换个舞台一样咁成功！十大运动员转型艺人你识几多个？

体坛下一站：演艺舞台

运动员同明星有一个共通点：一样都系公众人物。只不过明星嘅舞台系大银幕、电视、杂志，而运动员嘅舞台就系奥运同各个运动赛事上。唔少本身外表比较出众，又或者有一定人气嘅运动员退役之后都会成为艺人，开拓事业另一条路。今日DailyView用网路大数据带大家一齐睇吓讨论度最高嘅十个运动员转型艺人成功例子有边个啦～

DV小教室：网路温度计透过《KEYPO大数据关键引擎》，观测、爬梳港澳地区近万个网站、频道，其中包括新闻频道、各大讨论区、FB、IG以及Blog，从中取得资料样本数，并以AI语意程式作数据分析。「网路热度」为主题项目相关的网路posts和comments ，数值愈大代表主题项目的讨论度愈高。

10 司徒瑞祈（320笔）

司徒瑞祈爸爸系国际游泳裁判姐姐又系前港队成员出身自由泳世家，仲系方力申嘅师弟。10岁就已经代表香港出赛，后来机缘巧合加入演艺圈，健康阳光男孩嘅形象令佢有机会参与拍摄当时好红嘅剧集《赤沙印记@四叶草2》。之后都有参与好多大家耳熟能详嘅剧集包括《老表你好Hea》等，几年前慢慢退出娱乐圈，创业卖小食，再闯另一片天～

image source:Facebook/2011香港公开冬泳锦标赛

9 杨文蔚（625笔）

1994年出世嘅杨文蔚年纪轻轻就已经系香港女子跳高纪录保持者，更加系香港第一位全职跳高女运动员。大家应该对佢唔陌生，因为除咗运动员身分之外，佢本身仲系一位模特儿，所以大家应该都曾经喺唔同嘅广告上面见过佢㗎啦。多次打破个人纪录同香港纪录，令佢之前受到好多关注，外表甜美乐观散发正能量嘅性格好受大家欢迎。

image source:Facebook/ 杨文蔚 Cecilia Yeung

8 梁汉文（3127笔）

唔讲都唔知，入咗行已经超过30年嘅梁汉文原来曾经系香港足球代表队嘅青年军，舅父尹志强仲系香港足球代表队已故球员。五岁开始踢波，16岁就入选香港代表队青年军，细个嘅时候一路都好专注参与足球运动，不过后来因为钟意唱歌后尾参加新秀歌唱比赛而入行。虽然最后冇成为足球员，不过成功入行做歌手，都实现咗自己另一个理想啦！

image source:Facebook/梁汉文 Edmond Leung

7 欧铠淳（3381笔）

年仅16岁就代表香港参加2008北京奥运，虽然冇得到奖牌，不过都打破咗两项香港捷泳嘅成绩，以奥运呢种大型国际赛事嚟讲，真系非常好嘅表现啦！之后参加好多唔同运动会都攞到唔错嘅成绩，2008年北京奥运之后2次代表香港出战奥运，本身都备战紧东京奥运。喺美国柏克莱大学读书嘅佢成绩好形象好，所以都好受广告商欢迎，有客串电影，亦都曾经担任张敬轩MV女主角。

image source:Facebook/ 欧铠淳 (Stephanie Au)

6 余德丞（3865笔）

余德丞系香港游泳代表队嘅成员，曾经被誉为：方力申同司徒瑞祈嘅接班人。而家加入咗TVB，先后参与过唔同嘅电视剧，由于运动员嘅身份同阳光形象，除咗一般节目嘅主持之外，佢亦都有曾担任好多体育节目嘅主持同埋一啲评述员。2015年游泳锦标赛评述员，同2016里约奥运亦都有担任外景主持，后生有型嘅佢广告作品都唔少㗎。上年颁奖典礼更加得到最佳节目主持，转换跑道发展都几成功呀！

image source:Facebook/ Dickson Yu 余德丞

5 陈建安（4267笔）

当年一首《天梯》唱到街知巷闻，以无伴奏演唱嘅演绎方式令大家留下深刻印象嘅C AllStar，其中一名成员陈健安——安仔，其实系香港系前港队足球员，更加系花式足球嘅创办人。14到18岁系香港足球青年军， 2007到2009年球季更加系香港足球联赛嘅甲组足球员。因为参加一个歌唱比赛入围最后四强而同其他入围者组成组合出道，虽然近年组合活动比较少，不过各自个人发展都几活跃，单飞作品亦有唔错嘅成绩。

image source:Facebook/ On C AllStar

4 何雁诗（5994笔）

第一届超级巨星咁受欢迎，入面嘅参赛者好多后来都成为艺人，何雁诗就系其中一个代表。而佢本身系一名高尔夫球运动员，六岁开始打高尔夫球，10岁加入港队，2010年仲代表香港参加广州亚运高尔夫球项目，虽然细细个就加入港队，不过14岁开始佢都有学习音乐亦都喺伯乐音乐学院完成好多个声乐相关课程。16岁参加超级巨星之后签约TVB，投身演艺事业，除咗音乐作品，都有参与唔少电视剧嘅演出。

image source:Facebook/ Stephanie Ho 何雁诗

3 黄泽锋（8715笔）

黄泽锋喺1987年艺员训练班毕业就加入TVB，喺演艺圈发展咁多年，参演过好多电视剧，而佢可以话系早期运动员转型艺人嘅成功例子。1975年被发掘培育成为运动员，其后亦都有代表香港出战美国赛事，喺香港渡海泳多次夺冠。虽然投身演艺圈，但佢无荒废自己运动细胞，除咗游水之外，黄泽锋系武术方面都唔讲得少。分别拜多位大师、宗师习武，更考获世界武术师范级6段泰拳教练证书、拳证同裁判资格。

image source:Facebook/ 黄泽锋

2 方力申（14805笔）

被称做香港「飞鱼王子」嘅方力申系退役港队游泳代表大家都知啦，曾经拥有九项香港游泳纪录，至今有两项嘅纪录仍然未被打破。15岁去斯里兰卡出赛，后来去美国嘅中学进修并喺当地进行游泳训练，2000年奥运后加入演艺圈，一边读大学一边唱歌一边继续运动员身份，后来退役投身做全职艺人。健康正面形象令佢一出道就吸引大众目光，参演电影同音乐作品都好受欢迎。今个月初小方宣布再战泳坛，参战下年世锦赛，喺到祝小方可以拎到好成绩！

image source:Facebook/ Alex Fong 方力申

1 王嘉尔（15809笔）

就算大家未见过王嘉尔，都可能听过呢个名。出生于运动世家爸爸系中国剑击队成员，亚运夺金，亦都系香港剑击队总教练，而妈妈就系中国体操队成员，王嘉尔作为港队代表，曾经系青年亚洲剑击中排名第一位同埋青少年世界剑击排名11位。当年喺亚洲青年剑击锦标赛夺得亚洲金牌之后，放弃2012伦敦奥运同美国大学嘅录取通知，通过选拔去咗韩国成为练习生后来再以韩团出道，喺好多节目上都有分享运动员经历同表演剑击。