祥仔睇好馬國明同惠英紅！

祥哥睇好馬明搭紅姐成為今年視帝及視後

三屆視帝黎耀祥為咗出外見識嚇，去年5月同TVB轉簽部頭合約。雖然唔再係TVB「親生仔」，但祥仔第一部內地古裝劇《鳳弈》依然獲TVB安排喺臺慶月播出。因為無份角逐視帝，祥仔冷眼觀戰，分析得更加獨到和精準，憑他智慧拆解，今年臺慶的視帝視後，七成機會落喺馬國明同惠英紅手上：「觀眾眼中嘅馬明係天然呆，喺《白色強人》演醫生真係好啱好著數；至於小紅姐論資排輩，論實力一定冇人敢同佢爭！」

馬國明同唐詩詠喺《白色強人》嗰段情，觀眾睇得好投入。

影后小紅姐《鐵探》一出，視後一定係嚢中物。

黎耀祥笑談做男二好處多籮籮，休息又夠，捱得唔辛苦，準備又充足，主角拍到攰先到他埋位拍，好似打拳咁，他梗係贏啦。

有情有義的黎耀祥為撐昔日合作過《西遊記》及《巾幗梟雄》系列的編審張華標，答應北上演由標哥編劇的內地古裝劇《鳳弈》，仲唔介意做男二，畀徐正溪（即周麗淇前男友徐正曦）擔正。由三屆視帝「降呢」，祥仔竟唔覺係屈就：「我年紀大啲，成熟啲，唔似得有啲後生咁囂張，勝利沖昏頭腦自以為是，老實講，我一生人做主角只係近十年八載嘅事，做路人甲同埋男配反而做咗咁多年，我係唔會有做大明星嘅感覺，或者將自己擺喺主角嘅位置，係我眼中界定作為演員，無論係乜位置，就算係客串，只要做好個角色就經已好滿足，否則根本捱唔到廿幾年，應該好快會放棄。而且大家要清楚釐定配角崗位，其實係配戲畀人，每次演出都一定起發揮作用。」

祥仔和「皇后」曹晞文有好多感情交流戲

內地演員徐正溪（即周麗淇前男友徐正曦）為祥仔慶生

遺憾雯女演唔到

就算今次做男二，但祥仔好有戲做，非常搶戲：「朗坤呢個角色似係囂張跋扈嘅奸臣，其實只係想喺宮中鞏固實力嚟保護皇后，因為佢哋有份細水長流純純嘅愛，關係微妙，感情變化比《巾幗》、《義海》更多。因為《鳳弈》係《巾幗》系列嘅延續，標哥有打過鄧萃雯主意做皇后，但中間有問題傾唔成，都有小小遺憾。計落我喺《無雙譜》後5年冇拍過古裝劇，哈！我都唔太接受自己古裝個樣。唯一有趣係古裝劇唔實在，唔使交待角色背景，會有好多嘢玩。」

黎耀祥和鄧萃雯演《巾幗》系列大受歡迎，可惜今次未能再續前緣

欣賞馬明好乖仔

今年TVB將臺慶頒獎禮押後到明年1月才舉行，暫時祥仔冇劇角逐，可以喺零壓力下考嚇眼光。他先利申：「因為好多戲跟唔足，只能客觀地去估計加小小人情分嚟推斷，計我分析馬國明拎視帝機會最大，佢個人老老實實、呆呆笨笨，喺《白色強人》度做啱咗角色，成日覺得演員係要配合角色外型同感覺，觀眾先會投入到，喺病人視覺，醫生唔會古靈精怪，依牙鬆槓，搞搞震，馬明嘅呆笨就變成佢演醫生嘅沉實能力。(係咪個個小生都攞過曬，排隊都應該輪到佢？)TVB又唔係對佢唔公平嘅，其實競選都要講嚇運氣，正如唔係年年港姐都好靚。馬明唔好彩，年年遇到強敵，強攻黃秋生、黃子華邊個都死啦。不過，我唔使鼓勵佢加油，因為佢一啲都唔落寞，以往佢好乖仔唔花費，哈！依家我望到佢轉曬新車呀，又住太古城，我都睇你哋爆料咋。」

黎耀祥有5年冇拍過古裝劇，對上一套係《無雙譜》。

山聰浩信機會微

至於陳山聰被視為黑馬，祥仔坦言：「雖然佢喺《金宵大廈》人氣好爆，係貫穿成套劇嘅主角，但單元劇好多，演出上少咗個優勢，佢同李施嬅喺呢方面都比較輸蝕。王浩信嘅《解決師》迴響又唔算太大。在公在私，客觀評論，馬明機會最大。視後點都係畀小紅姐，雖然佢唔係親生女，但佢會同TVB再拍㗎嘛，而且家市場唔同咗，個圈擴闊好多，自己人愈嚟愈少，尤其有資歷嘅自己人，嚇嚇簽到10年先係自己人咁就死梗喇。」

黎耀祥好注重家庭生活，現時同無綫轉簽部頭合約，可以經常去美國探仔。

陳山聰、李施嬅主演嘅《金宵大廈》雖然好爆，但當中單元劇太多，呢方面都比較輸蝕。

 
相關文章