好在老婆不好名牌，慳返筆！

49歲的陳浩民與33歲內地嫩妻蔣麗莎(Lisa)結婚7年，五年抱四，育有三女一子，小朋友由3至7歲，近年一家人搬入月租過10萬的天台特色泳池屋，人夫要一個養全家，開支都幾大㗎！日前下午，身材漲了兩個size的凸腩多仔公偕愛妻行銅鑼灣，兩夫婦恩愛拖住行大眾化衫店，其間又貼頭玩自拍，結婚多年，依然咁甜蜜！

日前，兩公婆又飛日本東京。

廿年前憑《西遊記（貳）》中演活孫悟空一角爆紅嘅陳浩民，返內地掘金多年，亦娶得美人歸。老婆仔乖巧五年抱四，人夫一有時間都愛帶妻出trip二人世界，3月去完日本東京、4月遊泰國、日前又飛多次日本。

中佬發福的陳浩民好在有童顏搭夠，他陪老婆看醫生再去shopping。

日前下午，恩愛夫婦撇低仔女去銅鑼灣拍拖。年近半百的陳浩民早前坦言有打肉毒桿菌豐額減紋，外貌keep得住，惜中佬發晒福，身材向橫發展，惟有加件長袖衫遮吓大肚腩和贅肉。而金毛Liza戴上口罩出沒，老公手上有袋藥，明顯係陪愛妻看完醫生啦。見二人拖手行逛一間價錢大眾化嘅時裝店，見Liza看中一個幾十蚊的令面化妝袋，又叫老公幫手影吓product相，再揀多兩件特價衫，就畀錢離開。臨走時，兩公婆見到個企鵝公仔好鬼cute，又馬上黐到實玩自拍，煙韌到殺死人。

早前，陳浩民公開打botox豐額減紋相。

陳浩民夫婦育有三女一子。

老婆見到企鵝公仔，即着老公影相。

浩民嫂除下口罩與丈夫自拍。

金毛Liza叫老公幫手影吓個化妝袋。