至爱、美味♪香芒雪花糍
屋企净返一个香甜嘅芒果Σ( ꒪﹃ ꒪)
小漫就加啲吉士馅整左一打芒果糯米糍 he hee~
大爷Mike见倒即刻Order要啰几粒返公司吔~!!!
(平时佢嘅宵夜便当都系我摆乜佢就食乜,好少有主意)
难得大爷落单当然比几粒佢做宵夜啦,真系得几粒架咋( ´益`)
其余嘅芒果糯米糍当然留返喺屋企慢慢叹啦 wakakakakaka
第二朝大爷Mike同我讲:啲糯米糍同事都话好食!
咦∑( ◦д⊙)~!!原来佢唔声唔声啰左去同同事分享
早啲讲嘛、等我整定十打八打过佢啰返公司当手信派街坊嘛(≧∀≦ )wakakaka
▼糯米皮材料︰糯米粉96克、糖20克、水160克、芒果香油1/2茶匙
吉士馅材料︰吉士粉7克、水15克、椰浆80克、无盐牛油10克、糖10克
其他材料︰芒果1/2个、椰丝适量
▼吉士粉与水混合~!!!
小漫整嘅份量好少,所以用现成吉士粉比较好,而且快、靓、正~!!!
唔洗净系整个吉士馅都要搅一大轮~
▼椰浆、无盐牛油同糖煮到大滚熄火
▼加入吉士粉溶液搅匀,再开火一路搅一路煮到滚
煮到稍为稠身就熄火~!!!
唔洗煮到好杰挞挞,如果唔系雪完之后会硬身好多,变得唔软滑架喇~
▼摊冻之后用保鲜纸盖住,放入雪柜雪1 粒钟
▼跟手到整芒果糯米皮~!!
将所有糯米皮嘅材料捞埋,搅到冇粉粒就ok
▼小盘扫上一层薄油,倒入糯米糊,用保先纸盖住~
隔热水大火蒸15分钟,摊冻~
▼雪冻左嘅吉士馅倒入挤花袋
▼芒果糯米皮洒上椰丝,Cut开12份
▼放入大大粒嘅芒果肉,要挤啲吉士馅,包成圆形
唔好咁贪心啵~!!!挤适量好喇,如果唔系会难包好多架( •̀ㅁ•́ฅ✧
▼香芒雪花糍 完成♪
▼皮薄馅靓,真材实料架٩(ˊᗜˋ*)و
系咪都好想part返粒落个肚度呢?! wakakakaka