2019回顾／Switch无嘢玩？睇吓十大热门游戏先讲啦！
Switch热潮未停过！
相信唔少人都记得早两年Switch啱啱出𠮶时，好多人宁愿食炒价都要买部嚟玩，皆因佢可以一个人玩，两个人一齐玩甚至一家人、一班朋友一齐打，成为大家闲时消遣、Party欢众嘅必备住品！不过过咗两年，愈嚟愈多声音话Switch无嘢玩。傻的吗？今日就等DailyView带你哋睇吓2019年度，俾网民热议嘅Switch新出十大Games啦！
DV小教室：网路温度计透过《KEYPO大数据关键引擎》，观测、爬梳港澳地区近万个网站、频道，其中包括新闻频道、各大讨论区、FB、IG以及Blog，从中取得资料样本数，并以AI语意程式作数据分析。「网路热度」为主题项目相关的网路posts和comments ，数值愈大代表主题项目的讨论度愈高。
2019年新出，依十只Switch Games最HIT!
10 《萨尔达传说 织梦岛》
——主角其实叫「林克」（2666笔）
萨尔达系列一向都系Nintendo嘅主打自家品牌，呢一只《萨尔达传说 织梦岛》其实系早喺1993年已经开发嘅Game，依家喺Switch推出复刻完全重制版。呢个全新版本除咗靓咗同埋个游戏体验好咗，仲可以勾起旧玩家对呢只Game嘅美好回忆，可以话系同之前神作《萨尔达传说 旷野之息》有好唔一样嘅游戏体验。BTW，萨尔达系公主个名嚟！
image source:
9 《Tools Up!》
──友情大危机（2954笔）
继《Overcooked!》之后，又一只破坏坚定友情嘅Game登上Switch平台喇！同《Overcooked!》一样，呢只Game都系以四人为单位，以团队合作去装修屋企，玩家化身为工人，喺限时之内完成设计图装修，非常讲求合作性！然而呢一点正正系破坏友情嘅核心，唔少朋友玩装修玩到坚拆屋，继而真人嗌交，友谊嘅小船话翻就翻！
image source:
8 《Winning Post 9》
──星期一至日都跑马（3071笔）
香港人钟意赛马，睇平时马场有几墟冚就知。而依家除咗实际亲身去到赛马现场，Switch上面都可以赛马！《Winning Post 9》喺香港可以话系相当Hit，喺Switch一推出就广受讨论。呢只Game有个特点同平时赛马唔同，就系玩家可以养马去参赛，由马嘅岁数去到血缘，样样都要计足，真系好似实际养马去参赛咁，拟真度极高，喺香港广受欢迎！
image source:
7 《玛利欧＆索尼克 AT 2020东京奥运》
──东京，热门运动（4355笔）
大家都知Nintendo嘅运动竞技游戏好出名，今次2019 Switch平台推出《玛利欧＆索尼克 AT 2020东京奥运》，系奥运官方游戏最新作品，今次Nintendo同XEGA嘅角色共同推出同台比赛，大家可以睇住音速鼠同Mario斗快跑步或者田径比赛，一家大细喺Party到一齐玩呢只Game，卡通人物化身奥运选手，可以话系炒热气氛嘅一大佳品！
image source:
6 《路易吉洋楼3》
──Q版捉鬼唔使惊（4766笔）
《路易士洋楼》一路喺Nintendo平台都好受欢迎，隔咗几年登上Switch平台，游戏依然用返路易士呢个角色喺鬼屋解谜，呢个时候你就会发现，鬼唔单止唔得人惊，仲可以好Cute！呢次除咗自己玩，仲支援8个人去玩「恐怖高塔」同「游乐园」。呢只Game由独乐乐走到去众乐乐，完全符合Switch可以自己玩，又可以多人游玩嘅特点啊！
image source:
5 《哆啦A梦 牧场物语》
──叮当可否不要老，伴我种草（8091笔）
相信多啦A梦代表咗唔少大小朋友嘅童年，而今次多啦A梦同牧场物语合作喺Switch出咗一只Game《哆啦A梦 牧场物语》，游戏以大雄为主要角色，玩嘅系牧场物语嘅游戏内容。大雄一年四季种吓菜、养吓鸡、食吓嘢咁，种种游戏特点可以话系两大回忆杀嘅终极结合体，深得人喜爱。呢只Game绝对系闲时自己一个打发时间嘅绝佳良品啊！
image source:
4 《圣火降魔录 风花雪月》
──沟女定打机啊？（8760笔）
《圣火降魔录 风花雪月》系Nintendo同光荣特库摩合作开发嘅一只Game，玩嘅系一款冷门但又好Hit嘅战棋类游戏。圣火降魔录系列其实系一款已经有30年历史嘅品牌游戏，虽然无宠物小精灵、Mario、萨尔达咁Hit，但都系有一班忠实Fans支持，依家仲吸引咗唔少新Fans嚟玩添！除咗战棋、战斗模式之外，仲有恋爱养成，非常啱一啲热血青年（宅男）玩！
image source:
3 《牧场物语 重聚矿石镇》
──回忆满满（12277笔）
《牧场物语 重聚矿石镇》嘅重制招来好多80后、90后玩家嘅疯狂讨论，皆因呢只Game代表住佢哋如何喺无智能电话速食游戏嘅时代，度过一个又一个漫长嘅假期。好多玩家都曾经沈迷喺追女仔、结婚、种菜、挖矿等嘅剧情入面，亦都第一次知道点样可以劳役小矮人，今次重制依然沿用可爱日本画风，令到一众旧玩家疯狂，亦都吸引一班00后加入呢个牧场世界！
image source:
2 《健身环大冒险》
──减肥恩物（15063笔）
《健身环大冒险》呢个Game真系打破咗游戏同运动嘅隔膜，网上流传有人真系因为连续玩咗呢只Game一个月之后火速瘦身！当然除咗瘦身减肥嘅功用，呢只Game都有佢独特之处。游戏以冒险形式为玩家设计咗一系列嘅健身动作，令到玩家喺打大佬嘅同时都不知不觉做咗好多运动，可以话寓瘦身于娱乐！
image source:
1 《Pokémon 剑／盾》
──既然你诚心诚意咁问（84220笔）
Pokémon一直都系Nintendo嘅超级品牌，每逢佢出新一系列嘅Pokémon游戏，或者系推出重制复刻版嘅时候都会掀起一阵风潮，基本上世界上好多男仔都立志成为宠物小精灵训练员，誓要捕捉晒所有宠物小精灵同埋神兽。而今次剑盾又扩充咗图鉴（都删咗唔少），自然有一堆宠物小精灵训练员即刻摩拳擦掌要去收集啦！
image source:
【以上图文为香港网路温度计调查结果，未经授权请勿转载、改写】
分析说明：
本研究资料由《KEYPO大数据关键引擎》提供，分析时间范围为2019年01月01日至2019年12月31日。
网路大数据系统观测港澳地区上万个网站频道，包括新闻频道、Facebook、Instagram及各大讨论区、BLOG等，针对讨论『2019年Switch Game』相关文本进行分析，并根据网友就该议题之讨论，作为本分析依据。
本文分析之结果，非参考投票、民调、网路问卷等资料，名次仅代表网路讨论热度大小，不代表网友正负评价。
推荐文章︰
二十大开Post标题常用语，一文了解连登潜规则！
2020年脱单指南！12星座会遇到的「桃花种类」曝光
