這擺的兩篇論述的文章，攏是佇二戰時代所發生的代誌，嘛予阮看著戰後的臺灣是啥物模樣，彼个時陣的人是啥物感受。

　　我感覺彼个時代的臺灣人實在可憐，永遠毋知影家己是啥物人，到底是臺灣人、日本人、抑是中國人？《亞細亞的孤兒》就是佇按呢的認同無法度確定的時陣所產生的一款必然，我認為是必然；雖然這个必然毋是臺灣人家己造成、家己願意ê，是佇長期予外人統治的環境下，所產生的一種悲哀的習慣。

　　毋過我嘛感覺會產生按呢的結果佮無法度揣著認同，臺灣人嘛袂當講完全無關係，Satre講，人有自由意志，所以阮家己所做的選擇家己愛承擔，人是按怎是人，是因為伊選擇做為一个人，按呢講，重點就是彼時陣的臺灣人敢有選擇欲做一个臺灣人？而且選擇像Jaspers講ê，去實現家己選擇的存在？

　　這是臺灣一直以來的問題，毋管是戰後的彼个時代抑是這馬，我感覺著算是到這馬，真濟臺灣人的奴性猶是存在，永遠攏是別人較好，著算是我家己，嘛定定咧思考講我對臺灣的愛到底到啥物程度？宋澤萊佇評論《亞細亞的孤兒》的時陣講著：「他正逐漸告別自己是一個日本人或中國人的認知，暗中往台灣人的方向移動，只是想當個完完全全的台灣人的勇氣還是很不足夠罷了！」這句話敢若共我拍一ê雄雄驚醒，我雄雄予伊提醒著這个事實──我嘛是按呢！著算我閣較按怎無想欲承認，這句話予我無揣藉口假的時間，就講出這馬真濟人心中的事實。

　　我感覺我毋是認為家己是日本人抑是中國人，我的確是一个臺灣人，毋過這馬的世代當中，有人可能是佇中國佮臺灣之間的認同，毋過我感覺閣較濟ê是像我按呢，願意承認家己是一个臺灣人，煞無真正的勇氣來面對佮了解臺灣猶毋是一个國家的事實，嘛無真正的行動來「實現存在」，證明家己對這片土地的認同佮對想欲成為一个國家的強烈向望。

　　這擺的心得雖然是咧寫悲劇文學佮諷刺文學，毋過因為伊予我的感覺是激起我重新思考家己佮臺灣的關係、家己佮國家的關係、閣有我對這片土地的愛敢是真正的愛？種種的思考佮想法予我真大的衝擊，所以我選擇用按呢的主題來寫這擺的心得。

　　我感覺佇吳濁流的這兩篇小說內底，清清楚楚寫出的毋但是彼陣臺灣的狀況爾爾，諷刺的是這嘛是這馬社會當中會當看著的現狀；毋過予人較安慰的是，這馬的世代咧大漢，無經歷過一寡奇奇怪怪統治者的這寡少年（敢若猶是有，算起這馬的），in會當重新揣著單純對這塊土地的認同佮連結，阮欲做ê就是保護in莫袂記家己是siáng，莫予統治者操弄拍亂in應該有的自由思考，按呢臺灣人才有可能擺脫長期以來無法度清楚認知、甚至否定家己的習慣，按呢才袂看著佇吳濁流小說內底的悲劇予臺灣人變做一款必然，這擺的咱無時局的限制佮經歷，阮熟似歷史嘛共伊當做教訓，雖然這馬的現狀嘛予人一種真深的無力感，毋過重要的是咱「願意」做啥物？

　　阮已經有機會來熟似家己，無親像彼當陣的臺灣人，為著siáng咧相戰攏無一个對心底明白的方向，阮佇這个時代，是毋是願意來做寡啥物，來擺脫歷史予阮的重擔，莫予時代變做諷刺、予悲劇變做必然，予別人看予清楚，我是臺灣人，只是臺灣人，毋是別个，而且我真正想欲做一个臺灣人！