兩人行到離行離罅，關係好疏離......

洪天明同周家蔚(Janet)結婚7年，先後誕下兩子，6歲洪大仁（TJ）和4歲洪竟琋（JT），日前下午4點，洪氏一家四口去又一城行街買文具，難得家庭樂，但兩公婆表現非常疏離，記者跟足一粒鐘，兩人Keep住行到離行離列，兩個仔亦只會黐曬老竇，難怪被傳懷孕，Body略胖的洪太行街行到放曬蚊。

兩仔黐實 ■天明排隊買文具，兩個仔就喺佢附近玩。

洪天明因為一家之主，所以要經常返內地工作，湊仔責任落在洪太身上，不過，主力湊不代表關係好，Janet就曾呻帶仔去玩但啲仔不領情，更被串「係Daddy畀錢」，的確好Hurt。

感覺疏離 ■記者跟足一個鐘，呢張已經係一家人最Close嘅一張相。

洪天明婚前多緋聞，婚後亦不少，最新一單發生在17年12月，當年男方被爆在上海背老婆與辣妹夜蒲後手拖手返酒店。洪太事後力撐老公，話是一場誤會，之後天明亦強調是誤會，「我冇對我太太做出任何背叛嘅嘢。」更承認事件令周家蔚不開心，不過婚姻關是未受影響。

大仔跟實 ■洪天明同仔買完文具就撳住電話離開店舖，大仔坐住行李箱緊隨。

幫阿仔揀文具

的確，拖女事件後兩公婆無大問題發生，洪天明繼續返內地開工，周家蔚如常湊仔或約好姊妹去玩，8月25日36歲牛一，洪天明更特別飛返香港賀老婆生日。不過，兩公婆出街有別一般夫妻，鍾意各有各行，感覺關係非常之疏離。當日，難得在港的天明陪兩個仔揀文具預備開學，見天明揀咗啲做勞作的工具如白膠漿，買完就排隊給錢，兩個仔一直陪住爸爸，大仔坐住小型行李箱碌嚟碌去，細仔就跳跳紮，洪太呢？不見喎。

洪天明

兩公婆零親暱

洪天明給完錢，洪太就同工人現身，原來她行去另一邊看嘢。買完嘢離開，洪天明邊行邊撳電話，大仔繼續坐住行李箱代步跟住爸爸，Janet就抱住細仔殿到好後。一家人行街以一字型排開，細仔扭計落地，阿媽打喊露恰曬眼瞓，之後細仔跑前要搵爸爸抱，更邊抱邊玩老竇啲頭髮，然後眾人搭電梯再落停車場攞車，洪太呢？同老公Keep住相隔六、七個身位咁行，搵張合照都難。

行到放蚊 ■打曬喊露嘅周家蔚拖實細仔跟實老公，兩人相距幾個身位。

同爸爸玩 ■細仔Fing開媽媽要扭爸爸抱，仲係咁玩爸爸啲頭髮。

做湊仔公 ■剛剛嘅開學日，天明負責送兩個仔返學同放學，佢話只要一喺香港就會做湊仔公管接送。

全家行善 ■年初，一家四口為慈善團體拍攝宣傳海報和短片。

三代同堂 ■周家蔚透露經常三代同堂飯敍，又經常傳片畀老爺洪金寶睇。