已分唔清楚系戏定真实世界？大数据睇网民至Hit讨论小丑话题！

一部属于经典反派角色——小丑嘅悲剧

改编自DC漫画嘅角色电影《JOKER小丑》自从10月3号喺香港上映之后，可以话系零负评咁滞。无论系喺网上嘅讨论区定系Facebook都可以话系呢个月来话题最高嘅电影，今日DailyView就用网路大数据带大家睇吓大家都讨论紧《JOKER小丑》啲咩啦！

DV小教室：网路温度计透过《KEYPO大数据关键引擎》，观测、爬梳港澳地区近万个网站、频道，其中包括新闻频道、各大讨论区、FB、IG以及Blog，从中取得资料样本数，并以AI语意程式作数据分析。「网路热度」为主题项目相关的网路posts和comments ，数值愈大代表主题项目的讨论度愈高。

image source:《KEYPO大数据关键引擎》

角色原型参考现实杀人犯

大家谂起小丑，都会联想到杀人犯。近呢几年发生唔少无差别杀人事件，无辜嘅受害者固然令人感到惋惜，部分人会觉得好愤怒，认为要判处最重刑罚俾犯案人。不过其实我哋更加要去了解「压倒骆驼最后一根稻草」到底系咩，点解会造成呢D人有呢D行为，都好值得我哋认真思考。

image source:IMDb / Joker

带来社会负面影响、煽动暴力？

小丑电影话题咁贴近现实社会，有人觉得行出戏院仍然好似仲喺套戏入面，令人担心会唔会有人有样学样犯罪，其实类似事件早有前科。2012年美国西部一间影院放映《黑暗骑士：黎明升起》时发生枪击案，用多种枪械行凶，造成12死70伤，所以外国今次都有因为小丑电影而作出相关戒备，以免悲剧再次发生。

image source:IMDb / Joker

反映现实社会议题

点先算做一部成功嘅电影？可以引起观众嘅共鸣、带出背后意义、引发大家思考，以上三点应该都能够成为评分标准之一。而小丑呢套电影，一次带出好多唔同社会问题，揭开现实中存在各种「丑陋」嘅一面。就好似电影中讲到高谭市鼠患严重，卫生环境差，都仿佛系影射紧现实社会早已满目疮痍。

image source:IMDb / Joker

将经典反派英雄化？

大家印象中嘅小丑系一个恶名昭彰大反派，不过今次喺电影入面，被社会弱势捧做英雄。有网友就觉得将小丑英雄化，掩饰咗本身犯罪行为。违反法律固然有错，但同时都应该要反思，点解每次等到酿成悲剧，大家先正视问题？小丑唔只系一个个体，而系代表一班社会低层。种种极端、犯罪行为都系对世界无助嘅呐喊。小丑一直努力做一个正常人都不被尊重，直到杀人之后，反而被誉为所谓英雄，社会亦终于愿意注视佢。面具下可以系任何人，如果我哋视而不见，社会上只会出现更多小丑。

image source:IMDb / Joker

历年小丑边个得观众欢心

要演出一个咁经典嘅反派角色，对演员嚟讲真系一个好大挑战嚟，加上历代饰演小丑嘅演员都好出色，想超越前人就更加难喇。过去饰演过小丑嘅演员，几乎都因为太投入角色而精神饱受折磨，甚至患上忧郁症。有网民开post讨论边一任小丑做得最好，当然每个人心中都各有人选，基本上每一个演员嘅演绎都有独特之处。即使前面已经有深入民心嘅演员，今次饰演小丑嘅Joaquin Phoenix一样好评如潮，完美展示一个人点样一步一步迈向疯狂，精彩又细腻演技令人睇到眼都唔舍得眨。

image source:IMDb / Joker睇完之后你又有冇共鸣？

好多人睇完《JOKER小丑》反思咗好多现今嘅社会问题，唔知你又有冇同感呢？以下DailyView帮大家整理咗电影入面5大引起网民关注嘅社会问题，一齐嚟睇吓啦！

5 社会贫富悬殊问题（121笔）

根据国际调查报告，香港贫富悬殊情况一直喺国际排头位，地少人多环境下，地产商不断起豪宅，同时有唔少人仲逼紧喺㓥房。国际金融中心呢个称号听落风光，喺经济高速发展下，物价持续上升。电影中外面声援示威者一边叫嚣，对比戏院入面有钱人无视出面动乱，事不关己、若无其事继续欣赏《摩登时代》呢套讽刺社会阶级嘅电影。我哋现实生活中何尝又唔系一样咁讽刺呢？

image source:IMDb / Joker

4 霸凌问题（122笔）

霸凌问题由校园到职场都存在，从好多新闻上面，我哋都见识到霸凌行为对于一个人嘅影响可以有几严重。依家大家生活基本上都无办法脱离网络，唔少人觉得喺网上大家唔知自己身分，隔住个萤幕发言就唔洗负责任，于是就出现好多键盘战士不断言语攻击其他人。呢D无形暴力，其实对受害人都系好大打击，就好似前几日发生雪莉自杀事件，又系一个血淋淋例子。

image source:IMDb / Joker

3 虐儿问题（129笔）

电影入面，透露小丑儿时曾经被妈妈虐待，虽然电影中只系轻轻带过，但都会令人联想到小丑所患上不断大笑嘅病，同佢嘅情绪问题会唔会系因为童年被虐嘅经历。其实喺2008到2018年间，香港有超过9000宗虐儿个案呈报，呢个纪录创咗1981年新高。童年阴影大家讲得多，小时候经历嘅事，对一个人以后嘅成长有好大影响，所以呢个议题，绝对好需要关注同去解决。

image source:IMDb / Joker

2 弱势社群缺乏帮助（139笔）

一般提起弱势社群，大家都会谂到老人、单亲、残疾人士等等，电影主角小丑经济拮据，本身有怪病而一直被人取笑、鄙视，喺社会动荡不安嘅时候更被解雇，之后遇到对佢冷嘲热讽嘅华尔街经纪，成为佢爆发嘅导火线。社会入面嘅弱势社群好多时都无能为力去改变现状，好需要大家关心同协助。当然呢个问题，唔系大家去探访，捐钱就能解决，归根究底都需要政府有相应解困措施。

image source:IMDb / Joker

1 情绪/精神病被污名化（525笔）

精神病呢三个字令好多人听到就敬而远之。近年越嚟越多精神病患自杀事件，令大家都慢慢更加正视呢D病。以前听到人哋讲精神病就觉得等于「痴线」，但因为都市人生活压力大令情绪病变得普遍，好彩嘅系呢几年大家开始慢慢去除各种对情绪病嘅歧视，其实精神病唔一定会伤害人，往往系患者自己要承受好大压力同受到精神困扰，如果每个人都对身边人多D关心同体谅，可能就可以悬崖勒马，拉住睇唔开嘅患者。