行後認識任律師的林嘉欣，兩人結婚。華哥直言有份選角，「我覺得佢哋兩個好啱演，其實我覺得同佢哋兩個係一個故事，不過有個掃毒去包裝，希望大家睇掃毒外，都要留意番呢兩段感情，我哋三個人其實劃咗個三角形，佢哋兩個嘅圈圈中間就係我，我哋兩個環係扣得好緊，我哋呢條線都可以拍部戲。」

戲中華哥和嘉欣原是恩愛夫妻，但為了生Ｂ及各自的祕密而起爭執。

華哥更形容跟嘉欣和娜姐合作有種相逢恨晚感覺，「（睇着嘉欣）點解依家先遇到；（望住娜姐）我哋就分手早得滯，下次再續前緣啦！」華哥更自豪娜姐連外型都襯，「我哋拍完第一個take後，導演（邱禮濤）就望住我哋兩個話『好襯呀你兩個！』我就答佢『你讚我定笑佢呀！』不過我哋之前冇前科，但埋位就覺得係男女朋友，係咪好奇怪。其實同仍哋兩個都有呢種相逢恨晚感覺，未來有好多機會再合作。」

華哥拖着嘉欣和娜姐約定兩個女神下次再合作。

扮醉酒有祕訣

嘉欣又大讚同華仔演戲感覺好真實，「我覺得好似過緊生活，我哋做夫妻嘛，真係好似家庭咁，我自己都相信咗。（華哥：我哋商業片嚟，唔好講得喧藝術啦咁！）哈哈！係好生活化呀！」娜姐就讚華哥扮醉超似，「佢一入嚟真係好似醉酒嘅狀態，左撞右撞又跌倒，令到我真係好憎飲醉酒嘅人。」華哥就自爆扮得似原因，「我完全唔飲酒，（但扮得好似喎！）因為啲人醉曬我好清醒，杜Sir（杜琪峯）套《孤男寡女》有一場戲我醉坐喺度係咁講嘢，佢問我點解咁似嘅，我睇佢哋囉！嗰時因為太真成場對白要配過。」

戲中除華哥和古仔外，仲有三哥苗僑偉，三大型男難得合作。

戲中嘉欣和華哥這對夫妻好恨生B，已是兩女之母的嘉欣事前有專登去訪問身邊朋友，「有啲結咗婚10幾年都生唔到，每日要打賀爾蒙針，自己作為女人，自己又有小朋友，好明白呢個角色嘅痛苦，所以拍我同華哥嘅嗌交戲，係好肉緊嘅。」華仔就話現實做了爸爸後，私人生活反而比演戲分別大，「我好早已經演人老竇，郭富城做過我個仔，（嘉欣尖叫：邊套呀？）《雷洛傳》呀！」

娜姐雖然和華哥只有一場對手戲，但一拍已難忘。

華哥笑言有啲後悔搵古仔合唱，「多個歌手同我搶飯食。」

戲中華哥和古天樂本是社團兄弟，因一次誤會而反目。