拋開爭產煩惱 朱玲玲陪夫Shopping溫馨放閃
溫馨放閃~
由「最美麗港姐」升格做「最美麗嫲嫲」的朱玲玲雖然踏入花甲之年,但樣貌與身材都無乜走樣。日前周日下午,依舊高貴大方的朱玲玲陪老公、瑞安集團主席羅康瑞,恩愛現身金鐘一商場。當日,見「上海姑爺」暫拋開家族爭產煩惱,被太太甜繞做連體嬰去名店Shopping。兩夫婦沿途有講有笑,又溫馨對望冧笑,幸福滿瀉!
現年60歲的前港姐冠軍朱玲玲,08年11月與百億身家的羅康瑞喺新加坡再婚,近年弄孫為樂,早前佢出席公開場合時笑言湊孫好好玩,指新抱郭晶晶基因強,兩個小孫女似足媽咪。而佢位71歲靚仔老公羅康瑞,近年受「600億鷹君爭產案」纏擾,月前卸任貿發局主席一職,在港已無公職嘅羅生坦言「要享受人生」!
日前下午3時,朱玲玲兩夫婦乘坐房車到金鐘太古廣場shopping。甫下車,兩公婆即繞手合體,沿途有講有笑落商場window shopping,見小鳥依人的羅太滔滔不絕,雙手愛放身後的羅康瑞則一直用心聆聽,偶爾甜笑望實愛妻,畫面勁sweet。未幾,兩公婆行過一間名店時,店員走出與羅太say hi,羅太即友善停下,繞夫笑笑口吹水展現親和力,不愧係港姐典範。
其後,恩愛夫婦再繼續溫馨放閃周圍行,經過一間專賣手袋和皮鞋的心水店舖時,才雙雙入店。見朱玲玲專揀一啲舒適平底鞋,黑色、白色都好like,就分別試試;而老公就好有耐性坐低慢慢等,間中又畀吓意見,o氹到太太笑容滿面。逗留廿分鐘,朱玲玲揀中幾對鞋,就簽單等送貨,再兩手fing fing輕鬆繞實丈夫轉場,再入另一間名店睇手袋、皮革用品等,最終唔啱心水便離開。最後,二人逛足個半鐘才call司機接載走人。