李克勤盧淑儀特訓兩個仔做球王夫婦變魔鬼哥爾夫球教練！

除咗鍾意唱歌，李克勤最大嗜好還有踢波同打波，同老婆盧淑儀更喜好一致，除咗係超級曼聯擁躉，夫婦同時迷上打羽毛球及哥爾夫球。近期兩個仔就由羽毛球迷變埋哥爾夫球迷，有廿四孝好媽做教練貼身傳授絕技，兩子球技進步神速，日前，克勤全家出動到深水灣球會打Golf家庭樂，兩個仔全程表現興奮打到唔捨得走，得父母真傳睇怕好快青出於藍!

撰文：東方新地｜圖片：東方新地

李克勤盧淑儀特訓兩個仔做球王

日前，克勤趁假期一家四口到深水灣打波，當日下午四時許，李太盧淑儀駕車載大仔R y a n 到達球會，原來克勤同細仔Rex一早在內練波，李太會合老公後，夫婦分開一人教一個，絕不偏心，不過攞咗專業教練牌的李太，手法純熟球技了得，在球場上不時大顯身手，

而大部分時間，兩個仔都會跟住媽媽練習，廿四孝好爸克勤，睇住老婆教仔已經甜在心頭，更不時幫個仔整理衣服，又幫手執波，見兒子姿勢唔正確會即時指導，陪玩已經係樂趣，呢啲咪係模範好爸好老公囉!

打 Golf打到攞埋哥爾夫球教練牌的盧淑儀，當日在球場上大展身手，近期見兩個仔 Ryan及Rex 對打Golf開始有興趣，李太實行變身教練培訓兒子。

據知情者透露:「有段時間，克勤同老婆瘋狂迷上打Golf，兩夫婦為咗打波專登搬近清水灣球會，克勤每朝早要打完波先開工，李太愛打Golf愛到去球會打咗幾個月工，到依家佢都好享受嗰次嘅體驗，之後仲考埋專業嘅教練牌，不過，兩個仔出世之後，因為要全副精神照顧兒子，李太連自己興趣都放低埋。反而係近期攞番球桿，又瘋狂鍾意番打Golf，不過最緊要都係，兩個仔喺佢教導之下，都鍾意埋呢種運動，特別係細仔 Rex，超級有興趣，咁佢可以陪住兩個仔一齊打，將自己興趣同經驗同啲仔分享就更加開心!」

第二日，李太盧淑儀再帶細仔Rex出動到球場練波，廿四孝好媽親力親為貼身教導，Rex學咗冇耐已經打得有板有眼。

對兒子錫到燶的盧淑儀，教仔打波非常認真，除細心指導Rex技術，更訓練兒子獨立和自律，教Rex打完波自己執波。

同老婆盧淑儀都係運動迷的李克勤，近期同一班國家隊羽毛球精英打成一片，早前就同老婆專登飛南寧睇蘇迪曼杯捧國家隊好友場，即使忙到要攝時間頻撲睇球賽亦非常享受。工作完畢回家就變Family Man的克勤，生活離不開唱歌同運動，相對打羽毛球，克勤夫婦其實早就瘋狂愛上打哥爾夫球，老婆盧淑儀更考埋哥爾夫球專業教練牌，還有克勤爸爸亦愛打Golf，依家夫婦將球技傳授埋給兩個仔，隨時可以三代同堂切磋球技，的確係一大樂事。