独闯波兰11日 (2018年10月) 之第二部: Krakow

一开始点解会选择去波兰? 其中一个原因就系想去Krakow。上年去完Munich嘅集中营 (Dachau) 后就想嚟呢个更大规模、保存得更完整嘅集中营。当然啦, 如果觉得集中营太伤感的话, Krakow都有其他嘢睇。等我续一介绍吓我去过嘅地方 (唔敢叫集中营做"景点"...实在系一个太沈重嘅地方...)。

Day 4-6 Krakow (克拉科夫)

旅程嘅第四日一早由Warsaw搭火车去Krakow。又系订咗头等车票 (订车票嘅网页请见第一部), 所以可以试埋火车餐牌上嘅第二款食物 - waffle with cream cheese and nuts。因为车程都要2hr15min, 所以啱啱好可以赶到睇埋Schindler's List嘅下半 (一套由史提芬史匹堡执导嘅电影, 改编自真人真事, 下文会讲少少)。要赶住睇埋套戏系因为个日系Krakow嘅行程就系要去Schindler's Factory~

系Krakow订咗嘅酒店亦都系火车站附近。步程大约5-10分钟。呢间亦都系成个旅程我最钟意嘅酒店 (房间好舒服同埋hi-tech, 24小时各种咖啡同茶包免费任饮, 同埋位置好方便, 但因为唔帮佢卖广告所以唔开名, 想知请PM)。因为惊系Krakow嘅时间有啲赶, 会睇唔晒所有重点, 所以选择系度花少少钱揾个私人司机带我去Wieliczka Salt Mine同埋Schindler's Factory 去解决呢个问题。如果自己去当然冇问题, 但系交通同排队买入场门票要较长时间 (私人司机包点对点接送, 同埋去Schindler's Factory佢一早已买好入场门票可以唔驶排队, 因为个度每日有限人流, 晏少少去都分分钟入唔到场, 咁就打乱晒啲行程!)。

个司机系酒店接我之后第一站就去Wieliczka Salt Mine先。由市中心去Wieliczka Salt Mine嘅车程都要30-40分钟。去到个度司机去帮我买入场门票, 我可以去周围行吓。下图白色帐篷系其中一种语言观光团嘅等候区, 不同语言观光团系唔同位置等㗎, 去要留意。而好彩我系参加"Tourist Route"英文团, 开团比较多, 所以只系等咗半个钟 (因为到嘅时候啱啱好有一团出咗发)。同埋如果入去想影相记住要买许可证, 10pln。佢除咗Tourist Route之外仲有其他玩法, 可以系网页到睇到有咩选择, 有啲仲可以体验吓做盐矿工系做咩。

入到去准备室导游会派每人一个耳机, 因为一团都几十人, 用耳机听佢讲解会清楚好多。大家攞晒耳机之后就出发啦! 第一步就系要转落53层嘅地底, 共380级楼梯, 去开始呢个探险之旅! 转到头都晕!

落到地底去咗好多个"chamber", 有啲会系讲解以前系盐圹圹工嘅辛酸, 有啲就有以前嘅雕像原封不动放系度 (下图呢个由大理石雕成)。条条嘅隧道都仲可以见到盐嘅踪影, 导游话如果想证明系唔系盐最快捷嘅方法系用条脷...lol

其中最宏伟应该就系Chapel of St. Kinga。冇谂过一个圹场入面可以有一个咁宽阔嘅"房", 好似一个大舞厅, 仲要有啲好靓嘅雕刻, 都系以前啲矿工雕㗎! 手工好劲!

我哋呢个团去咗矿场嘅其中三层。另一个令我印象深刻, 起得好靓嘅chamber:

下面呢个chamber唔同之处系个空间系用炸药炸开。

导游话原本可以坐船游圹场, 但系宜家太多人嚟会塞车...原本船只可以经过嘅隧道:

去完Weiliczka Salt Mine, 司机就系停车场等我, 接住就去Schindler's Factory。短短咁介绍吓上面提过Schindler's List呢套戏 - 套戏系改编自本书, 本书系讲 (真人真事) 一个德国纳粹商人系二次世界大战嘅时间利用自己间厂需要工人呢个原因, 收留 (救) 咗千几个原本好大机会 (或者已经) 被送去集中营受死嘅波兰犹太人。虽然友人已经提醒过Schindler's Factory呢个博物馆冇咩系关于套电影, 但去到都不禁有啲失望...个博物馆只得一间房有提过Schindler, 同埋个博物馆的确系Schindler间厂嘅遗址度起...但其他都系关于战时嘅Krakow (系...其实Schindler's Factory作为一个景点另一个名叫Museum of Wartim Krakow, 所以佢系贴题嘅...)。走嘅时间仲要落大雨, 灰咗...

完晒啲行程就请司机车我去Krakow Old Town作为终点站。虽然落雨, 但系Old Town都好多人, 夜景都几靓呀! 好多人亦因为避雨避咗入Cloth Hall。因为Krakow以前系一个商贸中心, 所以大批商人会系Cloth Hall倾生意, 亦都会系丝绸、香料、皮革等商品入口嘅地方。而Weiliczka Salt Mine嘅盐亦会经个度出口㗎。当然啦, 宜家全部商店都系卖手信。

个晚虽然落住雨但咁啱经过一个户外市集, 就系个度街边档啲小食当晚餐啦! 系咁冻嘅天气紧系要叫番杯热嘅甜酒, 呵呵!

第五日终于到重点! 以前, Auschwitz 集中营 (下称 "Auschwitz") 只系教科书上面嘅一行行文字。宜家, 呢段历史活活的展现系眼前。

先简单介绍吓Auschwitz:

Auschwitz当年分咗三大区域运作。一开始只有Auschwitz I, Auschwitz II-Birkenau (下称 "Birkenau") 同埋Auschwitz III-Monowitz (下称 "Monowitz") 系后建嘅。而Auschwitz I起初只系为咗监禁被捕但监狱唔够位摆嘅波兰政治犯, 但后尾慢慢演变到专杀犹太人嘅地方。系Auschwitz I个22栋建筑物都满晒, Birkenau同Monowitz作为subcamp建成。其实Auschwitz I只系有两个毒气室 (gas chamber), 而Birkenau系有六个, 可想而知Birkenau系大好多, 亦都系杀多好多人。根据官方网站, 成个Auschwitz运作期间有大约一百三十万人被送去集中营, 当中只有二十万人幸存。

因为比较迟先订去集中营嘅入场门票, 所以只系剩番一个六个钟嘅"硏学"团 (网页个名系"6 hours study tour") 俾我订, 仲要只系得番一个位...平时人哋去参观通常系参加2.5或3.5个钟嘅团, 所以一直都好担心自己报咗一个比人长一倍时间嘅团 (心理同体力上) 会唔会好攰。但好彩个领队讲解得好好, 亦有好多可以睇嘅地方, 所以到最尾根本唔觉得已经过咗六个钟。

个团早上9.30开始, 所以搭咗早上8.05个班车。巴士站亦好近住处, 穿过火车站上一层就到。但去到个时已经好多人! 差啲无位坐...车程都要成个钟。到达Auschwitz I要过简单嘅安检, 之后根据你已经订好嘅团去唔同位等领队。因为十月系参观高锋期, 所以一定要参加导赏团先入得Auschwitz I。同领队团友汇合后就开始啦! 呢个地方真系唔系玩玩吓。有几个年轻人系集中营入口影打卡相好嘈同玩玩吓, 立即俾我团嘅领队闹, 要佢哋尊重啲呢个地方...

呢个硏学团头两个几钟系喺Auschwitz I, 然后有大约半个钟嘅休息 (但系呢半个钟内要自己去搭个架免费接驳巴士去Birkenau门口集合等第二部分开始), 后半段个两个几钟就系Birkenau。Auschwitz I嘅建筑物都系下图咁嘅样, 相比Birkenau可以话靓好多。Auschwitz I啲原址有几个变咗做展出当年被送入集中营不幸者嘅物品, 有啲就完全保留原貌, 所有设施连地板同樯上嘅印都保留咗...近年Auschwitz I仲开多咗个系播番啲以前未有集中营时啲人嘅生活相片、影片, 造成好大嘅对比...个度仲放咗一本名册, 系死者嘅名册...当中有啲页数空白咗用嚟记念啲无名牺牲者。领队话迟啲有机会可能开埋当年用嚟做医学实验个橦, 到时真系更加心寒。

Auschwitz I最后一站就系当年集中营有去冇回嘅地方 - 毒气室。系入面唔系逗留好耐, 因为地方细又团接团咁...所以领队都无太多解释, 留番系Birkenau啲遗址再讲。

而Birkenau就系个条长长火车轨个度...Birkenau大部分都系木屋, 环境比Auschwitz I差好多。想像吓系冬天零下唔知几多度嘅时候, 就算只系喺木屋入面唔驶你出去做嘢...个火炉又唔够整热成间房 (领队话个火炉嘅温度系啲人会瞓上去取暖...但又有几多个位可以俾啲人咁瞓呢...)。领队又介绍, 一格床可以瞓多达十个人...一张床会迫到三十个...咁成间屋嘅密度大家亦可想像到...

因为纳粹军撤走嘅时候想破坏晒有关佢哋罪行嘅一切证据, 所以所有毒气室系1945年1月被炸毁 (Auschwitz I𠮶个除外)。Birkenau由1942年3月开始运作, 同年5月亦系纳粹军第一次进行大型筛选, 将第一批受害者以毒气室杀害。当时啲人系不知情嘅情况下被送去毒气室。系入去前会经过一间更衣室, 以为被要求除晒衫系去冲凉, 纳粹军 (或一啲被委派去帮手嘅囚犯) 仲会叫佢哋记住自己放衫个位嘅号码...但当然佢哋根本冇命返去攞自己啲衫。系毒气室死咗之后尸体会被移到隔离嘅火葬场立即烧掉。呢个动作就由1942年5月开始至1944年11月不停重复, 到后期因为连火葬场都烧得唔够快, 佢哋只好将啲尸体索性系毒气室外嘅空地烧咗就算。所以个遗址完全可以令大家想像到成个一条龙过程系点发生。

因为Birkenau系呢个种族清洗嘅历史入面系一个好重要嘅地方, 当时世界各地嘅犹太人被运到呢度 (全个Auschwitz死者当中有九成系喺Birkenau被杀, 当中有九成系犹太人), 所以我哋去个时仲见到好多犹太学生去渡念死者。而Birkenau以前嘅行政办公室其中一部分就用嚟展出咗其中一啲幸存者或死者嘅故事, 个度亦系成个团嘅最后一站。

解散前领队亦话我哋知原来所有好莱坞嘅电影系唔可以系Auschwitz入面拍, 要系啲铁丝网外攞景, 因为要尊重呢个地方。而佢自己亦帮过Denial呢套电影提供资料同协助拍摄, 所以知道好多拍摄内容 (就好似主角佢哋去视察个毒气室遗址原来系喺英国唔知边度拍!)。完咗个团都只系大约下午3点, 所以可以慢慢系Birkenau影相。而个晚太攰, 晚餐系Burger King搅掂, 但外国嘅Burger King实在太好味, 太犯规了吧!

第六日留番系市区。朝早去咗个废废嘅皇宫 (Wawel Castle) 同大教堂 (Wawel Cathedral)。两者规模、展品同其他欧洲城市 (如Prague) 嘅皇宫、大教堂真系冇得比。仲要大部分都唔可以影相, 真系好彩安排咗系星期一去, 有几个馆都系免费入场。

因为个皇宫有啲闷, 都冇心机去晒所有馆。所以下昼赶得切参加"Jewish Krakow"嘅free walking tour, 睇吓入集中营之前犹太人系Krakow系点生活。个团去咗好几个以前犹太人主要聚集嘅地方 (例如广场、市场、犹太会堂 (synagogue) 等)。领队仲带咗我哋去拍Schindler's List嘅广场同埋有条电影中好令人印象深刻嘅楼梯。

啲犹太人被送去Auschwitz之前, 其实已经经历咗一段被打压嘅时间。佢哋系被纳粹德军下令离开Krakow, 可以留低嘅都系啲"有用"啲嘅犹太人。但系1941年, 剩余个啲就被迁移到一个由墓碑石建成围墙嘅贫民区 (ghetto) 生活。贫民区只有三个入口, 如果要出去做嘢嘅都要攞许可证。原来一个住3,500人嘅小区就迫咗16,000人。之后因为数字一路增加, 直至佢哋开始被送去唔同嘅集中营先开始减少。个walking tour到差唔多最尾嘅时候就经过以前贫民区剩低嘅少部分围墙, 全市只剩番两小块遗址。

行完两个钟散团后同咗两位分别来自德国同台湾嘅团友去食领队介绍嘅街头小食 (Zapiekanki), 原味 (有芝士同蘑菇) 一条都只系5pln! 德国妹妹好食得, 竟然可以自己食晒成条包 (我同台湾团友买咗一条芝士蘑菇同火腿馅嘅一人一半, 7pln)! 之后可惜大家都有自己要去嘅景点, 所以就此分道扬镳。