我感觉宋泽莱咧分析这首〈伊咧等我〉分析佮真详细，我必须承认我家己实在无法度阁看出啥物矣。

　　尤其是伫色致的部分，宋先生讲出我心内感觉著煞毋知欲按怎形容的物件，就是色致予人的感觉，毋管是「金色」的相思海、「月光」、「西照日」、抑是「cocoa」，拢𤆬出黄色佮红色的色调，拢是温暖的色致，予规首诗充满希望佮热情的感觉，彼是一款性命的活力，这是我规首诗上佮意的部分；头一摆读这首诗的时阵，感觉心内是满ê，这是真特别的感觉，我以前毋捌有--过，虽然无啥习惯诗内底情爱的部分，毋过因为作者采用按呢的色调，加上这首诗是「我」的第一人称，规首诗读落来感觉家己若像彼个男主角，对暗时有期待、对未来有期待，日子逐工拢遐尔单纯，充满了希望。

　　这嘛是我第一摆读著佮Siraya有关的诗，予我对Siraya当时，三、四百年前的生活有真济的想像，是美好的想像，虽然「cocoa」已经暗示当时有殖民者的出现，毋过人民的生活犹是单纯ê，是上简单的满足的生活。

　　毋过讲著「原始主义」的艺术，我感觉讲「东方主义」是会当了解，毋过对另外一方面来讲，我感觉按呢去定义嘛是真微妙，虽然我按呢讲有三人成虎的嫌疑，毋过我的确感觉若是遐尔济人拢用仝款的角色特色来形容「原始」的民族，我真正感觉会有共同的形象产生毋是无道理ê，必然是有啥物来影响著创作者的想法；若是讲创作者是刻意欲营造出一种原始的「感觉」所以共一寡印象「放大」矣，按呢我感觉是会当讲是「东方主义」，毋过若是纯粹咧写一种「印象」，我感觉就毋是，因为若是欲讲，「原始」的确是有伊ê一寡众人共同所理解的部分伫咧，这毋是「东方主义」，这是一个客观的事实，嘛因为按呢的事实产生一种想像，共按呢的想像囥伫所有的原始文化当中，尤其是以帝国主义的观点来针对东方文化有按呢的想像，我感觉才是「东方主义」；若是以这首诗来讲，诗人的出发点是咧描写一种台湾原始民族的生活，伫我看--来并无算是真正的「东方主义」，上济算是较浪漫的想像佮描写尔尔，而且是一种美化的描写，我感觉并无需要用「东方主义」来定义伊。