《全民造星II》再造香港传奇！十大节目最受关注超新星
香港人，齐追星
ViuTV爆红选秀比赛节目《全民造星》第一季极受欢迎，姜涛亦都因为呢个节目红咗，成为新一代香港男神。2019年9月《全民造星II》正式播出，由众多参加者选出99位好有才华嘅表演者，开始咗一场龙争虎斗，表演者各展所长，又唱又跳，已经引起好多人Follow做Fans，香港未来嘅大明星，你又睇咗未？《全民造星II》好快推出新嘅娱乐圈新星，要做新星最紧要有观众缘，要有网路讨论多人讲。因为咁，今次DailyView就用节目开播日9月30号至今嘅网路声量，以大数据分析网民对咁多参赛者嘅讨论热度，排出十大最受网民关注嘅新星！
DV小教室：网路温度计透过《KEYPO大数据关键引擎》，观测、爬梳港澳地区近万个网站、频道，其中包括新闻频道、各大讨论区、FB、IG以及Blog，从中取得资料样本数，并以AI语意程式作数据分析。「网路热度」为主题项目相关的网路posts和comments ，数值愈大代表主题项目的讨论度愈高。
10 吴启洋（812笔）
——Phoebus
《全民造星》第一季冠军姜涛点名，话吴启洋最有冠军相，有佢嘅光环加持，令吴启洋由节目一开始已经得到唔少关注。今年22岁，理工大学土木工程系Year 4学生，个人IG至今已经累积咗一万五千位Fans以上！吴启洋有咩咁吸引？除咗识唱识跳，佢本身系运动健将，身材高大健硕，好有阳光魅力。好多网友都支持佢，希望佢「系涛涛身上学多啲野 ，自己变得更好」，「洋洋院长大人，一定支持你！」
image source:
9 洪助升（828笔）
——Aiden
有《全民造星II》少女杀手、情歌天王之称嘅洪助升，清秀嘅外表，酒粒嘅笑容，184cm嘅身高，为佢吸引咗好多Fans，日日喺网路上力撑佢。洪助升本身系香港演员，参演过ViuTV剧集《身后事务所》、香港电台电视部同香港消防处联合制作嘅重头剧《火速救兵IV》等，真系唱得又演得，多才多艺。网民见佢参加比赛咁辛苦，劝佢「食多d！肥番小小好睇d」， 又话「Anson 劲、劲、劲」，话佢愈嚟愈进步！
image source:
8 罗卓华（834笔）
——Will
罗卓华，音乐才子，本身已经系一位全职结他手，成日都自弹自唱，系舞台上充分表现出佢嘅才华。罗卓华参赛前已经系香港乐团ONEders嘅队长，平时都好习惯同其他人合作，难怪佢喺Team C咁受欢迎喇！罗卓华嘅实力有目共睹，喺歌唱、吉他同跳舞都有返咁上下水平，难怪咁多Fans支持佢嘅。好似「想入场睇你拎冠军」、「Will 好真诚、与队友有火花、继续向前、一定掂」，相信罗卓华睇完都好感动。
image source:
7 陈乐（906笔）
——Justin
18岁嘅时候，呢个最青春最多梦想嘅人生阶段，你做紧咩嘢呢？陈乐就参加咗《全民造星II》，为自己嘅音乐梦行出重要一步。最初果阵，唔少都笑佢系「翻版林师杰」，唔信陈乐咁后生可以做到咩嘢㖞。但陈乐并无心灰意冷，用佢嘅实力不断杀出重围，而家经过咁多场演出已经无人再睇少佢喇！「Justin，你好有观众缘及才华」，「哇陈乐真系好靓仔」，咁多网友都咁讲，相信陈乐嘅音乐梦一定唔会完！
image source:
6 丘凯雄（929笔）
——Hugo
《全民造星》第一季亚军陈卓贤点名力赞，连花姐都话佢系大热，中泰混血儿嘅丘凯雄，一开始已经备受关注。有网友话佢个样似刘青云，又批评佢「面容扭曲」，佢就话希望大家留意佢嘅歌声，要走实力派嘅路。事实证明，丘凯雄每次唱歌都大受好评，唔少人都话好听过好多时下歌手。「唔理 Hugo 会唔会继续比赛，只要将来佢出歌，我都愿意买黎听」，咁有个人魅力，丘凯雄嘅唱功会令更多人听出耳油。
image source:
5 刘瑞祈（964笔）
——K lau
一句「99个入选200万个企出嚟嘅细路」，引起好多香港嘅年轻人支持，刘瑞祈霸气冷酷嘅外表，内藏一颗为梦想热血拼斗嘅心。其实睇返记录，刘瑞祈早就喺香港娱乐公司梦想沙龙娱乐文化有限公司入面，成立ReVe跳唱男子团体出道。好可惜嘅系，正当佢要大展拳脚，就因伤休养。今次参加比赛，系佢永不言败嘅精神，好多网民都力撑：「睇到你呢几年嘅努力同经验，每一下都系型！」、「认真好钟意听你rap」。
image source:
4 杨昌鹏（1018笔）
——小鱼
年方24，停薪留职嘅ViuTV Writer，杨昌鹏高言「别人笑我太疯癫，我笑他人看不穿。我会令你刮目相看」。佢个人风格强烈，说话直接自负，好似话队友「无常识」、对手实力差咁。正因为咁，佢一直都喺网上讨论区、ViuTV Facebook专页入面俾网民「负评」洗版。「好做作啊你，不了」、「您无观众缘！ 完！讲完！」不过，都有Fans力撑杨昌鹏，话不招人妒是庸才，坚持真我，先系做未来大明星嘅本色！
image source:
3 梁德忠（1288笔）
——Tank
之前有份参加《全民造星》第一季嘅梁德忠，今年再度入围《全民造星II》，佢喺今次比赛之中对比其他人都绝不失色，甚至成为而家嘅大热门人选。梁德忠上年本身系因为舞蹈员合约被迫退出，而家再次参赛，都系为咗全心全意发挥所长，取得佳绩。不过网路上有时对佢都有唔少批评，话佢唱歌一般，但而家佢已经改善咗，难怪有Fans睇完佢表演都赞不绝口：「Tank你唱歌进步咗好多，继续加油！」
image source:
2 李祉均（1637笔）
——Oscar
李祉均23岁，喺香港演艺学院修读现代舞系，以出色嘅舞技征服咗评审同观众。王贻兴曾经对李祉均讲过：「保护你最好嘅方法就系唔好畀你入娱乐圈」，皆因佢嘅演出太艺术，怕走入商业大众反而令佢受伤。不过，好多观众偏偏就系欣赏李祉均嘅与众不同，跳出真我。好似佢自己咁讲，表演只系有分好同唔好。「有自己风格最紧要，好多人都支持佢，唔好放弃！」相信李祉均将会为我哋送上更多精彩嘅演出。
image source:
1 张天赋（2432笔）
——MC
张天赋喺《全民造星II》首轮比赛，一首Sam Smith嘅《I’m Not The Only One》，唔单止令评审大力赞扬，陈咏燊话佢「目前为止最有星味的人」，仲引嚟好多网民做咗佢嘅Fans。不过，正所谓树大招风，张天赋身为网路讨论度第一名，自然都有唔少「负评」，批评佢态度差，唔识做人，仲成日迟到。虽然系咁，但佢唱功一流先系最紧要。「唱歌真系超正！唱功好颜值高！」张天赋咁屈机，难怪咁多人讲起佢喇！
image source:
分析说明：
本研究资料由《KEYPO大数据关键引擎》提供，分析时间范围为2019年09月30日至2019年11月28日。
网路大数据系统观测港澳地区上万个网站频道，包括新闻频道、Facebook、Instagram及各大讨论区、BLOG等，针对讨论『《全民造星II》十大网民最关注新星』相关文本进行分析，并根据网友就该议题之讨论，作为本分析依据。
本文分析之结果，非参考投票、民调、网路问卷等资料，名次仅代表网路讨论热度大小，不代表网友正负评价。
推荐文章︰
识饮识食识玩！十大生活Youtuber，Ming仔第几名？
智慧与美貌并重，香港十大区议员候选美女！
