单身男女最佳出Pool胜地？原来酒吧都只系得第六名咋！
只差一点点，即可再会面
问世间情是何物？直教生死相许！也许相爱很难，但其实双方各有各寄望怎么办？爱情，千百年来人类共同面对嘅永恒问题：到底我哋点先可以出到Pool？真系街里爱人一对对，睇见都眼冤！有咩惨得过，当身边嘅朋友一个一个都有伴侣，得返自己无人要，平日都系可以宅系屋企无嘢做？或者仲会俾人哋笑自己系毒男剩女，好似成个社会都睇唔起单身人士咁！搞到单身人士，个个人心惶惶，争住去物色对象，但单身咁耐又无从入手。今日就等DailyView细数十大最佳出Pool胜地，等大家都知去边到沟仔沟女喇！
DV小教室：网路温度计透过《KEYPO大数据关键引擎》，观测、爬梳港澳地区近万个网站、频道，其中包括新闻频道、各大讨论区、FB、IG以及Blog，从中取得资料样本数，并以AI语意程式作数据分析。「网路热度」为主题项目相关的网路posts和comments ，数值愈大代表主题项目的讨论度愈高。
10 交通工具（133笔）
——十面埋伏
黄伟文〈十面埋伏〉，写出咗香港人喺都市交通嘅忙碌之间，对爱情嘅永恒追求。「迟两秒／搭上地下铁／能与你碰上么？／如提前／十步入电梯／谁又被错过？」香港人，有几多爱情故事喺交通工具入面发生？可能喺我哋日日返工返学、放工放学都要坐嘅巴士、火车同埋地铁，又见返相同嘅人，可能一早已经一见钟情，又可能系因为日日见面而日久生情。如果我哋鼓起勇气讲一声，你好，早晨，又见到你喇！或者喺一个下雨天，你有遮，但佢无，呢个可能就系一段爱情嘅起始。
image source:
9 义工场所（137笔）
——好心好报
如果你单身，又冇做过义工嘅话，就不妨去做吓善事喇！皆因根据好多出Pool嘅网民讲，佢哋都系做义工果阵识到男女朋友。拍拖最紧要系咩？NONONO，并唔系外表，最紧要都系性格好，大家相处舒服，先系最开心嘅。咁做得义工，为咗人地付出时间、血汗，心地咁好，已经符合咗伴侣最关键嘅条件喇！你又谂谂，如果你做埋佢哋其中一分子，唔单止可以改善自己，做个好人，又可以识到其他心地好嘅异性，真系一箭双雕！咁著数嘅事，单身嘅朋友记得得闲去做吓义工喇！
image source:
8 婚礼（184笔）
——见证爱情幸福
讲到要识异性出Pool，好多人都会忽略咗一个地方，就系婚礼喇！你可能会讲，人哋结婚咁放闪咁幸福，我去参加咪得个恨字，又点会对我有帮助呢？老老实实，你咁谂就真系大错特错喇！首先，天下间幸福嘅出双入对嘅，并唔系大多数，好多参加婚礼嘅朋友都系单身嘅。而当佢哋见到婚礼新郞新娘咁鬼开心，自己当然都会好恨有呢种咁幸福嘅未来喇！喺呢个咁令人心动嘅时刻，沟仔沟女真系特别容易。喺婚礼识到异性朋友，好可能大家心目中都期待，下一个婚礼自己就系幸福嘅主角。
image source:
7 教会（189笔）
——有共同信仰
由小学到大学，成日都听到一个讲法，就系要出Pool嘅话，最好嘅地方都系去教会喇！吓，但系我个人系无宗教信仰㖞，点去得？其实，好多教会都唔系要你已经信咗教先去得嘅，因为教会系畀个地方，等你有机会接触信仰，所以照去系无妨。返得教会嘅，多数人都心地好好，与人为善，仲会乐意同你沟通。好多返教会嘅朋友，唔少都系单身人士，去得多，沟仔沟女机会自然都多喇。话唔定，你到时都会信埋教，有埋共同精神信仰，同教会嘅异性朋友多嘢讲，做伴侣自然水到渠成，得咗！
image source:
6 酒吧（357笔）
——派对动物
酒吧，一个灯火昏暗，播送令人意乱情迷嘅音乐，加埋酒精，自然成个人都好Chill喇！去得酒吧，打算都系为咗轻松吓，饮返杯酒，个人都会比平时更乐意同陌生人倾计。所以好多人都话，要沟仔沟女，落吓酒吧玩，实无错嘅。落到去，其实大家都心照系为咗识异性朋友，只要你识讲返几句笑话，份人大大方方，主动走埋去同对方倾吓计，女嘅赞吓对方，男嘅请对方饮杯嘢。如无意外，你嘅爱情故事就要喺酒吧开始！细细个阿妈话酒能乱性，唔好饮咁多，但大个咗，就知道饮酒都未必系件坏事。
image source:
5 Speed Dating（432笔）
——快、狠、准
Speed Dating，中文名叫做「快速约会」，目的系为咗鼓励单身男女喺短时间内同大量嘅陌生人见面，以量取胜，最终快速咁揾到最啱自己嘅恋爱对象。如果你有睇过《欲望都市》（Sex and the City），对呢种新兴嘅约会方式，相信都唔会陌生。而家香港都有唔同嘅组织搞Speed Dating，相当受欢迎，周不时都会有传媒访问。喺餐厅入面，每一对男女有短暂嘅时间，令对方留低印象，不断咁重复，到最后再留低联络方法畀意中人。咁快速、有效嘅约会，绝啱哂忙碌嘅香港人，绝不浪费时间！
image source:
4 相睇（600笔）
——亲友介绍
相对Speed Dating嘅大量、快速咁见好多陌生人，相睇呢种方法就传统得多喇！相睇，讲嘅系男女双方由亲友或媒人介绍，互相见面交流，目的系希望确立恋爱同婚姻关系嘅一种形式。到咗适婚年龄，好多父母都好惊自己仔女揾唔到合适嘅另一半，于是希望介绍自己认识嘅后生男女，畀自己仔女，好多后生仔女都觉得咁样好老土，其实谂深层，都系等于识朋友嘅朋友咁，无咩奇怪。而且父母介绍得，至少都过咗佢哋果关，认为门当户对系高质嘅，实际上呢种方式，都真系令好多人走上幸福之路㖞。
image source:
3 兴趣班（609笔）
——一齐开心
揾情人点样先可以长久？紧系要有共同兴趣喇！如果无共同兴趣，日日都系行街、睇电影，好快就会闷到无嘢做。到时先开始揾共同兴趣，就真系再慢。所以好多人都会谂，咁不如先从有共同兴趣嘅人著手，咁段关系咁一定会长长久久啰！钟意运动嘅，咪去参加运动嘅兴趣班，好似健身呀单车呀。想静态少少，又可以捉吓棋，饮吓茶咁。兴趣班咁多异性，一齐合作，一齐做同一件事，自然大把机会沟通。就算识唔到男女朋友，多样兴趣都系好事，之后沟仔沟女都多个话题喇！咁正，仲唔去报名？
image source:
2 网路世界（1614笔）
——柏拉图式恋爱
人世间最遥远嘅距离，唔系你喺我身边，而系你喺我附近但对我视而不见。爱情，最重要并唔系肉体面对面嘅接触，心灵上嘅精神交流，先系最关键。现代人谈恋爱，好多时都只系止于肉欲，所谓精神恋爱，好似已经唔存在喇。不过，其实现代网路世界嘅网恋，就相当柏拉图喇。大家可能分隔两地，根本未见过面，但因为网路世界精神上嘅相遇，两个人恋爱拍拖。呢种网路世界嘅爱情故仔，唔少都甚至走到大家见面、结婚，最后白头到老。只要有心，而家打开你部手机上网，随时都可以出Pool。
image source:
1 学校（2533笔）
——人生必经阶段
其实，讲到人生最佳出Pool嘅地方，咪正正系大家都一定去过嘅学校啰！中学生应否谈恋爱？好多网民都话，紧系应该喇！因为喺学校谈恋爱，先系真正最不计名利，最单纯无邪嘅爱情关系。大学呢个最后阶段，都大把人争住出Pool，亦都造就咗无数情侣。如果你已经大学毕业，又未成功出Pool，都不妨试吓返去读个Master，多次机会喺校园结识异性朋友。唔怪得有人会话，钱我就大把，我要初恋呀！初恋最多嘅胜地，就紧系校园生活喇，所以咪咁多网民讲出Pool地方系学校做第一名，真系实至名归！
image source:
分析说明：
本研究资料由《KEYPO大数据关键引擎》提供，分析时间范围为2018年11月09日至2019年11月08日。
网路大数据系统观测港澳地区上万个网站频道，包括新闻频道、Facebook、Instagram及各大讨论区、BLOG等，针对讨论『网民热议十大交友胜地』相关文本进行分析，并根据网友就该议题之讨论，作为本分析依据。
本文分析之结果，非参考投票、民调、网路问卷等资料，名次仅代表网路讨论热度大小，不代表网友正负评价。
推荐文章︰
十大台湾必去私房秘境，你又识得几多个？
都是「乘客习惯」造成的！ 已有3家航空公司撤下机上座前萤幕
