佢呢排几精神，系啱啱发生事𠮶阵差啲，不过阿泽好乐观，医生叫佢多啲冥想，希望快啲出番嚟啦！

一年拍8部戏，39岁杜汶泽狂做挨到残，近日突然患上罕见病「米勒费雪症候群」，严重会全身瘫痪，甚至死亡。怪病可大可小，阿泽现时双眼睇嘢有重叠，行路都冇力，连主诊医生、主持商台节目《杏林茶》的名医Dr. Tim（张惠贤）都对本刊透露：「佢只脚冇反应。」不过经Dr.Tim开药，杜汶泽要服激素控制病情，近日情况已好转。身为家中经济支柱，要休息半年的阿泽手停口停，为免缺水揽住食谷种，田蕊妮惟有担起揾银重任，中港两边飞拍剧。有祸同当，阿泽冇拣错老婆呀！

 
上年尾同时开拍4套戏的杜汶泽，当时已因操劳过度要睇中医调理身体。原本谂住食几剂中药会冇事，但上月尾突然呼吸困难、双眼出现叠影同四肢麻痺，连行路都会失平衡，后来证实患上罕见怪病「米勒费雪症候群」，严重会引致瘫痪或死亡，绝对唔讲得笑。

唔见过百万
双眼同对脚都有问题，虽然阿泽同时有两部戏《低俗喜剧》及《悬红》入围意大利乌甸尼斯电影节，但因病未能出发，冇得代表香港出战外国影展。宣传事小，据知一向多谂头的阿泽，因今次病发要狂推job，保守估计损失7位数收入。「公司原本安排咗好多job畀阿泽，佢同彭浩翔部《低俗喜剧》要四围宣传，祖儿套《Diva》又要搞后期，仲有英皇本身有个内地大型拣蟀活动（英皇超级经纪人）将会开套新戏都有佢份，家全部计划hold住，要重新plan过晒！」知情人士透露。

薛凯琪零食靠害
我探佢𠮶排咁啱系佢发病第一个星期，个样好憔悴！ 先后合作过四次，Fiona买定大量零食，连爆炸糖都买埋探阿泽，究竟佢知唔知病人要戒口㗎？

江若琳煮饭
佢教我要坚强，又话当系人生嘅预习。不过讲嘢就冇咁大声，温柔咗啰！ 喺《高举爱》做两公婆，江若琳买埋𩠌上阿泽屋企煮饭畀病人食，好在田蕊妮冇呷醋之余，仲多谢佢帮手照顾老公。

彭浩翔输血
忙紧宣传《低俗喜剧》嘅彭浩翔，特登抽时间探好友，仲话自己输埋血畀阿泽，真唔真呀？

死撑扮坚强
阿泽停工，好在老婆田蕊妮有工开。月前同黎耀祥拍完无线剧《造王者》，阿田又要北上宁波拍大陆剧《大漠谣》，虽然宁波山长水远，但阿田一知道老公出事，即刻向剧组请假返香港，好在最后验出阿泽病情比想像中轻，血中病菌浓度只占20%，不用换血，阿田日前亦安心离港继续揾食。大块田安心复工，除咗因为急住要扑水，老公要面子，亦系原因之一。「咪睇阿泽平日无厘正经，其实佢份人好悲观，知道自己有事𠮶刻，佢不知几担心！不过佢唔想身边人唔开心，更加唔想老婆愁眉苦脸，咪惟有扮无嘢死撑，嗱嗱临催阿田返上去拍剧啰！」

蚀入肉

田蕊妮07年以458万买入红磡海滨南岸单位，点知遇着金融海啸，09年以312万贱价卖出，劲蚀146万，见过鬼怕黑后冇再买楼，只租屋住。

主诊医生Dr.Tim：佢只脚冇反应
米勒费雪症候群（Miller Fisher）是一种罕见的多发性神经炎疾病，病因不明。医学上为脑干脑神经核体功能缺损，患者会出现眼球麻痺等现象。如病情严重，患者甚至会四肢瘫痪。杜汶泽主诊医生张惠贤在不愿意上镜情况下接受访问时表示：「佢（阿泽）几好呀！好得几快，佢勤力打坐有帮助，应该唔使半年就好番晒，唔会翻发。家佢食紧激素，呢只药冇副作用亦冇后遗症。之前佢只脚冇反应，家行路好啲，但都要人扶，睇嘢仲有重叠。」

27/3 病发前风骚
当晚杜汶泽带埋露背性感撑场嘅老婆拖手到场，仲未病发，阿泽成晚满场飞。

影展冇份
阿泽有份主演嘅《低俗喜剧》同《悬红》都入选乌甸尼斯影展，可惜阿泽去唔到，要彭浩翔（右）同万梓良（中）分别顶上，田蕊妮喺微博踢爆阿泽好失望。

停工半年赚少百万祖儿独撑
身兼监制兼演员的阿泽要唞半年，8月上画的《Diva》可能要靠晒女主角容祖儿宣传，好在电影有天后同小巨肺林欣彤（左二）孭飞，少咗阿泽都不至于有太大影响。

缺席拣蟀
英皇举办《超级经纪人》活动喺内地拣新人，身为评判的阿泽因病无得再玩，得番Mani同阿娇继续撑，而稍后开拍有关《超》的电影，亦因阿泽停工而hold住。

宣传甩底
阿泽喺《低俗喜剧》入面做电影监制，周围扑水帮奀星女友DaDa开戏，两人仲有车震场面。电影今年8月上画，阿泽未必赶得切参与宣传，分分钟又要彭导做埋。

日使50蚊
有个好老婆撑住头家，又有大班好友排队上门煮斋照顾支持，阿泽现只需定期覆诊，半年后即可以完全康复。不过阿泽现时仍然四肢无力，需要食激素控制病情，据知药费每次起码几千蚊，加上每日打坐静养，希望对身心都有帮助。其主诊医生，曾为商台节目《杏林茶》做主持的名医Dr.Tim（张惠贤）亦对本刊说：「佢家食紧激素……之前佢只脚冇反应，家行路已好啲！」
要闭关半年，幸好近年揾落唔少，而且跌过落谷底的阿泽识得悭住使，唔似当年又买名车买金劳咁浮夸。「我冇保母兼冇工人，同老婆又食斋，买𩠌钱有限，几块豆腐同半斤菜心，成日唔过50蚊！」睇得咁开，停工医病咪当小休啰！

怪病恐慌
被怪病缠身的不只阿泽，10年年底罗家英亦曾患「贝尔氏麻痺症」，影响面部神经线；同去年尾，陈法拉突然话拍剧过劳，搞到压力面瘫，之后要停工休养，娱圈的辛苦钱，真系唔易赚。

法拉压力面瘫
去年底，陈法拉发现左边面完全麻痺，她曾怀疑自己中风。经医生诊断后证实是因疲劳过度，太辛苦及压力大所引致，其后他赴美治疗，休息一个月便痊愈。

家英险眼盲
罗家英自04年肝癌后，10年底再患上「贝尔氏麻痺症」，起因是感冒菌入侵第七对脑神经线，令面部肌肉麻痺，左眼不能闭上，因眼水不足，严重者会引致失明。当时家英哥以为自己中风，但经诊治及停工个多月后，现已康复。

阿旦失声
上月初，声沙一排兼喉咙痛的郑丹瑞突然失声，他曾担心自己患上绝症。经医生查明下，证实他是急性声带发炎，要禁声两个月休养把声，现他正接受药物及语言治疗。 ####

 

老婆报喜阿田同阿泽结婚7年依然非常恩爱，阿田更代删除咗微博嘅阿泽向朋友报告病情。《壹周刊》图片

脚软打坐

除咗有身边人撑住，阿泽每日定时打坐同睇佛经，都对病情有帮助。

22/4最后露面 阿泽停工前出席英皇70周年庆祝活动，当日依然精神嘅佢仲未病发，同古巨基有讲有笑。

阿田现时喺宁波拍紧《大漠谣》，同剧仲有陈法拉，两个TVB人孖住揾人仔。

09年蚀卖海滨南岸（左）后，家阿泽两公婆以3万8租住元朗翠峦独立屋（右）。

《苹果日报》图片

《壹周刊》图片

年少无知嘅阿泽，试过因烂赌同大使争人几百万，𠵱家所以收入交晒畀老婆管，每月净系攞万五蚊做使费。