独闯波兰11日 (2018年10月) 之第五部: Wroclaw
好, 系去完成个旅程整整三个月后 (中间已经去完另一个旅行 XD) 终于发表埋最后一部!
波兰之旅最后一站选择系Wroclaw系因为佢个机场有较多国际航班。到出发前先知, 原来Wroclaw被 European Best Destination (一个布鲁塞尔推动欧洲文化及旅游嘅组织) 选为 2018年最佳欧洲城市。
Day 10 & 11 Wroclaw (弗罗茨瓦夫)
由Zakopane去Wroclaw最直接嘅方法就系搭巴士。如果搭巴士转火车其实时间差唔多, 所以拎住好重行李嘅我就选择咗一程长途巴直达Wroclaw。巴士车程6个几钟, 为咗唔好浪费太多日照时间系车上面, 就搭咗一班劲早嘅巴士 - 早上6点开出, 下午12.50到达。天未光就出到Zakopane个巴士总站等车。
幸好巴士上有个小小嘅厕所 (但有啲污糟), 如果唔系7个钟嘅车程都几辛苦。终于到达Wroclaw巴士总站!
为咗之后方便观光, 就订咗系旧城区附近嘅酒店, 距离巴士总站大约十几分钟车程 (但系个日塞车搭咗成半个钟, 幸好系搭Uber, 价钱已定亦只需付少于港币30元)。Wroclaw同其他欧洲城市都几似样, 亦同好多其他波兰城市一样好多地方都系战时被炸毁之后先重建。
第十日就系旧城区行吓, 玩咗一阵"dwarf hunting"。Wroclaw嘅小矮人 (dwarf) 一开始系用嚟纪念一个波兰反共运动, 之后市内越放越多, 宜家已经有多过300个小矮人啦! Wroclaw市内仲有得买有关于寻找小矮人嘅地图! 好钟意最尾个三只!
晚餐去咗一间根据T网排名几好嘅餐厅, 可能系一个人所以又唔驶订或等位。头盘要咗个Foie gras mousse, 主菜系Deer tenerloin配咗杯白酒, 甜品要咗佢唔知咩嘢攞第一名嘅Puff pastry with nut cream, hazelnut praline and passion fruit ice cream。三道菜都好好味!!
波兰之旅最后一日。开始唔舒服...因为唔舒服同惊太赶, 朝早都系酒店附近行吓, 食最后一餐波兰午餐。有mull wine, 饮咗个蕃茄汤同埋食咗个超大份嘅薯饼...唔知份量咁大, 完全食唔晒...浪费了...
食完午餐就去咗Wroclaw嘅其中一个free walking tour, 听吓呢个地方嘅历史。当中去咗以前嘅一条市集街 (宜家已经变咗做卖精品嘅店舖), 一个现代嘅市集同埋Ostrow Tumski (Cathedral Island) 等等嘅地方。Ostrow Tumski系Wroclaw最旧嘅地区,面积虽然唔大,但 (如其名) 有好多间教堂都系位于呢个岛。
系个free walking tour同一个波兰女仔吹水, 原来佢系亚洲做过几年潜水嘅工作, 但系因为波兰太少沿海地方所以揾嘢做有啲困难。但系最终俾佢揾到系Wroclaw有份关於潜水嘅工就搬咗嚟啦! 佢想系开工前认识吓呢个城市所以就参加咗呢个团。系临离开呢个国家都可以同人倾吓计真系好...有时可能你对一个人认识唔深, 知道只系擦肩而过, 可能更无顾忌咁分享。
由Catherdral Island行番酒店大约半个钟。由酒店Uber出机场大约20分钟, 港币50元。回程机下午7点起飞, 经Frankfurt转机, 第日嘅下午就番到香港啦! 咁就完成咗一人深度游波兰之旅~~
多谢各位支持我写同埋花时间读呢个部落格噢!
~完~
你可能有兴趣: