吴卓羲的微博上周三（7日）凌晨惊现国产乳模张馨予的自拍床照，事后吴卓羲主动同记者交代事件只是一场误会，更承认二人「拍过拖」，首次确认女友关系。摆明被人出卖仍要处处维护，曝露了吴卓羲与张馨予的相处，并非如外界所想般男尊女卑。据知爱自拍的张馨予，除了喜爱在男友家拍下过夜证据，以便随时宣示主权外，更同Edison（陈冠希）一样有铺影相瘾，与吴卓羲拍拖短短1年多，留下唔少「美好回忆」。女友有嘢揸手，吴卓羲要卖甩呢位国产「飞佛」，惟有甘心做爱奴，听教听话。

 
食女无数的32岁吴卓羲，入行11年绯闻多到数唔晒，由小花马赛到阿姐级的佘诗曼徐子珊一一追到手，却从未公开承认与圈中人拍拖，即使当年多次被影到与官恩娜断正，仍死口唔认对方的女友身份。

代女求情
食完花旦唔认数，偏偏对24岁的36F国产模张馨予投晒降。二人去年合作拍摄内地电视剧《大丫鬟》挞着，张馨予不时人肉速递来港密会男友，但机心重的张馨予「送外卖」之余，不忘在吴卓羲屋企自拍私相放上微博高调泄密，又疑似放料畀传媒，令二人密会断正。上周更将行动升级，趁男友挂住出席Toby婚宴，直接用吴卓羲的微博户口post床照，视男友私隐如无物。微博被入侵，吴卓羲无奈焗住认拍拖，但被出卖后竟然冇炮轰有人博出位，反而代女友求情，「佢入行日子好短，意识唔到呢啲嘢，唔小心做咗，佢同我讲唔好意思，知自己错，希望大家唔好迫得佢咁紧！」咁有风度，原来吴卓羲有错在先。Toby婚宴当晚，吴声称直踩after party到凌晨5点，实情孖住林峰去无线音乐总监邓智伟私窦狂欢，但估唔到大话被前度佘诗曼踢爆。

惨过坐监
前Cookies成员、现时在港台做DJ的区文诗（图），上周在节目大爆吴卓羲受张馨予严密监控，「佢哋两个沟通方法好特别，佢哋唔单只有晒对方微博、facebook同email嘅password，仲有个特别嘅rule，例如张馨予喺外地做紧嘢佢会WhatsApp阿Ron，『你喺边呀？』。如果阿Ron同朋友食紧寿司，佢就要即刻影低嚿寿司send畀张馨予睇，又或者show个location畀对方知。」

前度博入行
疑似成为张馨予床照对手的国产男陈锡，与张馨予是大学同学，二人分手后，陈锡在江苏无锡的夜场做歌手，在当地酒吧界略有知名度，更自称是「娱乐圈人士」。经常喺微博摆自己潮look的陈锡，想入行不妨请教吓攻心计前度！

随时爆大镬
多次被张馨予摆上枱仍未狠撇对方，据知全因女方有嘢揸手，令吴卓羲唔敢轻举妄动。「个女仔（张馨予）摆明博出位，阿Ron（吴）自己都知㗎，我哋成班friend初时都唔知点解硬系唔肯撇佢，后来有次出去饮嘢，阿Ron几杯到肚后先同我哋讲，佢话惊个女仔乱嚟，会好似潘霜霜咁爆大镬，先忍佢咁耐咋！」吴卓羲身边人透露。

「影相唔担心！」
男友有把柄喺自己手，张馨予定过抬油，但为免遭吴卓羲的粉丝狂插，惟有扮死狗道歉。「我很谢谢他，在这段时间还为我讲这么多，他是最大受害者，但还这样包容我。这次真是我不小心登错微博，我是最大的罪人，我真的没意博宣传和宣示主权！」但忏悔一轮后，张馨予又继续晒命，「我也有他的MSN密码，主要想对方更加安心。」分分钟步好兄弟林峰后尘，吴卓羲周一（12日）表示唔怕有淫照流出，「唔惊，因为冇！普通影相我绝对唔担心！（佢同前度啲床照家仲喺网上疯传㖞？）呢啲登过晒，我一早知啦！其他唔答喇！」有个钟意自拍嘅女友，吴卓羲今次食错嘢喇！

同女唔同命
钟情长头发、有身材女仔的吴卓羲，对待前度官恩娜同现任张馨予完全两种态度，一个死口唔畀名分；另一个就锡到㶶争住公开，唔通港女真系唔值钱？

栢芝师妹宣传易
国产女为上位一向不择手段，张馨予9月同吴卓羲喺北京断正，隔几日就有消息指佢会加盟张栢芝的公司；咁啱今次潜行微博事件又撞正来港拍贺岁片，夹都冇咁准，话冇放料都好难㖞！ ####

拥有36F魔鬼上围的张馨予有样有身材，博出位手段亦属专业级数，吴卓羲真系好难走得甩！

出事微博吴卓羲的微博惊现张馨予自拍床照，以为两人决定公开恋情，但原来连吴卓羲都唔知情，事发几个钟更将呢条微博铲走。

我哋系拍过拖，畀啲空间我哋！真实对白 8/12 认拍拖潜行微博事件后，吴卓羲罕有主动同记者解话，代女友求情嘅佢，仲叫传媒畀空间佢哋发展。

12/12 继续帮口吴卓羲周一回应张馨予床照时，除坚称自己冇影过，更帮最近有床照再流出嘅女友拆弹解围：「我唔识佢以前𠮶个（男友），呢啲相旧闻嚟啦！」

区文诗再爆：当事人讲先知！大爆爱奴吴卓羲秘密，区文诗坚称消息来源非常可靠，「我唔识佢两个，但我作为传媒人都系报道事实，其实呢啲嘢都要当事人讲出嚟先有人知 ！」

挂住玩吴卓羲参加Toby婚宴当晚，同场有绯闻女友佘诗曼做姊妹，又难怪张馨予担心到要入侵微博引男友关注。

报行踪即使做正经嘢，吴卓羲都会拍低工作环境，证明自己冇出去夜蒲。

管三餐除咗做嘢要报告，连食乜都要管。呢日吴卓羲同朋友食日本嘢，都影低畀女友睇。

张馨予同陈锡的床照意识大胆，虽然辑相疑似由女方揸机，但出名后的张馨予声称被前度利用博出位！

国产味十足的陈锡成日喺微博晒肌。

张馨予本周三将来港拍贺岁片《喜上加囍》，吴卓羲已率先自爆女友唔会蜗居佢屋企，出口术引开狗仔队。《苹果日报》图片

Benz跑接送今年6月张馨予来港，吴卓羲亲自揸过百万Benz跑去机场接机，更落手落脚搬行李，唔敢劳烦女友。《苹果日报》图片

送暖到北京拍剧拍唔停，吴卓羲今年9月专程飞北京陪女友撑枱脚，去到咁远都断正，但唱K选择继续相信女友冇放料。《苹果日报》图片

12/12唔肯回应前度同国产模拍拖，官恩娜周一出席活动时坚持唔回应：「唔关我嘅事唔答，人哋嘅事我唔方便讲！」唔踩多脚算有品。

自己返归 06年有杂志影到官恩娜一早由吴卓羲的寓所离开，当时Ella衣衫不整又拎住一袋二袋，但唱K都唔肯做司机车佢返屋企。《忽然1周》图片

张馨予同栢芝拍《河东狮吼2》成为好姊妹，现时更成为栢芝旗下首位艺人。

张馨予月头来港出席活动，佢话呢个系佢第一个香港商业活动，希望「多来赚点钱」，想赚港纸，难怪要借唱K宣传啦！