十二星座边个最神经质？香港人轻松少少喇！
疫情入侵，港人心慌
肺炎入侵全球，专家话情况未见乐观，疫情传播唔知几时先完！香港人喺肺炎开始无耐，已经心知不妙，全城严阵以待，无奈物资唔够，口罩消毒液四围扑，转个头连米呀厕纸呀都无埋。好多人都话，大家都变得愈嚟愈神经质！其实神经质每个人都有，有留意十二星座就知，大家敏感嘅地方都唔同。做人想淡定？一定要对症下药。今日就等DailyView用网路大数据，话你知十二星座神质排行榜，同埋个敏感位系边喇！
DV小教室：网路温度计透过《KEYPO大数据关键引擎》，观测、爬梳港澳地区近万个网站、频道，其中包括新闻频道、各大讨论区、FB、IG以及Blog，从中取得资料样本数，并以AI语意程式作数据分析。「网路热度」为主题项目相关的网路posts和comments ，数值愈大代表主题项目的讨论度愈高。
12 射手座（481笔）
「害怕束缚」，正正系最佳解释，点解射手座有时会神经质嘅理由。射手座天生有一对翼，佢哋好似一句经典台词，有种雀仔天生系无脚嘅，佢哋落地𠮶日，就系佢哋死𠮶阵。当射手座恋爱，佢哋一动真情，就会惊自己失去个人自由，行为忽冷忽热，好鬼矛盾，咪令人话佢哋神经质啰。
温馨提示：「沟通系最好嘅解决方法。」
11 摩羯座（503笔）
「闷骚典范」，如果话巨蟹座系外表热情，但内在冷漠，咁摩羯座就正正系相反，佢哋系外表好cool无嘢讲，但当熟咗之后，就表现出佢哋真性情，随时多嘢讲过你！而佢嘅反差系内在性格，佢哋其实系悲观主义者，成日对人对事都会左谂右谂，甚至负到爆，即系太过敏感。
温馨提示：「有人听你讲已经好正面喇！」
10 白羊座（534笔）
「Mean爆身边人」，有人话白羊座系平时好好地，但当佢哋神经质𠮶阵，就唔系人咁品喇！点解咁讲？因为白羊座通常对人都好唔差，好Nice，但前提系你同佢未熟之前。当你同佢熟咗，做咗好朋友，情人，就会发现佢哋好Mean，成日会笑你，话你咁做唔得，好多时都过咗火，真系好得人惊。
温馨提示：「唔好伤害身边人呀！」
9 金牛座（538笔）
「固执追求」，金牛座出名嘅系佢哋金钱上嘅追求。其实，金牛座唔单止追求金钱咁简单，小朋友先会选择，大人就紧系咩都要晒啦！金牛座想要嘅嘢好多，佢哋同时都付出咗好多努力，努力到太著紧，搞到自己好神经质。不过，有时候努力唔系大晒，太过固执搞到身边人辛苦就唔好啦。
温馨提示：「放下，都系一种智慧。」
8 处女座（543笔）
「凡事挑剔」，喺其他星座眼中，呢四个字嘅形容，正正系处女座嘅特质。其实，呢个只系处女座完美主义，要求事事做到最好，咩都要100分嘅负面呈现。处女座会为咗件事好而情绪紧张，紧张到成日都乱谂嘢，仲会对身边人都要求完美。咁神经质，又难怪其他人会咁大压力，觉得怕怕嘅！
温馨提示：「太过追求完美，咪唔完美啰！」
7 狮子座（550笔）
「超级敏感」，完全能够形容出狮子座谈恋爱嘅特质。身为森林中嘅王中之王，狮子座系人生各个方面，都可谓充满自信，掌握到自己嘅人生方向。但系爱情呢，偏偏系人生最多意外嘅地方。当狮子座一动真情，佢哋就变得好紧张，好怕一切不如计划，结果好多时因为弄巧成拙，好无安全感。
温馨提示：「要相信真爱可以战胜一切！」
6 天秤座（559笔）
「过度压抑」，或者系天秤座嘅人生课题。天秤座型男美女多，已经系人所共知，加埋佢哋爱好美、和谐，为人仁慈，富有同情心，真系善良温和、体贴、沈著嘅代表。不过做人要求太完美，都意味佢哋面对生活有好多压抑，当佢哋压抑到爆，负面情绪就要影响到身边嘅人，俾人话佢哋神经质。
温馨提示：「得闲要放松吓自己压力。」
5 水瓶座（562笔）
「双重性格」，唔系讲二十四个比利𠮶种人格分裂，而系形容紧水瓶座对人对事，成日都会有两极表现。佢哋好嘅一面，系聪明、细腻、完美、光芒四射，相当健谈。但当佢哋心情唔好，就会收埋自己，唔同人哋讲嘢。亦都因为佢哋成日咁有反差，走向极端，就令好多人觉得佢哋神经质喇。
温馨提示：「唔开心都要同人倾诉呀。」
4 天蝎座（566笔）
「天生强迫症」，代表咗天蝎座神经质嘅最佳呈现。天蝎座有好多正面嘅性格，好似专一、可爱、有求必应咁，但佢哋同时间都难顶嘅一面。强迫症系咩？即系不断重复去做唔太重要嘅事，好似出入会好惊自己无熄火，无锁好门，无做好其他嘢咁，呢种紧张性格，令到大家都觉得佢哋神经质。
温馨提示：「其实好多事都系好小事！」
3 双子座（580笔）
「过于早熟」，呢四个字嘅形容，可谓大多双子座嘅相同特质。双子座嘅朋友，通常都好聪明，亦都因为咁，佢哋比其他星座早熟，谂嘅嘢，做嘅嘢都快过同辈。走得咁前，自然要承受好多压力啦。佢哋嘅神经质，精神脆弱，咪就系因为身上太多责任，搞到成日都无时间搞掂所有嘢，好辛苦。
温馨提示：「唔好一个承担所有责任。」
2 双鱼座（619笔）
「FF界代表」，十二星座入面，边个最多内心戏，成日幻想自己悲情嘅遭遇？无错，正正系双鱼座。双鱼座多情、浪漫，同时亦都几不切实际，特别系恋爱方面，总系期待自己系偶像剧嘅男女主角。咁正事实唔系咁，又或者恋情遇上挫折，佢哋反应就好神经质，因为同佢哋嘅FF相当有落差啰！
温馨提示：「爱情都可以细水长流嘅。」
1 巨蟹座（662笔）
「情绪多变」，喺每一篇巨蟹座星座分析都会提到嘅形容词。巨蟹座出名系咩？咪系有睇落好坚固、强硬嘅外壳，但喺呢个伪装入面，其实有一颗好敏感、细腻嘅心啰！巨蟹座平时对外表现好温暖，其实私底下好多时候都会伤春悲秋，好紧张人哋嘅评价，情绪自然起伏不定，令人难以捉摸喇！
温馨提示：「唔好咗唔值得嘅人而伤心！」
【香港网路温度计调查结果之图文，未经授权请勿转载、改写】
分析说明：
本研究资料由《KEYPO大数据关键引擎》提供，分析时间范围为2019年03月08日至2020年03月07日。
网路大数据系统观测港澳地区上万个网站频道，包括新闻频道、Facebook、Instagram及各大讨论区、BLOG等，针对讨论『十二星座神经质排行』相关文本进行分析，并根据网友就该议题之讨论，作为本分析依据。
本文分析之结果，非参考投票、民调、网路问卷等资料，名次仅代表网路讨论热度大小，不代表网友正负评价。
推荐文章︰
康复香港，时代抗疫／十大疫境抽水语录 饭聚集团先第8名！
口罩2盒thx／你屋企够唔够？香港人疯抢十大日用品
