肥媽表示家人為怕影響感情，已協議不再看電視新聞。

「肥媽」Maria Cordero自7月20日擔任「守護香港」集會主持人，豎起拇指「俾Like」支持香港警察後玩「深潛」。日前肥媽罕有出席一間金行的周年晚宴，她接受訪問時強烈否認「721元朗恐襲」事件後同警察割席，自爆因為老公病重，加上同家人因政見不同而經常炒大鑊，情緒失控的她不時爆喊，甚至撼頭埋牆而嚇親家人，目前要服用精神科藥物控制病情，亦被禁看新聞，子女更勒令她不要多事！

肥媽同陳百祥曾為「守護香港行動」集會擔任司儀，當時肥媽情緒非常激動。

肥媽身心俱疲已不問世事，亦祝願香港早日回復以前一樣。

瘦了一個碼的肥媽早前帶同老公為相熟珠寶金行擔任周年晚宴表演嘉賓，又唱又跳改編自劇集《難兄難弟》主題曲的《We like HK》來唱好香港，之後再唱《月亮代表我的心》及跟漢洋合唱《東方之珠》，全程表現興奮，更有師奶粉絲握實肥媽手「集郵」，老公就安靜地坐在台下欣賞。

肥媽、黑妹、漢洋、譚嘉荃及Joe哥等為相熟老字號珠寶金行周年晚宴演出。

肥媽有感而發說：「《東方之珠》係唱我哋嘅香港，每個地方都有高有低，但香港點都係一塊福地！意見唔同唔緊要，最緊要坐低一齊去傾。」當問到怎樣看香港社會狀況時，她竟說不太清楚，自己已不問世事，坦言「依家我乜都唔理。」

肥媽喺台上唱歌，亦希望觀眾一齊唱好香港。

肥媽自爆：「屋企有32位成員，一向融洽相處，佢哋有啲中立、亦有唔同顏色，部份立場激進，有次成家人睇新聞，結果釀成激烈爭吵，你知我好霸道唔會畀人講嘢㗎啦，愈鬧愈嘈，當時我情緒好激動爆喊叫停，但嗌極都無人肯收聲，真係唔知點算好，唯有撼頭埋牆自殘，撼到後腦起『樓』嚇親屋企人。」

肥媽同家人一直相處融洽，但因為對香港近日反修例事件各持己見而頻頻鬧交。

另外，肥媽原來近兩年一直陪住患有肺癌的老公進出醫院，「由1月至今留咗6次院，私家醫院醫療費超過600萬，但唔緊要，老公好叻，比醫生估計得返一年壽命更長。所以嗰排心情衰到不得了，壓力大到連手都震埋。最後要睇心理醫生尋求專業治療。醫生專業建議，解決呢類情緒困擾，屋企人需要圍埋一齊坐低傾，就算唔明佢哋嘅諗法，接受與否唔重要，都可以好嬲咁講出自己感受、同時畀對方發聲，咁做係愛惜大家睇法，然後一齊達成共識。」

近年肥媽爭取時間同老公周遊列國嘆世界。

肥媽好享受家庭樂，亦愛分享跟家中愛犬的生活點滴。

肥媽同家人為怕影響感情，已協議不再看電視新聞，「我哋變返和平共處，但喺協議下，如我要出席一啲有立場嘅公開活動，係要得到家人同意，相反，佢哋都唔會參與。」今次事件令肥媽學會要互相尊重大家想法：「佢哋唔使改變我，我亦都未必認同佢哋見解，始終冇人啱晒，亦冇人會錯晒！所以單睇警民衝突片段不能作準，評論亦唔公平。最緊要控制到情緒，好彩經已由兩粒藥減到只係食一粒，不過仲要長期服用。」她慨嘆說：「我只係得一個信念，香港快啲變返以前嘅香港，大家團結一致。」

肥媽好珍惜同老公相處時間，去邊都一齊。

肥媽喺2016年3月開完《友誼長存30週年演唱會》後宣布不會再在港開演唱會。