口罩2盒thx／你屋企够唔够？香港人疯抢十大日用品
香港人，自救！
如果有经历过2003年沙士爆发，2020年嘅香港，悲惨情况仲要比起之前更加可怕。香港，到底会唔会变成疫埠？香港，再咁样落去，会唔会有社区爆发？肺炎病毒咁劲，做为一个小市民唯有尽力自保，采购物资等自己唔好中招。喺呢种心态之下，香港各种同抗疫有关无关嘅日常用品，都一一俾香港人抢购一空。今时今日，做香港人除咗自救，真系无咩人可以帮到自己。到底有几灰？今日就等DailyView用网路大数据话你知，十大缺货嘅日常用品系边几种喇！
DV小教室：网路温度计透过《KEYPO大数据关键引擎》，观测、爬梳港澳地区近万个网站、频道，其中包括新闻频道、各大讨论区、FB、IG以及Blog，从中取得资料样本数，并以AI语意程式作数据分析。「网路热度」为主题项目相关的网路posts和comments ，数值愈大代表主题项目的讨论度愈高。
NO.10 空气清新机（215笔）
空气清新机，到底系咪真系对防疫有效？有专家话，其实空气清新机放喺屋企看门口，系真系有效嘅。空气清新机，除咗净化环境有呢个效用，其实都可以有效过滤咗带有细菌病毒嘅飞沫，同埋有机微生物，咁样自然有防疫功效。空气清新机平时对空气流通都有用，无论咩病都好，唔患就最安全。今时今日，边有人仲敢去睇病呀！
网民：「虽然一部都几贵，但为咗安全都要买返部！」
image source:FB/SHARP HK • 用心生活
NO.9 湿纸巾（468笔）
出街、看门口，最方便唔系咩药水、酒精，皆因湿纸巾先系最方便有用。随时随地，湿纸巾都可以用嚟抹嘢，又可以洗手，食嘢前后一张就有晒效。但系，湿纸巾都要睇返成份，如果只系单纯湿纸巾，无酒精消毒效果，就千其唔好用喇。香港人要买嘅，一定要注明具消毒效果，咁先可以有效杀死病毒。而家，呢种湿纸巾已经相当珍贵。
网民：「屋企堆湿纸巾贵重过黄金，唔可以乱用。」
image source:FB/莎拉韩情 사라한정
NO.8 消毒药水（489笔）
消毒药水、消毒酒精、消毒咩咩咩⋯⋯到底有咩分别？消毒药水同其他唔同嘅，就系佢主要系用嚟消毒地板、衣物、洗手间同玩具咁，仲可以用嚟对伤口用，消毒伤口唔会再进一步恶化。不过早前外国疯传滴露可消灭冠状病毒，令到好多人都抢购一空。而家已经有医生话，消毒药水对冠状病毒无特别大嘅作用，睇嚟大家可以唔买咁多。
网民：「总之见到有消毒都买咗先，实无死。」
image source:FB/Pricerite
NO.7 消毒酒精（651笔）
消毒酒精有几work？万用！洗手得，家居清洁得，真系消毒万用佳品。不过，消毒酒精都有分75％同95％，两者相差20％，但消毒效果就好唔同。台湾网路红人理科太太讲，95％太高浓度，反而唔啱用嚟消毒，但可以用清水嚟沟3：1，就有返75％嘅消毒效果。大家如果买唔到75％，其实都可以买 95％沟淡，咁就又有得消毒喇！
网民：「而家随时都有致命病毒，消毒酒精真心有用。」
image source:FB/轮胎城重型机车新庄店 Motor Rental Town
NO.6 洗手液（913笔）
洗手液，虽然无搓手液干洗手咁方便，但用系屋企平时出入洗手，就好啱用喇。佢嘅份量、价钱都比搓手液CP值高，难怪大家都去抢购，今时今日，已经买少见少，俾香港人全部都抢购一空。其实无论有冇病毒，多洗手，洗足三十秒，就一定系好事。董太当年都有讲：「千祈千祈千祈、洗手洗手洗手」。大家而家都紧记呢句话呀！
网民：「我都想买洗手液，有边个知边到仲有？」
image source:FB/彩丰行 Choi Fung Hong
NO.5 漂白水（1015笔）
家居消毒最有用，就紧系漂白水喇！漂白水可以1:99稀释家用漂白水（以10毫升漂白水混和于1公升清水内），可用于一般家居清洁；1:49稀释家用漂白水（以10毫升漂白水混和于0.5公升清水内），可用于消毒染有呕吐物、排泄物、分泌物或血液嘅表面或物件。漂白水咁好用，香港人紧系狂买，自己屋企消毒做得好，至少可以好好咁休息。
网民：「屋企平时都有用开漂白水，唔系都唔知点买。」
image source:FB/Marigold Hong Kong 菊花牌手套
NO.4 搓手液（2462笔）
肺炎可以透过飞抹传播，咁飞抹呢，系可以粘喺物件嘅。我哋就算有口罩，喺出面食饭，可能会经由只手就接触整到眼或者口，都有机会中招。咁可以系街外边随时随地帮自己只手消毒，就相当重要喇！搓手液可以干洗手，又细细支咁，真系好方便，而且医生都话有效。唔怪得全香港人个个都想有一支，真系消毒消得好，生命可到老。
网民：「真系好有用，始终好多人都要出街食饭，消毒防身保命。」
image source:FB/Yahoo 购物
NO.3 厕纸（2886笔）
香港奇闻，就系前排香港人抢购厕纸喇！话说呢单嘢，系嚟自Whatsapp群组流传一段神秘但听落好有公信力嘅录音，话香港厕纸嘅供应商即将停工。但事实系，网民Fact check发现供应厕纸嘅生产商嚟自台湾，佢哋都无讲过会停止供应。不过好多香港人都信以为真，一于买定先实无死，结果好多好多人都要抢。不过唔紧要，厕纸实会返货。
网民：「香港人真系好悲哀，估唔到连厕纸都抢，醒少少！」
image source:FB/流氓小编
NO.2 柴米油盐（3070笔）
柴米油盐，系衣食住行之中最重要嘅一样嘢，无咗嘢食好多人都无方法系屋企生存落去！呢个正正系点解咁多人抢购柴米油盐嘅原因。如果香港人总有一日会无晒口罩可以用，咁最安全嘅方法，当然系足不出户，自闭系屋企喇。虽然呢个方法唔系长久之计，但总好过咩都无。所以当我哋见到有去买成堆柴米油盐，唔好笑佢哋，有原因嘅。
网民：「柴米油盐都无晒，几时先会返货，等我即刻去买。」
image source:FB/热点 Hotspot
NO.1 口罩（102890笔）
香港网路上而家出现咗好多同口罩相关嘅专业用词，好似有冇PFE、VFE、BFE等等，其中有一个好笑嘅，就系2盒唔该。点解咁好笑？因为只要网路上有人话有多嘅口罩，又或者有好心人话有秘密方法可以帮手订购，即刻就会有堆留言话要几盒。香港人排生排死咁辛苦，食埋炒价都买唔到口罩，见住屋企存货就嚟无晒，唯有见咩都话要咗先喇。
网民：「真心灰，一家四口得返十几个，成家都好绝望！」
image source:FB/怪叔叔の散步道
【香港网路温度计调查结果之图文，未经授权请勿转载、改写】
分析说明：
本研究资料由《KEYPO大数据关键引擎》提供，分析时间范围为2020年01月10日至2020年02月08日。
网路大数据系统观测港澳地区上万个网站频道，包括新闻频道、Facebook、Instagram及各大讨论区、BLOG等，针对讨论『十大香港买不到的用品』相关文本进行分析，并根据网友就该议题之讨论，作为本分析依据。
本文分析之结果，非参考投票、民调、网路问卷等资料，名次仅代表网路讨论热度大小，不代表网友正负评价。
推荐文章︰
2019回顾／男人嘅浪漫，十大热门PS4游戏
唔只买唔到口罩！武汉肺炎杀埋身 十大最影响生活嘅事
