許志安趁新年去咗外國滑雪，留低鄭秀文(Sammi)一個喺香港，雖然同老公短暫分隔兩地，但Sammi不愁寂寞，仲話一向好享受單獨一個人，有時又會趁唔洗陪另一半約吓朋友食飯見面，而呢日佢就約咗合作無間嘅杜琪峯導演食飯，仲拍片開心share一分鐘，到底二人嘅對話係乜⋯

撰文：東方新地 |圖片：新傳媒圖片，鄭秀文IG、許志安、梁家玉Instagram

鄭秀文IG拍片一分鐘

Sammi日前凌晨喺Ig 出咗新post，佢同杜琪峯排排坐喺鏡頭前，杜sir仲搭住佢膊頭，然後Sammi就問杜sir今日咩事請食飯，點知杜sir就話：「冇嘢！」

之後Sammi同杜sir介紹Ig嘅拍片功能：「好短咋，得一分鐘咋，你唔好發咁多言呀！」明顯好少玩Ig嘅杜sir，就顯露出好奇一面，佢反問Sammi話：「咩一分鐘，咁做乜要講啫，你做乜唔講耶穌？你唔講你愛上帝，你要講喎，如果得一分鐘，你要話畀人聽你愛仁慈嘅上帝喎！」

杜sir忽然講唔停，Sammi惟有笑住咁答佢：「我愛呀！但我講得太多，唔能夠逼，信仰呢樣有自由嘛！」點知杜sir有十萬個為什麼咁繼續問：「咁點解要一分鐘呀?」全程妙問妙答，Sammi都招架唔住：「冇呀！拍啲片上載吓之嘛！」有網民就喺片段下方留言問杜sir係唔係飲醉咗。

而Sammi除咗自拍影片，仲喺Ig留下感性短文「Mi最敬重的人。早已遠遠超乎工作合作關係。他是我的良師，伯樂。每次見面總有聊不完的話題。他現在這個人生階段最希望就是能夠藉着『鮮浪潮』提攜一些新進的電影工作者。他這個人對於後輩的提攜從沒帶着一點私心，完全出自真心真意，因為他愛電影，很樂於提攜後輩，他樂於看見青出於藍勝於藍。每次聚在一起，我們都會聊天，甚麼都聊，好開心好寬心。他明白Mi、Mi也明白他。對於我來說，藉着拍戲認識了這個人和他太太杜太，Mi覺得非常無價。這十八年來沒有令我們的感情減少，反而是遞增反而是更深厚，謝謝杜sir對我的提攜和愛，每次看到他，就猶如看到父親一樣，總之，他活得開心，我就安心。」

View this post on Instagram
很難再找到一個人像杜sir,在我生命中, 如此特別, 如此難以取替. U0001f970如果真的有所謂「前一世」，他或許會是mi的父親。哈哈！ #likefatherlikedaughter #父女臉 #良師 #如果這不是緣分那就是上帝早已預備
A post shared by Sammi Cheng Sau Man (@sammi_chengsauman) on Jan 8, 2019 at 1:10pm PST

見證許志安受洗

2005年鄭秀文(Sammi)拍完電影《長恨歌》後曾患上抑鬱症，情緒一度受困擾，幸而得到朋友及信仰支持，Sammi走出陰霾康復過來，而喺2011年Sammi和安仔復合後，Sammi就帶埋安仔一齊返「港福堂」教會，同年年底安仔已決志信主，直至前年12月17日安仔決定受洗成為真正嘅基督徒。

鄭秀文：人生中其中最最最最快樂嘅事！

身為虔誠教徒的Sammi感染了結婚四年的老公許志安信主，Sammi特別揀喺聖誕節在社交網貼安仔受洗短片，她留言道：「呢個係我人生中其中最最最最快樂嘅事。呢種快樂，深到不知如何形容。分享呢條片並不是要放甚麼閃，而是帶着最大的喜悅分享這個時刻。」

Sammi喊住拍片

10年前的12月9日，Sammi在同一地點受洗，老公安仔喺同一個月份、同一個地點受浸，Sammi感受甚深，負責話拍片的她自言激動到喊，手都震埋，所以拍得好差，Sammi寫道：「呢種快樂，是來自心靈上、精神上和靈魂上的，沒有其他快樂可以比擬。安仔受浸了，我再沒甚麼需要擔心他，因為天父會帶領他的每一天。」