重复礼物，何堪再送？十大包你见到厌嘅圣诞礼物！
交换礼物系中奖定中伏
讲起圣诞节，大家都会谂起同一班朋友、屋企人开party，交换礼物当然就系必备环节。收礼物最怕收到D唔啱用又占空间嘅礼物，如果系抽奖礼物，大家事前都唔知道礼物会俾边个，呢个时候就更加难决定送乜嘢。今日就系睇吓呢十大最常见嘅礼物，到底系咪大部分人都啱用，收到呢D礼物系中伏定系好彩呢？
DV小教室：网路温度计透过《KEYPO大数据关键引擎》，观测、爬梳港澳地区近万个网站、频道，其中包括新闻频道、各大讨论区、FB、IG以及Blog，从中取得资料样本数，并以AI语意程式作数据分析。「网路热度」为主题项目相关的网路posts和comments ，数值愈大代表主题项目的讨论度愈高。
10 颈巾（191笔）
以前中学𠮶个年代成日都会见到D女仔偷偷地系枱底织颈巾，虽然话出面周街都买到好多靓款，不过一针一线出嚟呢份心意，就几多钱都买唔到！人大咗，可能更加无时间，如果愿意花呢个心机慢慢织一条颈巾，无论送俾闺蜜定系心上人，收到都一定觉得开心，冬天再冻多几度都唔怕，一样都够晒warm～
网友话：
「咁多巴打想要颈巾 唔惊织得样衰但被迫要带咩？」
「听讲织颈巾系分手魔咒嚟......」
image source:Facebook/织嘢 JickYeah
9 Handcream（212笔）
每逢圣诞节，好多品牌都有特别推出圣诞礼盒套装，当中价格最平易近人嘅就大多数都会系handcream套装，大家咁多年来收收埋埋应该都唔少～相信都试过多到用唔完，又转送俾第二个。Handcream同搽上面嘅产品比起上嚟无咁拣人用，成分一般都系大家都啱用，见到系大牌子嘅包装，份礼物望落都比较得体。
网友话：
「Hand cream 同保温杯，真系见到都惊。」
「未见过有人收到Handcream会开心......」
image source:Facebook/The Body Shop
8 银包（258笔）
银包呢D每日都一定带要出街嘅物品，当然都系礼物嘅选项之一。就咁谂就觉得够晒实用，不过每一个人钟意嘅款同埋需求都唔同，收到唔啱用其实都系浪费。加上好多人嘅银包一用就用几年，如果吓吓都收到个新银包做礼物，真系用都用唔切。不够如果系近年流行自制皮革银包，我谂收到嘅人一定会觉得好窝心。
网友话：
「前女朋友送𠮶个已经用咗十年，希望今年有新银包用。」
「钱就得咁多，银包就好几个。」
image source:Facebook/agnès b.
7 香水（309笔）
以前大家刻板印象都觉得女仔先会特别注意自己嘅形象，不过近年其实好多男仔都一样好讲究㗎。无论男女，如果行过就散发住一阵香味，第一印象应该都会加唔少分。如果选择香水嚟做礼物就要小心啦，始终香味呢家嘢好睇个人，但系假如系送一D特别造型嘅小香水，就算只系作收藏用，香水控收到都一定会好钟意。
网友话：
「造型靓嘅话，唔闻得都睇得」
「之前收到只味麻麻嘅，直接放系厕所当除臭喷。」
image source:Facebook/ Armani Beauty
6 香氛（417笔）
对讲究生活质素嘅人嚟讲，出街要喷香水，喺屋企更加要营造一个自己最舒服嘅环境，呢个时候香薰就系好紧要嘅一个重点。而家嘅居家香薰有好多唔同选择例如香薰喷雾、香薰蜡烛，香薰座等等，放工返到屋企咁攰，点返个香薰舒缓下，谂起都觉得chill～每日闻着仲会记住系边个有taste嘅朋友送俾自己添！
网友话：
「迷你香薰套装有齐diffuser、蜡烛和香气喷雾，最啱送礼物。」
「之前送咗个同个friend嘅偶像同款蜡烛俾佢，放咗两年佢都唔舍得用。」
image source:Facebook/ Yankee Candle
5 年历、行事历、月历（500笔）
话就话而家大部份人记schedule、睇月历都靠一部电话做晒，不过我谂大家屋企或者公司都仍然会摆番个月历先会安心。细个学校抽奖环节一定曾经有人抽中月历，即使宜家大部份人已经习惯用手机记事，月历摆出嚟可能只系一个习惯，所以大家都冇乜特别要求，收到亦都唔会特别嫌弃。不过听闻唔少网友都话试过抽奖中伏收到过咗好几年嘅月历，真系唔知好嬲定好笑。
网友话：
「讲起我收过最伏既礼物 一定都系过期月历」
「最伏系收过2013年月历......」
image source:Facebook/WHOSMiNG
4 脸部护肤品（621笔）
除非你好了解收礼物呢个人，如果系好闺蜜或者都可以考虑吓，送护肤品做礼物，脸部护肤品呢D比较个人嘅物品，如果唔系好熟嘅朋友，其实系一个都几大风险，分分钟唔啱用，用完敏感就尴尬啦。建议大家如果真系想送护肤品，都可以选择比较大路，成份比较温和嘅面膜，咁就适合更多人用，但当然最好都系你对收礼物嘅人有一定程度嘅了解先好选择先好拣送护肤品啦！
网友话：
「送唔啱好尴尬，用又唔系，唔用又唔系」
「同意送保湿mask，不过唔好买韩牌因为好易敏感。」
image source:Facebook/ Innisfree HongKong
3 文具（632笔）
以前小学圣诞联欢会，一定见过有人买文具套装做抽奖礼物。大个之后公司一般都会有文具提供，自己买文具好多时都系为咗钟意嘅卡通人物，或者有特别需要，例如本身钟意写手帐，就会特登买靓笔写。严格嚟讲文具都算系实用嘅礼物，例如如果你知收礼物个𠮶人钟意咩公仔，特别去买日本版嘅文具送俾佢收藏，佢一定都会好好珍惜，同觉得你有记住佢嘅喜好。
网友话：
「有次收到无针钉书机，好好玩又环保」
「有无人明白收到成套笔嘅满足感」
image source:Facebook/ MUJI Hong Kong
2 化妆品（786笔）
化妆品相信系好多女仔平时自己都会投资好多嘅一个范畴，无论圣诞节、情人节，又或者拍拖纪念日都好，大部份女仔收到一支靓嘅唇膏都会由心笑出嚟，而且唇膏、眼影呢啲用得又可以收藏嘅嘢，通常都唔会有人嫌太多。而家好多品牌会出合作联名限量版，如果你留意到，又成功抢购送俾好朋友或者女朋友，一定会氹得佢好开心～
网友话：
「我成日抽到女人野，唇膏眼影都收过，有女嘅时候直接送比女朋友。」
「系咪我色盲 点解觉得女朋友支支唇膏都一样色？」
image source:Facebook/ Dior
1 零食（1002笔）
圣诞节开返个party就一定系基本嘢啦，除咗食大餐、玩游戏，准备一大堆零食食唔停都系必备嘅。有唔少网友都话，其实宁愿礼物收到堆零食，大家即场开心share食晒佢，都好过收到一D唔实用嘅礼物，唔知攞嚟做乜，掉又唔系，留又唔系。零食呢D嘢大家食完就冇，起码唔使拎D无谓嘢返屋企摆～
网友话：
「食物食完就会消失，唔食都可以送比中意食果样野既人食」
「眼不见为净，宁愿要食物消耗咗，可以无眼屎干净盲。」
image source:Facebook/ 香港零食大王
【以上图文为香港网路温度计调查结果，未经授权请勿转载、改写】
分析说明：
本研究资料由《KEYPO大数据关键引擎》提供，分析时间范围为2018年12月14日至2019年12月13日。
网路大数据系统观测港澳地区上万个网站频道，包括新闻频道、Facebook、Instagram及各大讨论区、BLOG等，针对讨论『圣诞礼物』相关文本进行分析，并根据网友就该议题之讨论，作为本分析依据。
本文分析之结果，非参考投票、民调、网路问卷等资料，名次仅代表网路讨论热度大小，不代表网友正负评价。
推荐文章︰
识饮识食识玩！十大生活Youtuber，Ming仔第几名？
最潮二十大「开房」Party Room，波波池都有得玩？
