豪擲200萬東京拍寫真 36G崔碧珈玩谷胸誘惑
相信不少FANS都期待這本寫真~
憑36G澎湃身材聞名的崔碧珈(Anita),本身是工商管理碩士的她,有樣有身材外兼有腦,加上擁有健身教練牌,繼16年今年書展再接再厲推出《崔碧珈的生酮秘笈》,講明不再單靠性感做賣點,決定公開多年來絕密減肥秘方,更以身犯險先激增15磅,再挑戰用生酮減肥法兩周內勁減,幸好人瘦胸不瘦。寫真集製作費達200萬,更揼本拉隊到東京取景,Anita最愛的女僕造型一輯,亦花30萬日圓(約兩萬港元)封超級巿場4小時極速完成,難怪她形容視寫真集如親生仔一樣緊張,下半年更會帶新書去世界各地巡迴宣傳。
16年推出過寫真集《Sweat Anita》後, Anita一直好想再推出一本自己構思的寫真集,今次足足化了九個月時間去製作,「構思好仲要搜集資料,我又唔想請槍搵人幫我寫,想所有嘢都真實啲,所以喺法國同意大利拍戲嗰段日子,我都用休息嘅時間去寫,有時連喺飛機都寫埋一份,不過亦都特別有滿足感。」
Anita坦言本身是水腫體質,易肥易瘦,多年來受體重困擾的她,試過不少減肥方法,都算半個專家,於是透過今次出書同大家分享,她直言寫真相只是配菜,「講真如果全部文字,真係冇人去睇,有圖片真係會吸睛啲嘅。」為了這書Anita更以身犯險先激增15磅,再挑戰用生酮減肥法,兩周內減番,都咪話不犧牲,「影完寫真啲相,我就開始增肥,花咗一星期狂食我平時唔食嘅垃圾食物,好似朱古力、薯片同汽水咁,之後就挑戰生酮減肥法,咁又冇話犧牲嘅,我除咗食方面仲有配合運動,我條腰最明顯,由31吋減到得番24吋度,所以都唔擔心自己減唔番,而且我瘦咗個胸都冇走樣。」她笑言將31吋肥腰相放上網,竟然被網民誤會她有了BB,還驚動緋聞男友吳浩康,「佢本嚟唔知我出寫真集,因為有人問佢我係咪有咗佢骨肉,佢咪打畀我問咩事囉!(佢點睇你出寫真集?)我冇畀相佢睇,但應該透過傳媒都睇到,作為朋友當然希望佢支持啦!」
為效果靚,Anita今次寫真集一行十人拉隊遠赴東京拍攝一周,相當揼本。當中Anita至愛在超級巿場拍攝的女僕造型,「呢輯相唔係特別性感,但係自己冇試過女僕嘅造型,我哋仲包咗個超巿去拍攝,真係好難得嘅經驗嚟。」
據知,單是超巿包場費短短4個鐘,便要花30萬日圓(約兩萬港元),還要凌晨開始拍攝,Anita捱住困意去影,都咪話不辛苦。不過似乎Anita相當享受,「上次寫真集只係照攝影師要求影,今次有好多自己諗法,所以真係好似自己親生仔咁,會緊張好多,但亦都特別開心。」為配合寫真集宣傳,搞咗個公開減肥比賽外,Anita仲要帶住新書去其他國家巡迴宣傳,「下半年仲要去內地同亞洲區,仲有法國同意大利宣傳本書,所以嚟緊自己都要保持住呢個身形,都係另一個大挑戰嚟㗎!」