Mag很感激「哥哥」許廷鏗和「閨蜜」陳慧敏在身邊支持她。

林欣彤（Mag）推出新歌《親愛的巨人》，希望向一直守護她身邊的林爸爸、「哥哥」許廷鏗（Alfred）及「閨蜜」陳慧敏（Vivian）等致謝，同時表達好想有能力成為他們的「巨人」，大家互撐，又希望將來的另一半像林爸爸一樣令她有安全感。

林欣彤

簽約華納唱片近一年，林欣彤先後出了四首歌，就算在疫情之下，仍推出新歌《親愛的巨人》，好受重視。Mag開心說：「新歌係為我嘅『巨人』打氣，好好彩，除咗爸爸、許廷鏗及陳慧敏外，我身邊仲有好多『巨人』，好似細佬、媽咪、朋友、Fans等，不過，佢哋都有軟弱嘅時候，我都想有能力撐返佢哋，呢首歌係由洪嘉豪作曲，陳詠謙填詞，正好寫出我心聲。」

林爸爸同林欣彤一齊拍新歌《親愛的巨人》MV。

Mag表示由細到大都好依賴爸爸，為免家人擔心，所以會報喜不報憂：「好唔開心就想靜落嚟，人愈大愈少同人傾訴，可能怕交待，所以喺家人面前會收收埋埋裝開心。不過，自從去年爸爸做過我演唱會嘉賓，再加上今次拍埋我新歌MV，接觸過我工作，見同事照顧周到就放心得多。」

去年Mag開個唱邀得林爸爸上臺開金口。

對於經歷過兩次失聲低谷，Mag坦言長大了，「學識放過自己，唔好對自己太苛刻，要好好享受唱歌。」她又指出，不開心時好需要身邊人明白同陪伴，「有段時間我同陳慧敏一齊住，有次唔開心踎喺地下喊，佢乜都冇講，踎喺地下陪我喊咗好耐，掃嚇我，咁樣經已好好多。至於許廷鏗好似我哥哥咁，兩次失聲後返上舞臺都係由佢陪住我，上年開第一個售票演唱會前我好擔心，佢分享經驗畀我，坦言有呢啲情緒好正常，講完後令我個心定返好多，畀咗枝強心針我，所以我好感激佢。」

兩年前失聲的林欣彤戴住口罩，由工作人員陪住出街。

陳慧敏係林欣彤閨蜜，兩人盡在不言中。

喺重要時刻，林欣彤總有「大哥哥」許廷鏗陪伴。

林欣彤減壓方式之一，就係同胞弟去放狗。