我感覺宋澤萊咧分析這首〈伊咧等我〉分析佮真詳細，我必須承認我家己實在無法度閣看出啥物矣。

　　尤其是佇色緻的部分，宋先生講出我心內感覺著煞毋知欲按怎形容的物件，就是色緻予人的感覺，毋管是「金色」的相思海、「月光」、「西照日」、抑是「cocoa」，攏𤆬出黃色佮紅色的色調，攏是溫暖的色緻，予規首詩充滿希望佮熱情的感覺，彼是一款性命的活力，這是我規首詩上佮意的部分；頭一擺讀這首詩的時陣，感覺心內是滿ê，這是真特別的感覺，我以前毋捌有--過，雖然無啥習慣詩內底情愛的部分，毋過因為作者採用按呢的色調，加上這首詩是「我」的第一人稱，規首詩讀落來感覺家己若像彼个男主角，對暗時有期待、對未來有期待，日子逐工攏遐爾單純，充滿了希望。

　　這嘛是我第一擺讀著佮Siraya有關的詩，予我對Siraya當時，三、四百年前的生活有真濟的想像，是美好的想像，雖然「cocoa」已經暗示當時有殖民者的出現，毋過人民的生活猶是單純ê，是上簡單的滿足的生活。

　　毋過講著「原始主義」的藝術，我感覺講「東方主義」是會當了解，毋過對另外一方面來講，我感覺按呢去定義嘛是真微妙，雖然我按呢講有三人成虎的嫌疑，毋過我的確感覺若是遐爾濟人攏用仝款的角色特色來形容「原始」的民族，我真正感覺會有共同的形象產生毋是無道理ê，必然是有啥物來影響著創作者的想法；若是講創作者是刻意欲營造出一種原始的「感覺」所以共一寡印象「放大」矣，按呢我感覺是會當講是「東方主義」，毋過若是純粹咧寫一種「印象」，我感覺就毋是，因為若是欲講，「原始」的確是有伊ê一寡眾人共同所理解的部分佇咧，這毋是「東方主義」，這是一个客觀的事實，嘛因為按呢的事實產生一種想像，共按呢的想像囥佇所有的原始文化當中，尤其是以帝國主義的觀點來針對東方文化有按呢的想像，我感覺才是「東方主義」；若是以這首詩來講，詩人的出發點是咧描寫一種臺灣原始民族的生活，佇我看--來並無算是真正的「東方主義」，上濟算是較浪漫的想像佮描寫爾爾，而且是一種美化的描寫，我感覺並無需要用「東方主義」來定義伊。