為我嘅部落格寫第一篇文～ 今日簡簡單單教大家造BLYTHE水晶膠眼片～

其實我都係開始整呢個無幾耐，一直睇人地啲滴膠眼片都好靚，所以淘左個眼片模返黎造～

依家開始喇～

 

工具／材料清單：

1) 水晶膠／滴膠  （我呢個係响yahoo拍賣買的，一set＄50蚊，我覺得幾好，無臭味，少氣泡）

2) BLYTHE 眼片矽膠模 （係淘寶淘的，幾好用，容易脫膜，而且大小岩岩好）

3) 乾粉彩 （調色用）

4) 容器，攪拌棒 （我用一個矽膠兜用黎mix啲膠，支棒就係平時外賣熱飲果支，真係極級好用，不防外賣拎多支黎用）

5) 裝飾：閃粉／閃片／指甲貼紙

 

好喇，準備好就開始郁手喇～ 建議大家整嘅時候放定張濕紙巾，因為啲膠都幾麻煩～

 

1）首先我地要按比例（通常係3A：1B）但係要睇落你買果款係咩，就加入容器入面攪勻

2)  攪嘅時候要慢慢搞，啲膠係未完全攪勻之前會見到啲膠一絲絲咁嘅

3）慢慢攪到勻晒之後就按喜好加入你想要嘅閃粉／顏色

 

4) 攪勻左之後，最好就靜放佢20分鐘左右，等啲氣泡消失，如果有氣泡倒入模就唔靚，大氣泡如果係表面仲會搞到穿㝫添

 

5) 如果用指甲貼紙黎做裝飾我就通常放左入模先，然後倒膠

 

6) 如果係閃片，我就會先倒膠再放閃片，如果放左閃片先倒膠，閃片會浮起，或者個底會有氣泡

 

7) 如果用眼圖，我就會先落少少膠，然後將眼圖放入去，放入去記住用手指壓一壓實，然後就再倒膠係上面填滿

 

8) 完成晒，就放佢係一個乾燥陰涼嘅位置，乾嘅時間隻隻膠都唔同，我一般都會等12個鐘先拎起

9) 如果未完全乾就拎起，會容易留指模係上面～ 放左圖紙果啲眼片都要等耐少少先，不過我一般都等起碼12個鐘，所以都無問題的

 

10) 通常仲有啲膠剩嘅，我就倒埋落去個拉膠模度，唔好晒～

 

造完就幫你個囡戴啦～