兩公婆行街各有各行 囝囝黐曬洪天明 周家蔚變透明人
兩人行到離行離罅,關係好疏離......
洪天明同周家蔚(Janet)結婚7年,先後誕下兩子,6歲洪大仁(TJ)和4歲洪竟琋(JT),日前下午4點,洪氏一家四口去又一城行街買文具,難得家庭樂,但兩公婆表現非常疏離,記者跟足一粒鐘,兩人Keep住行到離行離列,兩個仔亦只會黐曬老竇,難怪被傳懷孕,Body略胖的洪太行街行到放曬蚊。
洪天明因為一家之主,所以要經常返內地工作,湊仔責任落在洪太身上,不過,主力湊不代表關係好,Janet就曾呻帶仔去玩但啲仔不領情,更被串「係Daddy畀錢」,的確好Hurt。
洪天明婚前多緋聞,婚後亦不少,最新一單發生在17年12月,當年男方被爆在上海背老婆與辣妹夜蒲後手拖手返酒店。洪太事後力撐老公,話是一場誤會,之後天明亦強調是誤會,「我冇對我太太做出任何背叛嘅嘢。」更承認事件令周家蔚不開心,不過婚姻關是未受影響。
幫阿仔揀文具
的確,拖女事件後兩公婆無大問題發生,洪天明繼續返內地開工,周家蔚如常湊仔或約好姊妹去玩,8月25日36歲牛一,洪天明更特別飛返香港賀老婆生日。不過,兩公婆出街有別一般夫妻,鍾意各有各行,感覺關係非常之疏離。當日,難得在港的天明陪兩個仔揀文具預備開學,見天明揀咗啲做勞作的工具如白膠漿,買完就排隊給錢,兩個仔一直陪住爸爸,大仔坐住小型行李箱碌嚟碌去,細仔就跳跳紮,洪太呢?不見喎。
兩公婆零親暱
洪天明給完錢,洪太就同工人現身,原來她行去另一邊看嘢。買完嘢離開,洪天明邊行邊撳電話,大仔繼續坐住行李箱代步跟住爸爸,Janet就抱住細仔殿到好後。一家人行街以一字型排開,細仔扭計落地,阿媽打喊露恰曬眼瞓,之後細仔跑前要搵爸爸抱,更邊抱邊玩老竇啲頭髮,然後眾人搭電梯再落停車場攞車,洪太呢?同老公Keep住相隔六、七個身位咁行,搵張合照都難。