囡囡係爸爸的前世情人 !

現年52歲的謝天華去年再做老竇，其妻李天恩（Tina）為他誕下細女Mia，天華隨即變成「女兒奴」，連大仔謝浩飛（天天）都要行埋一邊！日前，天華揸電單車落大坑買嘢食，經過文具店都不忘揀件禮物送畀小朋友，不過見天華看來看去都是Hello Kitty同My Melody，似乎偏心了點喎！

早前謝天華與太太Tina（左）帶4歲大仔天天（中）去迪士尼玩。

謝天華於05年迎娶拍拖12年的圈外女友李天恩，努力了足足10年才誕下兒子謝浩飛。圓夢做老竇的天華錫仔錫到燶，不單止經常黐住個仔、陪他玩，更不時於社交網記錄囝囝的成長。去年兩公婆再度宣佈喜訊，Tina以45歲高齡懷第二胎，還湊夠一個「好」字！而幼女Mia出世冇耐，天華已冧滋滋指望住B女「唔食飯都飽」，今年9月底幫囡囡開1歲生日P時，這位「寵女狂」全程攬實Mia，父愛氾濫，搞到大仔都呷曬醋！

今年9月為細女Mia慶生時，謝天華全程抱住囡囡滿場飛。

而升呢人父後，從前喜愛夜蒲的天華亦修心養性，轉蒲超市、玩具及文具店，好似日前下午1點於大坑食完Lunch後，天華就揸架綿羊仔去一間素菜館買嘢食，甫泊低車，脫下頭盔、面都紅曬的天華，見個型仔頭塌鬼曬，即刻戴番頂Cap帽遮嚇醜。行到齋舖，啲員工一見到他便笑曬口，似乎天華都是熟客仔，之後買了一袋豆沙包，就快步行去附近的超市掃多幾個橙。返去攞車時，經過一間文具店，天華見到一堆好粉紅的Hello Kitty、My Melody精品，又自自然然上前看嚇、摸嚇，未知是否想買嘢返去o氹囡囡呢？最後，他買完一件禮物仔便駕車回家了。

一落車即脫頭盔的謝天華頭都塌曬兼面紅紅。

謝天華禮貌地除低副超同員工姐姐講咗兩句，對方便夾了幾件豆沙包落袋。

之後，謝天華在附近一間超市買橙。

謝天華喺文具店睇到啲卡通精品即埋去揀番件，送給家中小寶貝。

謝天華