睇书唔一定要睇主流嘅！十大知名独立出版社你又知几多？

文化沙漠？出版林立！

好多人都听过都讲过，香港，根本就无文化可言，只系一座文化沙漠嘅城市！咩叫沙漠？即系咩都无，无人关心香港文化，甚至可以话系香港文化已死。但事实上，呢种讲法系站唔住阵脚嘅，因为单单睇香港有几多出版社存在，出咗咁多唔同类型，各有特色嘅书籍，已经证明咗香港唔系文化沙漠喇！不过，香港到底系咪一座热爱文化嘅城市，就系靠各位香港人有几支持。咁香港人除咗识去大出版社买书，又有冇去睇睇其他相当高质嘅小型出版社？今日就等DailyView用网路大数据，数出香港知名嘅十大独立出版社，等大家可以多多支持喇！

DV小教室：网路温度计透过《KEYPO大数据关键引擎》，观测、爬梳港澳地区近万个网站、频道，其中包括新闻频道、各大讨论区、FB、IG以及Blog，从中取得资料样本数，并以AI语意程式作数据分析。「网路热度」为主题项目相关的网路posts和comments ，数值愈大代表主题项目的讨论度愈高。

10 次文化堂（1104笔）

——敢言、自主

咩叫次主化？有次文化，即系有主文化。次文化未必差过主文化，不过可能因为各种权力，令次文化唔受重视。次文化堂嘅成立，正系要话畀世人知，香港除咗主流文化，仲有其他重要嘅文化，值得我哋重视。好似我哋香港人讲嘅粤语咁，《次文化语言：香港新方言概论》、《小狗懒擦鞋：香港粗口文化研究》、《香港潮语话斋》咁，都令我哋更进一步认识自己独特嘅本土文化。好多作者好似陈云、黄毓民、刘天赐、吴志森等，都系一时人物，可能主流唔Buy佢哋，但佢哋讲嘅嘢好有意思。次文化，系香港重要文化。

image source:FB／次文化堂 Subculture

9 小树苗教育出版社（1111笔）

——儿童课外读物

香港儿童课外读物出版社老字号，小树苗教育出版社成立喺1988年，真系陪伴咗一代又一代嘅香港人成长。好多八十、九十后嘅童年，都曾经睇过小树苗出版嘅书籍。而未来，下一代，下下一代嘅细路仔，好可能都会继续咁睇《小朋友最想知道的十万个为什么》，培育、鼓励佢哋勇敢发问，有科学家嘅好奇心；《我的小百科：恐龙图鉴》，满足小朋友对怪奇生物嘅幻想，令佢哋有更加多嘅想像力；《伊索寓言》，等佢哋读更多有趣嘅故事，唔单䢋增进小朋友嘅语文能力，从寓言中了解人生道理。小树苗，用书本灌溉。

image source:FB／小树苗 Sesame Publication

8 大银力量（1142笔）

——关怀老人社群

「人生下半场三大不安：健康、经济、孤独。」大银力量，点出咗人生必经，但最少人关注、讨论嘅阶段，即系「老、病、死」。每个人如果无咩意外，顺利咁过完大半世，就必须面对随住年纪老迈而出现嘅健康问题，伴随住退休无收入之后嘅经济问题，仲有身边人一个又一个离开，得返自己嘅孤独问题。晚年人生三大问，大银力量嘅成立，正系为咗陪伴老人家一齐思考、讨论同面对呢三大问，佢出嘅月刊《大人》、出版生死关怀题材如《香港好走》、《见棺材》、《生死学堂》等书籍，我哋一齐阅读人生三大问。

image source:FB／大银 Big Silver

7 突破出版社（1195笔）

——青少年大突破

香港要有文化，有文化，仲要将文化发扬光大传递落去，后生一代嘅文化培育、阅读习惯可谓至为关键。突破出版社，呢间机构嘅宗旨正系为咗令青少年嘅需要而生，希望透过文化活动发掘佢哋全人潜能。市面上我哋见到突破出版嘅书籍，好似香港人都见过嘅火柴人咁，喺佢哋嘅突破出版社书店经过都会见到。突破出版社好多正面、阳光嘅书，例如《相爱不伤爱——感情与理智的拿捏之道》，就相当畅销。除此之外，都仲有突破书志 Breakazine!，杂志都有唔同嘅主题，内容深入浅出，相当高质，留意香港时事点可以唔撑？

image source:FB／突破书籍

6 香港文学生活馆（1209笔）

——香港有文学

香港文学生活馆嘅成立，一再反映咗本土文学喺香港生存唔容易，皆因喺台湾、大陆，文学馆都系有官方畀钱支持，有资源咁建立出嚟。但系喺香港，香港文学馆之所以可以喺2012年成立，全部都系靠民间自发嘅力量。香港文学生活馆唔止系有空间展览嘅简单，佢同时都有出版书籍，承担香港文化传承嘅责任。话明系香港文学，呢个馆出版嘅紧系主力喺香港经典文学作品喇！好似香港文学女神韩丽珠第一本散文集《回家》，艺术家、音乐家黄仁逵散文集《放风》，真系文青必读！最紧要系，香港唔系沙漠，香港系有文学！

image source:FB／香港文学生活馆

5 kubrick（1335笔）

——香港文化聚散地

kubrick喺2001年成立，最初只系为咗满足香港百老汇电影中心观众嘅需要，放咗书籍、影碟、唱片等畀佢地享用。但系去到2003年，kubrick呢间书店愈做愈大，开始出版咗第一本书，之后持续出版，至今已经出版数百本书。kubrick出版嘅书籍内容，主要系香港文化、文学，推动咗成个香港文化界嘅发展。好似李智良嘅散文集《房间》，黄仁逵、陈慧、王良和、林超荣、区家麟、麦树坚及韩丽珠等人合著《年代小说˙记住香港》，仲有好多名家如昆南、廖伟棠嘅著作咁，如果你自认系香港文化爱好者，佢出版嘅书点可以错过？

image source:FB／kubrick

4 绿脚丫（1447笔）

——亲子齐读书

做家长嘅朋友，相信都一定有听过绿脚丫呢间出版社嘅大名。点解？皆因为人家长者，多多少少都想自己嘅细路仔读多几本书，有多少少文化气质。不过讲就容易，细路仔唔定性，边有咁好心机同你睇书先！绿脚丫就话畀你知，其实唔难，有心嘅话，一定会揾到方法。绿脚丫已经有搞咗好耐、好成功嘅「亲子读书会」，细路仔未必想睇咁多字，咁就不如一齐读绘本喇！绿脚丫亦都出版咗唔少绘本，好似《香港游》咁，内容充满教育意义不特止，仲要以香港做主题，大人细路睇落都会特别有亲切感，有小朋友嘅一定要买。

image source:FB／绿脚丫

3 创造馆（2107笔）

——时代的巨浪

2013年，作家余儿创立咗创造馆出版社，由最初一人经营到而家有数十位嘅知名香港作家驻馆，正正反映咗创造馆嘅成功。到底系时势造英雄，抑或英雄造时势？喺创造馆，或者系两方面都有，相辅相成。创造馆嘅理念，系面对如今纸本式微，创造馆就积极为作家、作品寻找跨媒体改编嘅机会，希望令创作人付出嘅心血，得到应有嘅回报。创造馆有出版好多畅销作品，好似《今晚打丧尸》、《婚姻这种邪教》、《九龙城寨》等等，一再为书本揾出另一条生路，平衡文化、商业之间的唔同，创造出香港文化界嘅巨浪。

image source:FB／创造馆

2 点子出版社（3024笔）

——高质流行读物

点子出版社，喺香港引领网路小说成为实体书，造成香港网路文学热潮嘅重要推手。好多人都话香港无人睇书，出咗书无人买，好多出版社都要收档之际，偏偏香港好多后生仔都仲有睇书、买书。不过，后生仔女未必钟意睇经典作品，佢哋嘅阅读习惯唔系纸本，而系手上嘅手机，系网路上嘅高登、连登。有见及此，点子出版社正系睇中咗香港人阅读心态嘅转变，推出好多网络作品，包括《Deep Web File #网络奇谈》、《诊所低能奇观》、《天黑莫回头》同《壹狱壹世界》等，大热畅销，证明咗香港人都仲好钟意睇书。

image source:FB／点子出版 Idea Publication

1 本土研究社（4691笔）

——香港民间学者

本土研究社喺2014年注册为非牟利组织，成员系一群有志推动民间研究，同关注香港发展嘅香港人，同时亦都系俾大家共同参与嘅实验平台。哇，讲到研究呢两个字，好似不食人间烟火咁㖞。本土研究社嘅主张，正系要将研究带出象牙塔，做贴地嘅本土意识、土地问题、社会议题等主题研究。好似香港人呢几年成日都会听到嘅「丁权」问题咁，本土研究社就出咗《丁不厌诈：新界套丁研究报告2017》。另外，香港成日话土地供应有问题，搞到无屋住，又有本《不是土地供应：香港土地问题的迷思与真象》，睇个名都想睇！