Cath透露個唱會有不少翻唱歌。

去年黃妍（Cath）還是個寂寂無名的Busker，今年她已搖身一變成為唱作歌手，更難得是短短一年時間，她便有機會推出首張大碟《黃妍說》，兼在10月舉行首場收費騷《黃妍說音樂會》，難怪收到消息時剛滿27歲的Cath，認為是最好的生日禮物，亦深感自己這年的際遇，只能用太幸運來形容。 

Cath謂大碟內，仲附有她親自寫關於每首歌的散文，貫徹其文青風格。

大碟國粵語共14首歌，全部由 Cath作曲，她都好開心第一張碟就全部是自己創作的作品，「其實嚴格嚟講係有9個旋律，因為有5首歌有國粵語版，但編曲都會有唔同，所以聽落每首歌都有唔同感覺。」

向來愛彈結他演出的Cath，唱片宣傳相當然有影。

當中最特別，當然是由台灣著名監製鍾成虎老師加持的《偷時間的人》，「公司同事知我好鍾意小虎老師，專登幫我搵佢幫手，佢喺我創作嘅歌度揀咗呢首，我去台灣錄音時，真係好緊張，但老師佢好好，佢唔會特別要求我做咩，好自然咁去發掘我嘅特質，係次好難得嘅經驗。」錄音時撞正她4月生日，所以絕對是最好的生日禮物。

Cath的4月4日生日，正在台灣為《偷時間的人》錄音。

對於10月開騷，出道一年的 Cath感覺好神奇，「仲記得一年前我仲幫緊小塵埃佢哋首個騷做暖場嘉賓，估唔到咁快我就有自己舞台，我會好好珍惜呢次機會。」由於新碟只得14首歌，Cath預了個唱會有不少翻唱歌，「其實我入行前都係Busker，主要都係翻唱歌，今次再翻唱人哋嘅歌，反而好似一個成長紀錄，相信粉絲唔會介意。」

Cath出道前是Busker，在台灣演出時被發掘。

不過，問到會否跳舞為粉絲帶來驚喜，Cath就相當反對，「呢個真係唔得住，我四肢太唔協調，第一次開騷做番最真實嘅自己先，將來有機會先再畀驚喜大家啦！」

Cath謂幫一眾師兄師姐、譬如陳柏宇演出任嘉賓，對自己今次開騷都好有幫助。