又真系要窒一窒......

陈家乐和李靖筠（Gladys）最近在贺岁片《我的笋盘男友》中首度合演情侣，虽然两人都觉得对方好容易沟通，不过亦认为是最不合衬的荧幕情侣，但正正符合角色需要，因戏中家乐演高富帅的青年才俊，而Gladys只是个靠做兼职生活的平凡少女。讲到最深刻戏份，两人同《头条新闻》讲，都系被结局的浪漫气氛感动，而Gladys却大爆拍摄时家乐望住喊到流晒鼻涕的她，竟一度犹疑差啲唔敢咀落去，场面相当爆笑！

人讲到流鼻涕一事，笑唔停就知有几熟络。

家乐和Gladys笑言想继续合作，做一对最唔合衬的荧幕情侣。

最初得知跟师兄家乐合作，Gladys搞笑谓觉得三生有幸，「同个火红火热嘅前辈，万人迷合作㖞！不过佢有啲乞人憎嘅特质我系几钟意，好容易投入度角色，就系一啖沙糖一啖屎，譬如会主动帮你开门，但又会窒吓你咁。」至于家乐就直言最初觉得两人好唔衬，「高度差好远！（Gladys：咩呀！最萌身高差，差15cm差唔多啦!）𠮶时未睇剧本，系有呢个担心，睇完剧本觉得几有火花，因为系讲两个世界嘅人。」

Gladys觉得同角色「阿宝」最似就是会为朋友出头。

家乐觉得同角色「马奋」反差好大，所以演起来有一定难度。

讲到戏中最深刻一幕，两人都认为是浪漫结局，Gladys说：「一定系结局，我细个时对爱情同婚姻嘅幻想，呢场戏系超乎我幻想，当𠮶日入到场景，我好开心有幸经历呢件事，有男仔有心又有钱，买咗咁多部雪机㖞！而感情亦都好真摰。」家乐亦补充：「见到佢喊晒，我都好感动，呢个女仔被我做呢啲嘢感动到流泪，仲鼻涕都流埋㖞！」

Gladys忍唔住爆：「我鼻敏感好严重，喊会流好多鼻水，佢仲要锡我，我见佢犹疑咗一阵嘅！」家乐就解释：「导演唔cut我都要锡落去，我冇犹疑好耐嘅，哈哈！一秒度啦！我系谂帮唔帮佢拎张纸巾抹下先锡，定系直接锡啫！」

才俊「马奋」竟然陪「阿宝」去卖鱼蛋，呢招果然冧到女。

出道4年，Gladys机会不绝，早前亦演出了TVB剧集《跳跃生命线》，她坦言好感恩，亦会好珍惜每个机会。

戏中家乐演「笋盘」，家乐唔觉得自己系，亦好介意呢个称号，「其实我唔钟意『笋盘』呢个字，拣偶唔应该用一个字框住，即系唔应该有条件，譬如高富帅就叫做『笋盘』，我唔认同咁样，钟意就系钟意，钟意一个人唔会理佢有咩条件而去爱佢。同埋我第一次感觉好强烈，当咗系朋友就永远系朋友，我都试过一见钟情拍到拖。」至于Gladys亦认为拣对象不会睇条件，「其实我想揾一段关系，系一齐进步同学习，能够好平衡，大家互励互勉，对我更重要。」

家乐近年相当多产，另一套贺岁片《紧急救援》亦有份，试过低潮的他坦承仍然会不安，怕无下次机会。