周奕瑋還和Judy勾手指尾約定做一世好拍檔！

35歲「日本達人」周奕瑋（Jarvis）主持旅遊節目《周遊東京》系列因夠貼地，連高要求的Do姐（鄭裕玲）都公開讚好。早前他更與現年26歲、32C仙氣女神鄺潔楹（Judy）拍TVB聖誕微電影劇場《聖誕極光傳說》，二人的骰外形襯到絕。不過，現實中，Jarvis堅持不會被女神電親：「佢太麻甩同火爆唔太啱我，我哋只能拍住上搵錢。」

周奕瑋早前與鄺潔楹拍TVB聖誕微電影劇場《聖誕極光傳說》。

今次周奕瑋孖鄺潔楹再拍住上整韮菜豬肉餃子，由TVB娛樂新聞臺主播鄭衍峯（Leonard）及蘇可欣（Eunice）測試兩人合拍程度。在師傅指導下，兩人都包得有板有眼，但到自創環節時，鄺潔楹玩突圍，做出玫瑰花餃子，撼贏Jarvis做的「漢堡餃子」，連師傅都大讚話似一朵花，好靚！Judy即向師傳大耍冧功說：「送你一朵花！」蘇可欣見狀忍不住插口說：「路邊野花不要採呀！」

Judy的玫瑰花餃子，贏咗Jarvis的創意漢堡餃子。

鄺潔楹（中）冧到大廚畀個叻她，連周奕瑋、蘇可欣（右二）及鄭衍峯（右）都看不過眼。

Jarvis踢爆Judy雖然被捧做「仙氣女神」，但成身麻甩味太粗魯了，「喺加拿大黃刀鎮拍嘢時，佢戙高腳睇playback，由女神變身麻甩仔呀，唔太啱我喇，而且搵女朋友唔使太靚，太靚會冇安全感，尤其係女神，全港人就變成我情敵。不過，Judy係個好女仔，煮飯好味又會照顧人，以奶奶角度係個好新抱。」

周奕瑋同鄺潔楹勾手指尾，約定做一世的好拍檔。

在黃刀鎮時，周奕瑋喫過鄺潔楹下廚的晚餐，讚不絕口。

Judy大笑說：「咁我可釋放仙氣女神枷鎖，新一年可以改叫『鋼鐵楹』，似鐵一般勤力和堅硬。」周奕瑋取笑Judy新稱號係「鐵血女神」，希望新一年兩人以「楹楹奕奕」組合拍住上，提名「最佳電視拍檔」獎。

Judy笑言新一年可以改叫「鋼鐵楹」。

女神Judy早前拍《3日2夜》着泳衣曬料。