【史高治叔叔】唔可以沉迷但一定要识　阿女18岁要学识呢件事

又到年尾，史高治开始多聚餐，通常都系啲客人邀请，聚餐上，点可以缺少红酒呢？记得史高治初出茅庐之时，对红酒系一窍不通，不过经过咁多年都识啲皮毛，可以同人哋倾吓红酒。

葡萄酒出产地分为新世界同旧世界，旧世界系有过千年酿酒历史嘅地方，包括法国、西班牙、意大利、德国、匈牙利等，而新世界就系大概有100多年酿酒历史，包括美国、智利、阿根廷、纽西兰、澳洲等。旧世界葡萄酒口味浓厚丰富，重视土壤系适合种边一种葡萄，而新世界就比较重视果香，价格亦比较相宜，所以几受饮酒新手欢迎。

记得以前饮酒，史高治觉得好似款款都差唔多，不过饮得多啲，开始都知咩叫好酒。而众所周知，摄取过多酒精系有害，所以一定要学识点分红酒，到宜家见到好酒，先会饮多两啖，否则就做个样拎杯酒摇吓就算。简单咁讲，一定能够吸引史高治饮嘅必然系五大酒庄嘅酒。五大酒庄系1855年巴黎万国博览会期间，拿破仑三世要波尔多产区中嘅梅铎次产区实施酒厂分级，当时嘅五百家酒庄就依日照、土壤等因素分为五级，当时只有四间名列第一级，为拉菲酒庄（Chateau Lafite Rothschild）、拉图酒庄（Chateau Latour）、玛歌酒庄（Chateau Margaux）和侯伯王酒庄（Chateau Haut-Brion），后来到1973年，木桐酒庄（Chateau Mouton Rothschild）晋升为一级酒庄，于是今天就有「五大酒庄」。

可以嘅话，就尽量记住五大酒庄啲名。不过，记得五大酒庄都未够，因为五大酒庄都有副牌酒，即系品质最好、最知名嘅先系正牌酒，价格当然系万万声，仲会有人买嚟投资。副牌酒就系逊色一啲，因为会有啲葡萄品质唔够好去酿成正牌酒，就会酿成副牌酒。所以，唔好见到Lafite就双眼发光，如果系超市见到百几蚊就有，你就会知道十成十都系副牌酒，品质完全唔及正牌酒。万一惊自己唔认得，都认吓Grand Cru Classé呢一行法文，因为只有波尔多先可以系Grand Cru Classé嘅产酒区，最高级就系Premier Grand Cru Classé。但系要记住系Grand Cru Classé先系有列级，而唔系Grand Cru，因为Grand Cru系无列级嘅。

如果真系想饮吓好酒但budget有限，可以考虑吓单公仔红酒（Chateau d'Armailhac），个样好易认，有一个人仔，香港人钟意叫佢「单公仔」。呢间Chateau d'Armailhac喺2001年俾一级酒庄Chateau Mouton Rothschild收购咗，投入多咗资金，又有经验丰富嘅酿酒团队帮助，所以可以平民化价格买到，品质都真系算唔错。如果买到2008同2009年，味道就更好。之前，想俾个朋友试吓单公仔，不过史高治临急临忙，剩系买到枝2011年，呢个年份就差啲，即管同朋友试吓差几多啦。