独闯波兰11日 (2018年10月) 之第三部: Zakopane (上)

经第二部的检讨后, 决定要将剩低嘅行程分三部嚟写, 唔会再好似第二部咁长! 所以呢个第三部会讲吓系Zakopane嘅上半, 所以有关系Zakopane行山只可以系第四部先见大家。Zakopane同之前去嘅城市唔同好多, 多大自然嘅景点, 我亦选择系度跳过晒所有历史、博物馆, 俾个脑轻松吓。

Day 7 & 9 Zakopane (扎科帕内) & Kasprowy Wierch

第七日一早就离开Krakow。今次唔再系搭火车而系搭长途巴去Zakopane。去Zakopane都几多车, 所以大约早上九点几 (酒店话呢段时间应该唔会塞车) 去到巴士站到问边个月台最快有车就搭咗个班, 可以上车先买车票, 20pln。车程如果顺利大约两个钟就可以到达, 但系个日系咁整路搅到迟咗半个钟。好彩呢日无太多行程所以无咩所谓。

由Zakopane巴士总站行去位于Zakopane大街旁嘅酒店大约15分钟, 但系拖住个箧都有啲吃力, 要大约20-25分钟...但间酒店实在太好, 所以如果再去我都会住番个度, 真系旺中带静。

去到酒店有得提早入住, 所以可以上一上房整顿先再出动。由酒店出大街只须一两分钟! Zakopane啲屋好靓呀, 大部分都系由本造 (酒店都系)。同埋条大街虽然大部分都系做游客生意, 但系都好有气氛, 落雪或有圣诞装饰嘅时候应该更靓!

Zakopane第一站就系想去街尾搭Gubalowka Gondola上山顶睇Zakopane全景。由大街一路向下行, 落一条短隧道上番去, 再跟住个列铺头行就到Gondola个站。但系未到个站就被个啲唔似芝士嘅芝士吸引咗过去。成条街有一半都系卖芝士同果酱 (试过后最钟意cranberry个只!), 有卖冻冻嘅 (其实只系室温, 但系十月尾个时已经只系得几度), 有烧热食嘅, 亦可以加果酱。第一次食就试基本个款, 之后食好几次都系钟意烧热加果酱 (大约2.5-3pln)!!

满足咗个胃就向前进发! 我嘅"好运"续摩洛哥之旅有几个重要景点系我哋去嘅时候维修后, 今次到Gondola...(只可深深叹一口气)...又系维修!!! 一年维修个几日都可以俾我中到!

唯有去旁边走走, 睇吓有冇其他方法上山。原本想试行路轨旁边山波上去, 点知有个人坐系度话系私家路, 每行一公里收费3pln...唯有去的士党, 同其他游客搭的士上去, 来回每人22pln (的士党大赚!), 同Gondola同价。

上到山顶行咗一阵就走, 差唔多所有铺都冇开, 又超大风...但系有只好可爱肥肥嘅狗狗!

个晚为咗准备第二朝要早出去行山, 所以简单咁去初尝波兰老麦。第八日嘅行山请留意第四部, 宜家俾住一张相先啦!

第九日仍然系Zakopane, 由巴士总站搭写住Kunice嘅巴士 (其实似香港个啲私人24人小巴多啲) 就可去到Kasprowy Wierch个缆车站 (巴士单程3pln)。听同车个女仔讲话山上都几靓, 但系因为个朝系咁落雨, 虽然已经到缆车站, 佢话都系之后个日再去。但系因为已经系我最后一日系Zakopane, 唯有搏一搏啦 (虽然缆车都几贵, 要63pln)。

上Kasprowy Wierch要系中间转一次缆车。系个度其实已经开始漂雪。一上度Kasprowy Wierch心知不妙, 能见度简直底到一个点...30米都唔知有冇...但系有雪都好, 因为真系好钟意落雪!!

反正都上到嚟, 又见有其他人行到上去天文台, 所以又试试跟住啲就嚟唔见咗嘅梯级走上去。途中同落嚟嘅人互相扶吓, 感觉好似大家遇到问题互相帮助咁 (谂太多 lol)。终于上到天文台, 但真系太大太大雪所以已经再行唔到去平时啲人打卡个位。影一阵相又剩番我一个, 太大雪有啲惊同危险, 所以都系快啲瀡番落去。