密密拍戏揾真银 黄德斌抽空同老婆行街拍拖
好恩爱啊~
黄德斌近排人气急升,皆因刚播完嘅无线剧《婚姻合伙人》中,佢有场强奸咪神高海宁嘅戏,加上离开大台后,片约不绝又有event揾真银。近排佢就忙住拍摄英皇电影《怒火》,日前傍晚终于有时间同老婆拍下拖,两夫妇去咗圆方拍拖睇戏食饭shopping兼买𩠌,得一日假,梗系要用尽啲啦!
黄德斌去年离开大台,凭《逆流大叔》首获提名金像最佳男配角,其后与刘德华、刘青云合作拍摄《拆弹专家2》,又与周润发合作《骄阳岁月》。近日,佢亦有份拍摄陈木胜执导嘅英皇电影《怒火》,戏中与甄子丹及谢霆锋合作,自然不乏动作场面,打到周身痛,之后紧接又开另一部警匪片,暑假都无得休息。
日前傍晚,难得有日假,德斌做番廿四孝人夫陪老婆Joyce行圆方。见两公婆喺戏院行出嚟先去睇衫shopping。人夫睇吓男装,又与认出佢嘅店员笑笑口打招呼,表现亲民。行咗几间,德斌无收获就陪爱妻行吓超市,二人买咗大量蔬果,食得咁健康,唔怪得德斌年过半百都keep到一身爆肌身材啦!买咗两大袋𩠌后,两夫妇随意喺超市外拣间小店坐低叹拉面。二人一边食,一边有讲有笑,恩爱放闪。