歐遊陷阱！貪方便ATM撳錢隨時被呃手續費

好多人都鍾意歐遊，有時買得太盡興，真係好易玩到唔夠錢使，呢個時候用海外提款就冇有怕。不過原來喺歐洲揀自動櫃員機（ATM）要好小心，如果唔係分分鐘會畀人呃錢㗎！

撰文：KM | 圖片來源：HONEST GUIDE

歐洲ATM陷阱

好多人會喺旅行前搞海外提款功能，用曬手頭上嘅現金都唔驚之後冇錢使。不過揀ATM都要好小心，事關用本地卡同外地卡撳錢原來有好大分別。

喺歐洲有啲ATM會專呃遊客手續費，佢哋唔單止數量多，仲遍佈多個旅遊景點，真係咪話唔驚！其中一間Euronet Worldwide，喺英國、德國、西班牙、意大利、匈牙利等熱門旅遊景點都設有ATM。

如果插入本地卡，ATM嘅功能唔會有咩分別，但當插入外地嘅銀行卡時，操作方式就會唔同。佢哋呃錢嘅第一步，就係要你提取大面額嘅現金，由1萬到2萬捷克克朗（約港幣3435-6870），相當於捷克當地人嘅收入，基本上冇人會拎住咁多錢周圍走。

當你選擇要提取嘅面額後，ATM會提供相當差嘅匯率。例如提取1萬捷克克朗（約港幣3435），匯率大約係20.1克朗兌1美金，比當日匯率高出15%，相當誇張。如果你決定要撳錢，仲會收埋你手續費㗎！單單拎1萬嘅捷克克朗就蝕咗15%。有網民仲見過提取1萬捷克克朗嘅收據，計計下拎完錢足足蝕咗35%。

唔好諗住去大銀行換錢就冇事，捷克最大銀行CSOB，可以提取嘅金額高達4萬克朗（約港幣13740），相對其他銀行嘅ATM換錢嘅金額更大。就算喺餐廳食完飯打算碌卡，最好選擇用當地貨幣結算，咁會抵好多！

大家喺歐洲旅行又用曬啲現金，選擇海外提款時揀ATM要好小心，唔好畀人呃錢呀！