文詠珊放狗靠淨化器殺菌 老公化身「隨從」幫手挽袋又拖狗
女皇般的待遇!
入行17年的文詠珊(Janice Man,JM)由「屋邨妹」一躍成為影壇搶手貨,近年事業發展不俗的她更成功泊得好碼頭,於去年9月下嫁拍拖5年的富三代才俊男友吳啟楠(Carl)。榮升少奶奶後,事業心重的JM繼續中港兩邊走拍戲,惜受新冠肺炎影響,目前內地影視業仍全面停工,留港「避炎」的她日前就約好友去數碼港公園放狗,雖然現場人多,但JM一行人都「唔怕!」,全程不戴口罩,僅靠掛頸「空氣淨化器」殺菌,老公Carl更化身「隨從」幫手挽袋又拖狗,對老婆錫到燶!
《頭條日報》報道,文詠珊自小因家道中落,由私人屋苑搬到梨木樹邨公屋居住,故14歲便入行做Model賺錢養家,成為「模始祖」。至2007年,她成功轉型拍電影,更先後憑《赤道》、《寒戰II》入圍金像獎最佳女配角,不過近年,JM則把工作重心移向內地,主演的多套劇集亦贏盡收視和口碑,令其內地知名度大增!而早前,她就跟林峯在橫店趕拍新版《倚天屠龍記》,惟新冠肺炎肆虐,橫店影視城於上月27日發出停廠通告,導致《倚》片要被迫停拍。
尚未知開工日期的JM,只好留港「避炎」,月初在家中「閉關」多日後,她終忍不住拖埋愛犬「小黑」去行山,呼吸一下新鮮空氣,不過,未知是否見行山的人流愈來愈多,剛過去的周末(23日),JM夫婦便與友人們轉場到數碼港公園放狗,殊不知現場一樣人頭湧湧!但在內地浸足幾年的她,見慣「大場面」又點會驚,繼續跟同行數名操普通話的朋友仔,穿梭於人群之中,仲要全程不戴口罩,單靠心口掛住的「空氣淨化器」殺菌,無畏無懼!
逗留到傍晚5時許,眾人見天色漸暗才步行離開,沿途JM仍「雞啄唔斷」講到手指指,一班老友都笑得好開心!不過人人都拖住狗仔走,點解不見小黑呢?原來老公Carl已經「一支箭」默默拖實愛犬向前走,登上7人車前,他不但要抱起小黑,還要孭住個大袋,相當狼狽!反觀JM抽住細細卷地,慢條斯理地緩步尾隨,非常優哉游哉!話晒Carl是「富三代」,本身都是少爺仔一名,更是新風天域首席執行官,估不到對住老婆都頓變「阿四」,JM真幸福!