首獲邀打手印備受確定 84歲羅蘭未想過退休
電影圈內一位不可多得的女演員!
1934年出生、4歲已參演第一部電影的羅蘭獲邀於今年1月31日為重開的星光大道打手印,肯定她在電影圈多年來的付出。問到84歲的她有否打算退休,她想也不想便回答:「無諗過!」全因對演戲的熱情從未因時間減退。
接演《神鵰》裘千尺 角色大熱觀眾難忘
羅蘭曾出演多個深入民心的角色,多次飾演反派人物的她更在《神鵰俠侶》中的「裘千尺」贏盡觀眾口碑,她分享說:「當我收到劇本,我睇吓,佢(劇本)話淒厲嘅笑聲;淒就好淒涼,厲就好似厲鬼,但係要笑。嘩!點做呀?咁我諗吓,好!我接,睇吓自己得唔得。」她指當時沒想自己會否成功,但要盡自己的努力:「我成日練習去笑,笑咗好耐先笑到一把聲似啦,咁我就keep住嗰把聲。」
她亦指當時因為經常拍古裝、出外景,於是一到山邊就放聲大笑,笑到連導演也跟她說:「得架啦!得架啦!」結果她所付出的努力都得到回報,觀眾非常受落,到今天,人人談起這角色,都會想起她「吐棗核」一幕。
晚年奪「最佳女主角」 84歲從未想過退休
以65歲高齡接演電影《爆裂刑警》,靠「四婆」一角奪得《第19屆香港電影金像獎》「最佳女主角」殊榮,年齡對羅蘭來說從來只是一個數字。不過,她亦坦言自己記性大不如前:「而家記性差咗好多,所以記對白吃力好多.....靠睇多啲囉!但到臨場有時都會......唔係話唔記得,都會㪐㩿咗,不過㪐㩿都唔得,都要嚟過。」
問到有否想過息影還是會出演到生命盡頭,她回答說:「一個生命幾時結束點可以預早知呢?總知做戲時,即係我嘅工作,做得嘅時候就做啦,真係做到完成無記性就唔可以做!」
她又說:「我望到個電視機就諗:佢而做緊,如果我做呢個角色又會點呢,咁唔使問,你即係鍾意呢樣野,你係愛上呢個工作!」
「龍婆」角色太神似 觀眾想法變不了
問到最想突破的角色或者嘗試,羅蘭原來想突破「龍婆」角色,但認為突破不了,「我想將佢(龍婆)改變吓啦,唔好成日咁嘅樣,咁嘅笑,但突破唔到,如果你將佢改左,佢哋就認為唔係龍婆!」
能夠留在電影圈近80載,問到能夠緊持的原因和做事的原則,她鼓勵一眾新演員做人做事最緊要有心和熱愛自己的工作,並說:「最緊要帶個心返心!」