「樂壇小強」阮民安三年抱兩嬌妻為日本原宿女神

現年38歲嘅E-kids成員阮民安（Tommy），出道17年雖然星路平平，但就擁有一個幸福嘅家庭，2017年同老婆Eva結婚，同年生咗大仔阮治童，而日前佢就宣佈老婆平安順產誕下次子，重3.18公斤，三年抱兩！

撰文：Kayla｜圖片來源：Facebook、《Kawaii International》截圖

陪老婆入產房

喜獲麟兒嘅阮民安，接受傳媒訪問時表示，自己因為怕血，所以上一胎冇陪老婆入到產房，老婆上次經歷咗20幾個鐘先生到大仔，令佢覺得好內疚，所以第二胎就克服自己怕血嘅問題，陪老婆入產房生BB：「今次睇住成個過程，佢好辛苦，一度想放棄。」

阮民安仲話產房個護士認得佢，叫佢唱首歌氹老婆開心：「最後我都冇認真唱，只係不停咁分散佢注意力。」好彩第二胎都無驚無險，順順利利出世同爸爸媽媽見面！

老婆Eva為原宿女神

阮民安同老婆拍拖兩年，並於2017年結婚，同年生咗大仔阮治童，不時見到Eva喺Facebook上分享同仔仔嘅合照，非常溫馨。原來阮民安老婆Eva大有來頭，有「原宿女神」之稱嘅Eva，原名張倚雯，身兼模特兒、設計師、DJ 等多重身份，工作不時都要穿梭日本、香港、中國內地，有「港版Kyary Pamyu Pamyu」之稱。