只系用家问题？十大苹果更新可能出现嘅崩溃情况！

iOS 13，正爆功能

Apple喺香港时间9月20号释出咗iOS 13嘅正式版，吸引咗好多人即刻更新，抢先试用新功能！而DailyView今日就根据今次Apple开新功能用网路大数据做咗个调查。最受欢迎嘅第一名非深色模式莫属喇，可以悭到电之余，好多app都可以变成全黑，例如Instagram，令到好多果粉都即刻抢住update啊！而第二则系Memoji，可以自己D.I.Y专属你嘅表情符号，依家网民已经可以玩到出神入化㗎喇，你跟上未呢？第三，「捷径」app亦已经变成内置app，用家喺桌面一按就用到，仲支援多步动作设定。第四，音量调节显示改善咗，由本身侧边直线显示，变做顶部显示，更加方便用户睇到变化。最后，新加嘅影片剪辑嘅功能，功能同相片编辑一样，仲可以旋转影片浏览方向，劲方便！

每次都急住更新，但更新完都令到你后悔？

正所谓针无两头利，今次Apple嘅大型更新，由iOS 12 update 到iOS 13，当然都会伴随唔少用家反映更新嘅问题。今时今日，如果你仲未正式走入iOS 13嘅潮流尖端，好可能你都担心紧更新嘅iPhone危机，仲观察紧用家情况。不过大家讲法都好唔同，有人话根本无事好快好顺，快快手更新；又有人讲，更新完之后部机Lag到用唔到。到底现实系点样呢？空穴来风，未必无因。DailyView今次就用网路大数据调查咗10大每次更新iOS会令人崩溃嘅事，你今次更新完又有冇共鸣呢？

DV小教室：网路温度计透过《KEYPO大数据关键引擎》，观测、爬梳港澳地区近万个网站、频道，其中包括新闻频道、各大讨论区、FB、IG以及Blog，从中取得资料样本数，并以AI语意程式作数据分析。「网路热度」为主题项目相关的网路posts和comments ，数值愈大代表主题项目的讨论度愈高。

10 旧App不被支援（137笔）

——可能要删咗佢喇

Apple今次由由iOS 12 update到iOS 13，真系一个史上系统嘅大更新，改变咗原本iOS 12好多地方。而喺众多更新问题之中，有一件事其实系同iOS 13并无关系，认真无奈。皆因不论咩系统嘅大型更新，好似由window 7到window 8咁，就会有好多原本同旧系统相容嘅软体发生问题，即系话，新嘅系统已经唔再支援已经无再更新嘅软体。iOS 13都一样，可能唔少用家平时用开嘅旧App，可能已经不再被iOS 13支援，更甚者App开发者都无再打算更新，呢个问题真系无得解决。

image source:

9 更新失败（163笔）

——令人崩溃嘅白苹果

Apple更新失败，好容易会卡住，进入俗称「白苹果」嘅现象。所谓「白苹果」现象，即系当iOS系统出现软、硬体嘅故障，卡住咗喺一个类似于启动画面，无法正常进入手机系统，无法使用手机，以及任何操作嘅一种奇妙状态。再直接咁讲，即系部手机死咗机。虽然网路上好多文章都有提供「白苹果」嘅方法，但相信各种方法都未必咁顺利成功，好可能要用户自己去实体店揾帮手。为咗一次更新，要花咁多时间，同埋担心嘅精力，似乎就相当无奈，大家记住要小心唔好中断更新。

image source:

8 Face／Touch ID无法使用（179笔）

——次次都要打密码

Apple自从推出咗Face ID解锁功能，一直致力改善面部解锁嘅应用功能，而今次iOS 13 就话会令Face ID脸部解锁速度提升30%，真系快过用Touch ID。话时话，Apple呢两个功能，真系走得好前，亦都好方便用家使用，绝对系领先各大手机嘅实力表现。不过呢，又有用家表示，话更新咗iOS 13之后来，无论Touch ID又好，Face ID都好，两者都用唔到。结果要次次都用密码开手机，咁烦仲点样有生活态度先？iPhone无咗呢两种功能，已经唔系一部iPhone喇！

image source:

7 系咁Lag机（258笔）

——每三秒卡一秒

iPhone最优胜其他手机嘅地方系边？三个字，顺畅啰。好多iPhone爱好者都话，用得iPhone，就唔怕佢会Lag机。皆因用得耐用得多咩咩咩各种原因，令到部机Lag咗，慢咗，成日轻机，都唔会喺iPhone出现。可惜嘅系，有唔少用家都讲，更新咗之后部机竟然Lag过未更新之前，今次真系中伏喇！唔系话，今次更新咗之后，部iPhone理应快过之前？有网民讲笑咁话，而家每三秒卡一秒，真去返以前啱啱有智能手机咁。56K以前就够用，而家用开咗4G，仲点样忍受返咁慢嘅手机？

image source:

6 来电无咗铃声（272笔）

——手机形同灭声

香港人怕讲错嘢，唔出声，就成日都有，点估到手机更新咗之后，都识自我审查，无咗来电铃声㖞！iPhone更新上咗iOS 13，就有用户表示，话人哋打电来过嚟，已经再听唔到电话聆声喇。唔系搞咗静音，而系系统自动熄咗来电铃声。哇，香港人好多都分分钟几百万上落，一个唔小心因为无咗来电聆声，听唔到一个重要嘅电话，损失嘅可以成千上万咁计。又有好多妈妈级用家，放咗部手机入手袋，无聆声嘅话，真系随时听唔到阿仔阿女嘅电话，呢种情况，影响真系可大可小。

image source:

5 弹App（331笔）

——最后关头先弹App

讲到当今低头族最憎遇到嘅手机故障，相信莫过于弹App喇！皆因弹App代表住嘅，系用户之前所花嘅心血，可能白白浪费，真系存档都死清光！好似你开咗App出嚟打笔记，啱啱记低咗自己谂到咁发达大计，谂住今次实可以谷底翻身喇。点知弹咗App，咩都无哂。或者唔好讲到咁远，单系你玩紧一只紧张刺激嘅手机Game，正当你同对手打到最后一分一秒，眼见自己已经差唔多胜出之际，突然就弹咗App。当你再开返只Game，见到自己输咗，呢种心痛，真系令人崩溃。

image source:

4 无法连上4G／WIFI（428笔）

——同旧砖有咩分别？

智能手机最惊发生咩事？就系智能手机，无哂智能啰！咁点解一部智能手机会无哂智能先？最直接嘅答案，系因为呢部手机上唔到网！有iPhone用户话更新咗iOS13之后，竟然连唔上网路，部手机九成嘅功能即刻废咗。大佬，今时今日手机主要已经唔系用嚟打电话。上网、吹水、煲剧、打机等等，有边样嘢唔需要用到网路？有网民话，上唔到网嘅iPhone，同旧砖根本无任何分别。现代人嘅食物金字塔，已经由食物变咗做网路，无得随时随地上网，对好多人嚟讲真系惨过死。

image source:

3 速度变慢（599笔）

——认真慢过蜗牛

当我睇嘢愈嚟愈慢，我就知道自己其实愈嚟愈快。唔讲，好多iPhone用户都以为自己系《头文字D》入面主角，皆因佢哋好多人都话，自从更新咗iOS 13之后，自己睇嘢就开始愈嚟愈慢。咁当然唔系因为佢哋愈嚟愈快喇，而系因为佢哋手上部iPhone真系变慢咗唔少，连打个WhatsApp，打几个字，可能都要用上比之一倍以上嘅时间。人呢，由慢入快就好开心嘅，但当由快变返慢，就好难习惯。香港人，咩都讲个快字，咩都要有效率，咁慢嘅手机，随时忍唔住整爆佢。

image source:

2 iPhone发热（804笔）

——热到死埋机

好多iPhone用户好相信自己部机嘅效能，同时开住好多App使用，又可能播埋歌，玩住高画质嘅手机游戏，随时会令到部手机发热。iPhone用得耐，开咁多嘢，部手机热过平时，都好正常。不过，你有冇谂过，部iPhone正常嘅使用，都随时会热过未更新之前？好多用户都反映，话iPhone更新咗之后，热到烫手，甚至热到部iPhone话弹咗个画面出嚟，话要休息吓先可以再用。以前就有人讲「烫手山芋」，今时今日，可能就要转个讲法，变做「烫手iPhone」喇！

image source:

1 iPhone耗电快（849笔）

——2分钟掉1%

今次iPhone用户更新iOS 13最大嘅不满，就系更新完之后，功能的确系好过之前，但系呢，耗电嘅速度快过之前好多！一部机再劲，但佢唔持久，又有咩用呢？而家出门口，部智能手机随时要连续咁用四、五粒钟，无论喺等车、坐车、返学上堂、返工偷懒、瞓唔著开住手机上网等等，都讲求部机用得耐。唔通部机咁鬼废，要随时随地都成日插住个尿袋咁用咩？尿袋第一重，第二唔方便，第三唔型。用得iPhone，就有潇洒嘅生活态度。耗电咁快，拖泥带水，仲点样叫做iPhone用家？