母女感情真好~

林珊珊平日既要照顧鄭伊健、草蜢、王菀之、蘇麗珊等演藝事業，又要主持電視節目、客串電影等，忙到無時停。連囡囡李澄（西瓜）亦曾公開投訴媽咪檔期難約，有時更慘被放飛機。

兩母女互投訴其實在撒嬌，sweet爆。

近日「女母檔」為首飾品牌母親節系列拍短片，西瓜成功「獨霸」媽咪一日好開心。短片內容圍繞珊珊與西瓜母女之日常，非常寫實，例如西瓜趕上班被媽咪拉住問事情、珊珊不懂上網就大叫女兒。不用埋位的西瓜，躲在一旁用相機偷拍媽咪，笑說：「每次聽到媽咪叫我個名好自然想應佢，但未到我拍唔可以出聲，原來會心虛，好似好忤逆咁！」期間有工作人員問珊珊最理想的母親節慶祝方法，她笑說：「盡量大排筵席，7、80圍少不免，一齊嚟啦！」她又乘機向女兒暗示：「其實做媽咪最需要係愛心、關心......同埋現金！唔好再送嗰啲icard畀我......」西瓜更正她：「嗰啲叫ecard，唔係icard呀！」全場爆笑。

兩母女互動sweet爆。

西瓜又爆料指媽咪最鍾意收禮物，說：「每逢節日我都會同媽咪食飯慶祝，但之後會問我：點解唔送花嘅？點解無禮物嘅？以前成日送啲禮物唔啱佢心水。」於是珊珊事先張揚：「今年我想收手鏈和戒指。」西瓜鬆一口氣，說：「咁就好啦，真係估佢唔到，我成日都怕送錯。」

兩母女互動sweet爆。

禮物未送，西瓜先唱鄭伊健的《一個為你甘去蹈火海的人》冧媽咪：「『一個為你甘去蹈火海的人』即係指我哋，『必再回來會他熱戀的戀人』即係佢愛人啦，佢真係好忙㗎！」珊珊笑指其歌喉「一定嚇襯鄭伊健」！至於今年母親節點慶祝？珊珊說：「我唔喺香港......」西瓜說：「嗱嗱嗱，我都話媽咪好難約，即刻示範啦！」珊珊解釋：「因為我妹妹嘅囡囡喺英國讀書，趁佢最近放假返香港，就約埋你哋（指西瓜兩姊妹）同埋我媽咪，三代同堂提早食飯慶祝。咁到母親節正日，我就可以去玩啦！」

兩母女互動sweet爆。

此外，珊珊又說：「有一日我聽到佢哋爸爸同西瓜兩姊妹講：『你哋大個啦，我唔會再約你哋，由你哋約返我啦！』我覺得佢講得好啱咪照跟，點知佢兩姊妹都無約我。」西瓜反擊：「媽咪，我哋有約你，係你唔得閒咋！」兩母女表面上互相投訴，事實在向對方撒嬌，非常sweet！