独闯波兰11日 (2018年10月) 之第四部: Zakopane (下)

Morskie Oko (海洋之眼), 又叫"Fish Lake" (因为有好多鱼!), 位于Tatra National Park, 被Mieguszowiecki山峰包围。由Zakopane出发车程大约45分钟至一个钟。今部介绍嘅地方就系呢度!

Day 8 Morskie Oko

第八日一早起身就去Zakopane巴士总站揾个架写住"Morskie Oko"嘅巴士, "有幸"搭到第一班车, 7.40am开出。去Morskie Oko先要撘车去Tatra National Park入口, 再行大约两个钟上山去个湖。由Zakopane巴士总站一程巴士就到国家公园门口 (亦都系总站落, 所以唔驶惊唔识落车)。

其实个朝早系Zakopane市内已经落雨, 点知坐巴士途中就开始落雪, 去到国家公园门口仲越落越大! 上山前去一去厕所, 出嚟嘅时候同车个三个人已经唔见咗...唯有买完入国家公园嘅门票后自己开始行啦。好大雪呀! 后尾睇返先知原来个朝只有-6度, 好彩著咗雪靴!! 行咗一阵, 地上已经铺咗一层薄薄嘅雪。

嚟Morskie Oko之前睇其他网站介绍话会有好多访客, 点知我去嘅时候人影都冇个, 只系隔好耐先可能有人反方向咁走 (个啲人可能系喺国家公园内过夜, 因为有五日票卖)。每次见到有人经过都好期待, 一个眼神接触或者一个"hi"都令我觉得安全啲同冇咁闷。回头一望, 呢四位型男好似拍广告咁!

虽然一早知道呢条行山径会系石屎路, 但系一直以暗斜形式上山所以都唔系行得太快。最大问题系一路落住大雪, 路面开始铺咗一层薄雪, 有啲跣又食唔到力, 行起都几攰...行吓行吓条大路突然发现唔见晒地吓啲脚印! 个吓个心真系怯一怯! 跟住好彩好快见到原来佢哋行咗捷径, 所以跟住行啦 (其实跟住石屎路行都系一样, 只系要耐啲)。

天气真系变幻无常, 有时会见到蓝天, 有时大风雪到争唔大眼。最攞命系段路径唔系太多标示，根本唔知道自己仲要行几耐先到，唯有硬著头皮继续走。好彩嘅系, 友人已经一早话我知跟住石屎路走就会到。但有时当前面一片白蒙蒙, 得自己一个系条路, 能见度又低, 啲风吹入树林发出阵阵怪声嘅时候...真系吓死宝宝。

一路行, 到某个位太大雪, 地上嘅脚印慢慢消失, 吓到我要行快啲, 好似要追著啲脚印咁! 同埋啲雪都开始有啲厚度, 所以行得更辛苦。但系过咗上面个段空旷啲嘅地方就到啦!! 系呢种天气独自行咗啱啱好两个钟!! 见到尽头嘅画面终于呈现系眼前。行到咁远当然要落埋个湖边影相啦! 虽然落湖个条已经变咗"唔系路", 但路系自己行出嚟嘅, 自已嘅路自己开!

自己去游行要影相, 最好嘅朋友就系脚架! (可惜脚架去完行山后光荣殉职...) 影咗一阵天气又开始变差...所以去湖边嘅餐厅避避。一入到去竟然见到同车嚟嘅肥叔叔 (点解可以行得咁快...)! 打咗个招呼后佢已经准备走。因为太攰, 叫咗杯热葡萄酒 (mulled wine) 就系个度坐咗差唔多成个钟!

可惜所有继续上山嘅路已经消失于雪中, 冇得上高啲望番落个湖度, 应该会几仙景呢! 所以系餐厅外面影多咗阵相就起行落山。

其实系餐厅后段已经开始多少少人出现 (虽然个团全部都系坐车上山!)。落山嘅时候先开始多人系迎面上山 (有几个仲问仲有几耐先到)。真系应该迟少少出发...其他网页 (兼我入住个间酒店) 称要早出发, 可能其实系指夏天或九月最多人嘅时间可以避人潮, 我今次也避得太切底了吧! 落山慢慢行, 又行咗两个钟。途中见到马车上山落山好辛苦呀...如果你会嚟Morskie Oko就尽量试吓自己行, 放过啲马啦!