防疫做足郭藹明口罩戴到上眼劉青雲全程扶實老婆怕佢仆親

依然恩愛

因為「限聚令」，影視外景拍攝一律受影響，不少製作都被迫暫時停工。有傳古天樂、郭富城及劉青雲合拍的新片《掃毒3》亦要於疫情完結後先可以開工。日前下午，家住西貢的劉青雲同老婆郭藹明（Amy）去西貢市中心買嘢食及寄信，雖然近月錄得本土「零確診」，但劉氏夫婦都聽專家話不敢鬆懈，去屋企附近買嘢都做足防疫，戴口罩之餘，劉太還戴埋眼鏡同醫療手套，望真啲，劉太將個口罩戴到上鼻樑最高位置幾乎掂住隻眼，會不會影響行路㗎?不緊要，有老公攬住行，不怕。

日前下午，家住西貢的劉青雲同老婆郭藹明去西貢市中心買嘢食及寄信。

影帝劉青雲與郭藹明一向是圈中的模範夫婦，結婚約22年來，二人仍舊像熱戀中的情侶般甜蜜，外表Cool爆的青雲還不時公開「放閃」，好似2015年奪金像獎影帝時，他就於台上向太太發表「太空船愛的宣言」，冧盡全港雌性動物；私底下，兩公婆也是形影不離，經常被拍得Sweet爆行街。趁住近期未使開工，日前青雲又同老婆去西貢市中心食Lunch、買嘢拍拖拖。

雖然只是去屋企附近買嘢，但劉氏夫婦做足防疫措施，劉太還將個口罩戴到上眼，為怕老婆行路「唔帶眼」，青雲搭住老婆膊頭過馬路。

不敢鬆懈

當日下午兩點幾，一身街坊裝的劉氏夫婦食完Lunch後便走到附近西餅店買甜品，青雲就單手插褲袋，站在門外耐心等老婆。而現場所見，Amy的防疫裝備都頗大陣仗，她不單止戴晒口罩和太陽眼鏡，還笠埋Cap帽及戴上一次性醫療手套，非常小心，個口罩還戴到上鼻樑頂尖位，都幾肯定掂到對眼！而青雲就戴口罩，加「阿豬媽」面罩太陽帽，不過，青雲全程都揭起塊面罩，只當太陽帽咁戴。

等太太排隊寄信期間，劉青雲充當「跑腿」去買炸魚同炸雞。

跑腿老公

隨後，他們返回坐駕放低購物袋，Amy又從車上攞了一份A4 Size的信件，再步行至郵局，其間青雲都好Man地搭實太太膊頭過馬路。陪對方排了一陣隊，青雲又充當「跑腿」去買外賣，見佢買Fish and Chips及炸雞，接過食物後，仲急不及待打開個袋裝一裝，相當為食。之後見有時間，青雲又去藥房搵嘢，再上返七人車會合老婆便返歸。