【大坑美食】两草:两草野食到乜?
两草
用餐日期:2018/12/16
前段时间经常被位于大坑嘅两草洗版,收藏已久,早大半个月前,某日晚上要喺湾仔睇演唱会,流连港岛,唔想食到太丰富,饭气攻心,造就机会光顾。
小店较邻近天后,我地由铜锣湾行过去变相有点远,门面绿色,好显眼易找。见过旧评论话要背贴背坐,可能我每次都等到人地过气先到访啦,当晚客人唔多,未觉逼狭。
餐牌选择唔多,贵精不贵多,两款饭、肉骨茶、数款小食,价钱亲民贴地,呼应店名两草,廿蚊起有交易嘅意思,睇番只有小食系两草野,梗系啦,唔洗揾食咩。
一人点左一客饭,外加咖央多士。埋单100蚊唔洗,够食唔会爆肚𠮶种。好多人会试肉骨茶,我本身唔系特别喜好,就无谓试喇。餐点即点即制,约十分钟上枱
香煎脆边蛋肉饼饭 $30
滑蛋叉烧饭 $30
新鲜猪肉饼煎香,冚上㶶边太阳蛋,淋上豉油、加葱,卖相靓仔,见相都认得系出自两草。饭量唔多略湿,一般饭碗大啲咁。
肉饼入口松软,轻轻煎脆,肥瘦适中。太阳蛋名符其实㶶边,蛋黄流心,即制食物好少过唔到我关
叉烧切条,当然冇成块食咁爽,配埋啱啱熟嘅炒蛋,中规中矩。
斑兰咖央西多士 $20
多士一片开二,薄片香脆度高,自制咖央酱适量,冇甜腻感,味道同以前亲朋戚友带手信番黎嘅椰子糖一样。
食材简单,屋企都煎得到嘅肉饼、蛋,唔系复杂野,胜在价钱唔贵。快食又唔洗太饱黎讲都可以,味道家常,谂得到嘅味道,唔好讲惊喜。
两草
地址:铜锣湾铜锣湾道126号
Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: [email protected]