KFC有「麦乐鸡」，麦当劳又有「桶餐」？两大快餐店对抗再升级

肯德基、麦当劳，一对近半世纪嘅老对手

香港人嘅生活节奏快，有时忙起上嚟，边有时间坐低饮啖茶食个包，所以唔少人都好钟意食啲又平又快又方便嘅快餐。讲起快餐，唔少人就会即刻谂起肯德基同麦当劳，无他嘅，佢哋两间喺香港深耕咗近半个世纪，陪伴住好多市民成长！佢哋一间卖「鸡」，一间卖「汉堡」，主打嘅招牌品项唔系好同，但其实系一对竞争咗好耐嘅「老对手」喇。而系最近，佢哋嘅「战斗」好似升咗个level，摆明车马针住对方热门嘢食嚟挑机！今日就等DailyView用大数据同你哋浅谈肯德基同麦当劳今年嘅争斗史啦！

DV小教室：网路温度计透过《KEYPO大数据关键引擎》，观测、爬梳港澳地区近万个网站、频道，其中包括新闻频道、各大讨论区、FB、IG以及Blog，从中取得资料样本数，并以AI语意程式作数据分析。「网路热度」为主题项目相关的网路posts和comments ，数值愈大代表主题项目的讨论度愈高。

食鸡定食汉堡包？

以总体销售额嚟睇，麦当劳同肯德基就系全球头一二嘅餐饮连锁企业，佢哋之间嘅「斗争」喺世界各地不断发生，各国嘅民众都看在眼里，更会积极地将两者摆埋一齐比较。依层香港都唔例外，KFC早喺1973年喺香港开过铺头，经营到1975年麦当劳正式进入香港市场之后就撤出，好多人都话当年KFC系俾麦当劳「打走」。直到1985年，KFC先再度有人代理经营，再次引入返嚟香港。

依对「老对手」竞争咗咁耐，其实战果系点样？我哋以《KEYPO大数据关键引擎》分析吓佢哋两家嘅招牌品项嘅大数据，即系KFC嘅「鸡」同麦当劳嘅「汉堡」。睇返图表，可以见到今年网路上讨论肯德基嘅「鸡」同麦当劳嘅「汉堡」热度相当高，其中以肯德基嘅「鸡」略胜一筹。但佢哋竞争嘅嘢早就唔止自己嘅招牌嘢食，佢哋好多产品都只系差一个字咁大把，摆到明系想同对方斗过，而到咗今年仲升级咗，直头出埋对家热门产品嚟挑机！

Images Source:《KEYPO大数据关键引擎》

产品个名只系差一个字！

巴辣鸡腿包（30笔）

肯德基云云众「鸡」当中有两只包最为出名，其中一个就系「巴辣鸡腿包」。呢只包同麦当劳嘅「脆辣鸡腿包」只系差左一只字，两只包睇落都系差唔多，巴辣鸡腿包仲多番一块厚切番茄添，但系相较麦当劳既脆辣鸡腿包，点解巴辣鸡腿包都系冇咁出名？网民就话，佢哋去得KFC就系想食鸡，一系就食个葡塔或者蘑菇饭，呢个包好似鸡肋左d㖞！

image source:

脆辣鸡腿饱（662笔）

麦当劳主打嘅嘢食一直都系汉堡包，而系其中咁多包入面，「脆辣鸡腿饱」一直好受香港人钟意。佢藉辣辣地又有沙律酱嘅口味突围而出，加上做咗「特价餐」咁多年，收获到唔少忠实FANS。今年m记仲推出成个「脆辣鸡腿饱」系列，又加菠萝又double咁，有冇做多咗就唔评论啦，佢嘅网路讨论度赢「巴辣鸡腿包」几条街就系事实啰。

image source:

巴辣香鸡翼（232笔）

「行快啲啦！飞机唔等人㗎！」「肯德基啊！食件巴辣香鸡翼先啦！」唔知大家仲记唔记得依个经典广告呢？过咗咁耐喇！「巴辣香鸡翼」依然系KFC嘅热门小食，唔少人想叹个下午茶，都会去谂到「食件巴辣香鸡翼先」，加多杯可乐，就真系啱啱好啊！

image source:

巴东辣鸡翼（137笔）

「巴东辣鸡翼」最近就同「脆辣鸡腿包」系列一齐推出，个名差KFC「巴辣香鸡翼」一个字咁大把，好似真系想追击KFC咁。经过网民试食，话只鸡翼嘅东南亚香料味重，辣辣地又带有啲好似姜咁嘅味道，唔多讨好，话下次都系食返脆香鸡翼算㖞。

image source:

战斗升级！向对方热门产品挑机

KFC炸鸡（7915笔）

去亲KFC就梗系为咗「食鸡」㗎啦！KFC咁多年嚟，除咗闻名中外嘅「家乡鸡」之外，仲主力推出各样口味嘅「鸡」，炸嘅、烤嘅、锡纸包嘅……真系咩花款都玩齐。就好似KFC句经典slogan一样：「 We do chicken right」，做「鸡」佢哋真系霸主级人马。最近麦当劳要叉只脚嚟出炸鸡，挑衅程度不下喺机铺摆低一蚊，KFC要点样面对呢？真系成地花生啊！

image source:

麦炸鸡（3829笔）

麦当劳11月尾推出嘅炸鸡超新星「麦炸鸡」，一听依个名就已经感觉到挑衅嘅意味！麦当劳由汉堡界踏足炸鸡界，似乎要向炸鸡霸主落战帖？麦当劳自称依只「麦炸鸡」系可以超越脆香鸡翼嘅成就，好多网民试过就话根本同脆香鸡翼一样味，只不过系大只咗咁，仲要冇泰式辣酱。好味系好味，但系撞晒味咁点算啊？不如学KFC咁时不时出新口味啰。

image source:

上校鸡宝（973笔）

KFC「鸡宝」好多地方都有卖开，好似中国就一早卖到出晒名，不过香港地「麦乐鸡」形象深入民心，咁「上校鸡宝」要点卖法呢？话说KFC都算有新意，麦当劳大卖「麦炸鸡」广告嘅时候，KFC顺手宣传自己「上校鸡宝」，向消费者推出优惠，话喺11月30日到12月5日11点后买6件或9件鸡宝，同店员大声嗌「肯乐鸡」就可以享有优惠。唔知市民嗌嗌吓会唔会惯呢？

image source:

麦乐鸡（1791笔）

讲起麦当劳经典品项就不得不提麦乐鸡，麦当劳嘅麦乐鸡咁多年嚟形象已经深入民心，就连喺超市买嘅鸡块，我地都会习惯叫佢做麦乐鸡，可以讲话「麦乐鸡」几乎已经变成「鸡块」嘅代名词。喺鸡块呢个领域，麦当劳系非常有标志性，而麦当劳仲不断推出好多麦乐鸡嘅新食法同配搭，呢个品项堪称系经典，其他同种类商品好似好难超越佢嘅地位㖞。

image source:品牌讨论度系麦当劳大胜？

睇到上面嘅分析，就算最近麦当劳同肯德基都直接向对方热门产品挑机，战果好似都系55波，各自都有竞争力。但系再藉《KEYPO大数据关键引擎》分析佢哋分别嘅品牌讨论度，竟然出现压倒性嘅结果，麦当劳大胜肯德基！睇返网民讨论嘅主要话题，原来麦当劳咁高嘅「网路热度」系源自佢间唔时就会推出一次「现金券」嘅优惠，最劲𠮶3个高峰分别系派「＄35」、「＄25」同埋「＄60」。麦当劳善用Facebook依类社交平台，连同其他热门嘅生活群组，不时叫网民用留言换取「现金券」，増加品牌同大众嘅交流之余，仲keep到曝光同市民好感度。其实个宣传手法肯德基都有做，不过就系单一品项嘅「优惠券」多，散布嘅途径都冇麦当劳咁广。如果肯德基要増加依方面嘅竞争力，应该真系要学吓麦当劳嘅操作手法喇！