左起：26岁　40岁啱倾啱玩，陈淑庄和MASTAMIC合照都要头贴头膊贴膊，连笑容都好一致。

《盛女爱作战》播完，但相关人等死唔断气，Bonnie仲有机开咪做DJ，箩底橙升呢做明星。素人有市场，反而身为立法会议员，又有大律师专业资格的40岁陈淑庄（Tanya），单计议员的人工连津贴已月入23万，加上本身系舞台剧演员，talk得又玩得，偏偏两年前同开京菜馆的前男友分手后，一直未有着落。为免变高危卖剩蔗，陈淑庄最近积极物色对象。即将举行talk骚，本刊发现陈淑庄近日与rapper MASTAMIC行得好埋，又与词人梁栢坚孖住队啤。据知更因为丧黐MASTAMIC，惹来男方的正印女友微言。

 
女人四十的陈淑庄，虽然贵为大律师，亦系立法会议员，条件比盛女Florence好得多，但自从两年前与拍拖8年的京菜馆仙宫楼老细丛铁飞（英雄哥）分手后，一直单身，谷底陈淑庄更曾绝望表示：「我呢种人物好难识人，都是人拣我，多过我拣人！」

 
MASTAMIC同女友Kathy同居于南丫岛横塱村屋，月租约6千5，做紧艺穗会公关嘅Kathy绝对负担得起。

后台互劈
Dry足两年，本刊发现下月将举行3场talk骚《戴错嘢夫人》的陈淑庄，近日身边有不同男士轮流相陪，桃花极旺，其中与26岁rapper MASTAMIC更特别啱嘴形。据知两人因早前筹备《戴》剧认识，上月MASTAMIC参与一个大型band骚，陈淑庄专程前往捧场，更带备几支红酒赠兴。「𠮶晚Tanya带咗三支红酒入场，个骚开始冇几耐已经自队，后来俾个『食蕉』闹，佢咪惟有返入后台再劈过啰，马米（MASTAMIC）一唔使上台就陪埋佢饮，两个企埋一边吹水饮酒，不知几high！」据现场人士透露。

踩场示威
虽然陈淑庄与MASTAMIC年龄相差14年，但两人非常投契，更在talk骚中合作rap一首歌〈戴错嘢夫人〉。「Tanya好欣赏马米嘅音乐才华，佢知马米喺中环艺穗会有个地方做嘢，一得闲或者喺立法会开完会就走上去话度桥，一倾就倾几粒钟，讲到天黑都唔愿走！」啱倾无罪，弊在MASTAMIC有个同样大过自己，现年约40岁的正印女友Kathy Chan，现于艺穗会做公关。「Tanya成日走上去揾马米，仲倾到唔愿走，佢女友坐正隔篱梗系睇到眼火爆啦！话晒𠮶度都系Kathy主场，见到有第二个女人咁样倾法，实会唔开心！」知情人士透露。

爱黐音乐人
同MASTAMIC劲啱倾，原来陈淑庄（右二）同其他音乐人亦相当熟络，早前同林敏骢（左一）、野仔乐队成员小胡（右一）齐齐食饭庆祝柳俊江（左二）生日。议员的生活圈子都可以好阔！

 

收威胁信
度桥变谈心，据知陈淑庄对MASTAMIC颇有好感，不过未够30岁的马米原来撇女经验丰富，与只拍过3次拖的陈淑庄相比，简直系食女高手。「马米识rap，把口又啷过油，未多人识之前已经有大把女埋身，家叫做有少少名气，就更加多女主动送上门！其实佢花心已经出晒名，而且次次都搞到好唔愉快收场，唔只一个前度send过email威胁要爆佢大镬，试过炸爆佢电邮留言『你试吓再红啲吖，我实爆晒你啲衰嘢出嚟！』」大把手尾跟，都够胆继续出去玩， 全因MASTAMIC与正印Kathy的关系原来极之低调，只有几个密友知情；加上Kathy的对外身份，只是MASTAMIC的经理人，平时出面帮男友接骚倾价，所以恋情未被察觉。

陈淑庄：唔会避忌
「其实马米有冇同Tanya交代清楚自己有冇女朋友，冇人知㖞！佢要扮single都唔奇啦！」MASTAMIC身边人透露。差少少变小三，陈淑庄本周一（30日）在电话中回应，表示与MASTAMIC只系朋友。「佢系一个好有心、好有talent嘅年轻人，我哋有见面，不过我同其他班底成员都有见！（知唔知佢有女朋友？介唔介意姊弟恋？）我知，但我唔识佢！我谂佢女朋友都唔信佢会揾个可以叫auntie嘅人啩！（怕唔怕俾人话你做小三？）我哋唔系合唱情歌㖞！我唔会因为佢有女朋友而避忌啲咩，我哋都系喺大庭广众倾，为创作而做嘢，好应该啫！」而MASTAMIC正印Kathy则放紧大假冇返艺穗会，电话亦飞落留言，截稿前仍未回复。

盛女爱百变

自爆选港姐
08年9月接受郑经翰访问，Tanya自爆曾经参加过92年香港小姐的首轮面试，可惜最后未能入围，当年冠军系李克勤老婆卢淑仪（小图）。

长情厨房男
陈淑庄与大佢16年的英雄哥丛铁飞（小图），拍拖期间sweet到漏，经常连体出现，可惜两年前分手后冇再联络。拍足8年甩拖，Tanya等两年先揾第二春，唔通仲未放低？ ####


为咗下月举行的talk骚，陈淑庄着晒戏服同MASTAMIC一齐rap，律师也疯狂。


MASTAMIC在自己个video blog入面，拍咗段片宣传talk骚。咁帮手，难怪身边嘅Tanya笑得咁冧！


正印眼火爆


同居窦


匿埋队酒 1/4 地点：九展陈淑庄亲自现身捧MASTAMIC场，仲带咗3支红酒互队，两个一路听歌一路劈红酒，有rock星有酒精，唔high至奇啦！


上月13号，Tanya离开立法会后，即刻去IFC会合梁栢坚，两人一见面即倾到笑晒口，好啱key咁㖞！


13/4 潮词人尊贵议员唔介意痞街边队啤，饮之前仲同成脚纹身嘅梁栢坚碰晒杯，两个倾到八点天黑都唔愿走。


12/4 西装男 约梁栢坚前一晚，Tanya又同另一个西装男行街，真系唔愁冇仔陪啦！


撑晒 Tanya上月12号举行talk骚记招，MASTAMIC都有现身撑场。《苹果日报》图片


新rap星钟意rap爆政府丑事嘅MASTAMIC，09年出道，年初同关楚耀合唱嘅政治歌〈占领〉被网友狂赞，而佢上年创作嘅歌曲〈小人〉，当中有句「Fxxk You」，激爆！


改词王梁栢坚曾为周国贤、C AllStar等作词，但最出位系将Eason同千嬅名曲〈富士山下〉及〈可惜我是水瓶座〉恶搞为〈富士康下〉同〈可惜我是金牛座〉。


Tanya曾经参与多个幕前演出，两年前曾演出过政治舞台剧《东宫西宫》，又曾扮过Lady Gaga（右），非常玩得！


‘07长 发
07年仲同英雄哥拍紧拖，Tanya仲留住把长发，好有女人味。
《苹果日报》图片


‘10剪短戴con
回复单身后，Tanya将留咗多年嘅长发剪短，又改戴隐形眼镜，当时连战友余若薇都认佢唔出！《苹果日报》图片


‘12淡 妆
踏入女人四十，Tanya日前现身反对「网络23条」时以超淡妆见人，虽然个样唔系太大分别，但对眼似乎细咗啲㖞！《苹果日报》图片



相关文章