毋知影臺灣像番薯的講法是對當時開始--ê。

　　我感覺〈人講你是一條番薯〉毋但咧諷刺殖民者爾爾，嘛有對臺灣人恨鐵不成鋼的感覺佇內底。

　　毋知敢是因為頂擺吳濁流的作品的緣故，予我對臺灣的現狀佮臺灣人對臺灣本身的看法有真大的反思，佇這擺林宗源的〈人講你是一條番薯〉內底，我感覺我感受著的是另外一方面，對臺灣人無夠有志氣的無奈。

　　我感覺第一段的「勼」，用到予我印象深刻，這是一个真有畫面佮感受的動作，充分代表「番薯」的軟汫，完全毋敢面對現實的態度；閣有「連綿會謝的花」，我感覺會當用兩个角度來看，一个是我一開始想著ê，「連綿」的諧音「連鞭」，變做「連鞭會謝的花」，雖然番薯有時花開，煞攏無偌久就謝去矣、另外一个是，我發現我竟然毋知番薯花是啥物，所以我去網路頂懸揣看覓，才發現伊其實就是阮定定咧講ê碗公花，其實是真水的花，細漢的時陣定定會當佇路邊看著，有影是「連綿」的花，毋過雖然是媠，煞真少人會用心咧欣賞，碗公花閣予日本人號一个名，叫做朝顏，是咧講伊到暗時就會謝去矣，真正是「會謝」的花；講到底，這兩ê猶是會當囥做伙講，伊𤆬出--來的意象就是臺灣人的反抗抑是講臺灣人賰ê淡薄仔的媠攏予統治者破壞矣，而且臺灣人定定無法度擋偌久，一下仔就謝去矣。其實閣來看第三段，詩人閣寫著「開芳花結恁的夢」，我想對詩人來講，花就象徵「夢」，若欲佮第一段連結，「番薯花」就象徵了臺灣人的反抗佮為家己所做的拍拚pah！

　　第三段的「紅色」的血佮頭兩段的「白白」的目屎的色緻是差真濟，我感覺「白白」的目屎，若是用較敏感的角度來理解，除了有雙關的意思以外，我感覺嘛代表1977年的彼个戒嚴年代，白色恐怖的犧牲所流的目屎，詩人暗暗咧講，毋過嘛咧講遐ê犧牲其實是白白犧牲矣、第三段「紅色」的血，紅色代表熱情，這是當然無問題ê，毋過我讀起來煞感覺嘛是欲有犧牲才會當沃花，才會開出美麗的花蕊。

　　〈人講你是一條番薯〉予我的感覺就是一首感情真複雜的一首詩，有對政權的諷刺佮不滿，嘛有對家己予人迫害失去自我煞毋是選擇有啥物改變的性格無力煞毋知影欲按怎講起，讀來是真有一番感受。

　　佇〈講一句罰一箍〉內底，這是一篇咧描述臺灣一段時期真正發生過的代誌，詩人用無遐爾激烈的口氣，咧控訴伊的不滿佮受傷，毋是直接的批評也毋是卑微的怨嘆，反諷的手法會當真簡單就引起別人的共鳴。

　　我感覺這首詩予我一看就會沉佇內底，真有畫面佮情感ê想像，雖然逐段攏是短短幾逝，煞有真濟物件佇內底；以早按呢的代誌我是聽過，毋過對我來講就是一段往事，是一段真悲哀嘛予人受氣的歷史無毋著，毋過我其實毋是真正有法度去想像彼時陣的人的心情佮實際上的情形，林宗源的這首詩真簡單就共我𤆬入彼个時空當中矣！

　　詩人用「阮」，毋是用「咱」，除了諷刺的感覺閣較深以外，嘛予讀者有家己的心情的感受，彼是「阮」，是「我的」感受，伊毋是用「咱」來代表大多數的人的心情佮指控，嘛無強迫別人，共別人畫入伊的感受當中，毋過煞閣較會當予人讀起來有閣較深的感受，敢若當咧讀的我就是詩人，伊的感受嘛真簡單就進入我的心底。

　　這兩首詩予我真濟學習佮感動，雖然攏無啥物真華麗的詞，毋過煞會當感動人的心，就若像〈講一句罰一箍〉，咧寫按呢的一首詩的時，詩人猶是選擇用台語來寫，就會當感受著詩人心內底的堅持佮真深的對這塊土地的情感矣。

查看原文 >>