十件新年一定要做嘅事！原来去行大运都系其次？

今时唔同往日啦！

农历新年系中式最传统嘅节庆，亦都系华人必过嘅节日，喺呢段日子大家都会参加好多传统活动去传承呢个农历新年嘅文化，例如以前大家都会烧炮仗，放烟花，又会自己写春联等等。不过随住科技嘅日新月异时间嘅变迁，现代人已经唔再系跟足古时嘅一套做法嚟做节啦！今次就等DailyView带大家睇睇宜家嘅香港人喺新年最钟意做嘅十样嘢喺咩啦！

DV小教室：网路温度计透过《KEYPO大数据关键引擎》，观测、爬梳港澳地区近万个网站、频道，其中包括新闻频道、各大讨论区、FB、IG以及Blog，从中取得资料样本数，并以AI语意程式作数据分析。「网路热度」为主题项目相关的网路posts和comments ，数值愈大代表主题项目的讨论度愈高。

10. 香港式赌博-六合彩/赌马

华人会认为「新年会行大运」，嚟到新一年，大家都会觉得黑仔运会离开自己～喺呢个时候就当然要试试手气啦XD对于香港人嚟讲，买返场六合彩同马仔都系必做嘅，唔试又点知自己好唔好运㖞～加上农历新年期间六合彩会有新年金多宝，赛马会亦都准备咗好多节庆活动同礼品畀大家，例如入场人士会派礼物，今年赛马当日仲会发放1亿2千万巨赏！简直见到都心动呀！

image source:hkjc

9. 转转转转走衰运-转风车

香港人深信转风车可以「转出好运」，不过转风车都有少少技巧，觉得上年运气唔好嘅朋友，转𠮶阵记得顺时针咁转，祈求今年顺风顺水；相反觉得上一年都好好运嘅朋友仔，就要将风车逆时针咁转啦！咁样先至可以将好运保留落嚟㗎！至于求签，香港人相信一支签可以解答到心中嘅疑惑或者知道今年会过成点，好多人都去求个安心㗎！就连政府每年都会派代表去求签！

image source:flickr

8. 夏蕙bb见面会-抢头炷香

讲到抢头柱香，又点会少得香港人都识嘅夏蕙BB黄夏蕙㖞！香港有好多善信同夏蕙bb一样，每年嘅年三十晚都会去黄大仙祠到抢头柱香㗎！善信们会认为头柱香可以表示到佢哋对神明嘅虔诚，神明亦会因此而更听善信嘅祈福～呢项活动持续咗咁多年都好旺盛，每年都会有各畀嘅媒体过嚟拍摄，就算系外地嚟嘅游客，都会特登前往去感受一下现场嘅气氛𠻹！

image source:youtube/苹果动新闻 HK Apple Daily

7. 合家欢时段-睇贺岁片

难得新年大家都会放假，当然会做返啲开心嘢嚟团年㗎啦！呢个时候睇贺岁片就系一家老幼合家欢嘅活动时间啦！每年新年戏院紧有两三套贺岁片上映，个个都会喺戏院睇到笑唔停！嫌出门麻烦？唔紧要！就连电视都会喺新年期间播返以前嘅贺岁片畀大家睇！基本上每年都会必播《家有囍事》、《行运一条龙》、《呖咕呖咕新年财》等等。年年都会播㗎！真系睇到识背啲对白呀！

image source:Facebook/AMC

6. 煲剧煲到不知时日过-煲剧

基本上个个新年都长假放，特别系学生一族呀！对于一班钟意宅喺家中嘅后生仔嚟讲，煲剧简直系一流嘅过年活动！唔使浪费时间打扮出街，又唔使装假狗笑笑口咁应对一班唔熟嘅亲戚～加上宜家追剧嘅平台咁发达，你想睇边个国家嘅戏、你想睇边个演员嘅戏、又或者你想睇咩题材嘅戏，只要上网打几只字搜寻就任君选择！肚饿就边食嘢边煲剧，食饱就瞓喺床继续煲。爽！

image source:viutv

5. 新衫新鞋扮靓靓-买新衫新鞋

对于农历新年，华人嘅传统思想就系「去旧迎新」。呢个时候除咗年廿八要洗邋遢之外，弃置咗嘅当然就要添置新嘅返嚟啦！香港人新年点都会买返件新衫新鞋过嚟，香港人相信个人望落去精神啲之余，仲可以增加自己嘅旺气！所以呢个时候你都会见到衫铺鞋铺都特别多人行多人shopping。虽然要洗钱，但商铺亦通常会搞返个新年大减价活动，又点会忍到手唔买嘢㖞！

image source:unsplash

4. 新年一定要碰杠食-打麻雀

虽然有好多人平时都会打麻雀，但小编啱啱都讲过，咁多位赌仔都会觉得新年特别旺要一试手气～特别喺新年大家都放假，点都会约返朋友或者亲戚打返几圈！大家都赌几大就几大，加上打牌有咁多款，打跑马仔又得、三番起糊又得、台湾牌又得、仲可以玩自摸奖马，真系打几都唔厌㗎！何况打牌有助防止老人痴呆症，大家都快啲新年陪长辈打返铺牌啦！输咗钱咪当孝顺吓佢哋啰XD

image source:Youtube/笑到你仆街

3. 年花开开灿烂-行年宵

讲到新年必做嘅嘢又点会少得行年宵！香港人新年都会约朋友一齐行街凑热闹，屋企人都会买啲年花摆喺屋企装饰。甚至好多情侣都会将行年宵呢项活动列入新年拍拖活动！点解？因为年宵市场除咗有多款色彩缤纷嘅年花，仲有好多档新年创意商品，行到肚饿仲有大把小食可以买！小编新年行年宵一定会买返串冰糖葫芦嚟食㗎！仲有，年三十晚好多档都有大减价𠻹！

image source:flickr

2. 行完大运大运到-行大运

成日都话「新年行大运」，究竟咩叫做要「行大运」呢？其实简单啲嚟讲，姐系每年农历新年对于每个生肖都会有属于佢地好运嘅方位，就好似要揾吉位摆风水阵，人都一样，打个例子例如属猪蛇牛可能今年东南方比较旺，咁佢地就可以新年去𠮶到行返几转沾沾旺气！至于今年2020年，你哋应该去边到兜两转，就自己去搜寻下啦～XD

image source:Facebook/头条娱乐

1. 向世界出发-去旅行

对于香港人嚟讲，平日返工做嘢做到成只狗咁，新年有得拎假就紧系去旅行啦！去边都唔系问题，最紧要系可以远离家乡放松放松姐～其实旅行照样可以去行大运㗎！好似今年2020年咁，网上就有建议属鼠嘅可以去东北方例如日本同韩国，而属羊就啱去澳洲同纽西兰嘅南方地区，而北方就啱属牛嘅朋友啦！不过去边都好，最重要注意安全同玩得开心，咁就可以有个happy lunar year 啦！